Agtutubo​—Paragsakenyo ti Puso ni Jehova

¹ No ti maysa a tao ket usarenna iti pigsa ken bileg ti agtutubo iti umiso a wagas, pudno unay a makaay-ayo ti biag. Insurat ni masirib a Salomon: “Agrag-oka, agtutubo, iti kinaagkabannuagmo, ket palubosam ta pusom nga agaramid ti naimbag kenka iti al-aldaw ti kinaagtutubom.” (Ecl. 11:9) Dakayo nga agtutubo a tattao ti sumungsungbat iti Dios kadagiti tignayyo.

² No kasano ti panagbiagyo isut’ nasken a saan laeng a kadakayo ngem kasta met kadagiti nagannakyo. Kunaen ti Proverbio 10:1: “Ti masarib nga anak pagragsakenna ni amana, ngem ti maag nga anak isut’ pakatuokan ni inana.” Ngem mas importante, no kasano ti panagbiagyo apektaranna iti Namarsuayo, ni Jehova a Dios. Dayta ti gapu no apay nga imparegta met ti Proverbio 27:11 kadagiti agtutubo: “Agmasiribka, anakko, ken paragsakem daytoy pusok, tapno masungbatak daydiay a mangum-umsi kaniak.” Kasanoyo nga agtutubo a maparagsak iti puso ni Jehova ita nga aldaw? Mabalin a maibanag daytoy iti nagduduma a wagas.

³ Babaen ti Umiso nga Ehemplo: Dakayo nga agtutubo ti makapadas iti “napeggad a tiempo a narigat a kalangen” kas naipadto iti Sao ti Dios. (2 Tim. 3:1) Nalabit a maisagmakkayo iti panangimameg dagiti di mamati a kaadalan ken uray dagiti maestroyo isuda a manguyaw kadagiti naibasar ti Biblia a panangmatmatyo. Kas pangarigan, maysa a maestro ti nangidatag iti teoria ti ebolusion a kas kinapudno bayat a ti Biblia ket maysa kano a sarsarita. Nupay kasta, maysa nga agtutubo nga agibumbunannag iti klase ti sisusungdo a nangidepensa iti Biblia. Kas resultana, adu a panagadal ti Biblia iti nairugi. Dadduma kadagiti interesado ti nangrugin a tumabuno kadagiti gimong. Ti pammatiyo nga agtutubo a kakabsat a lallaki ken babbai ti mangkondenar iti dakes a lubong ken mangatrakar iti nasingpet ti panagpuspusoda a tattao iti kinapudno.​—Maidilig iti Hebreo 11:7.

⁴ Maparegtayo kadi dagiti kaedadyo iti kongregasion tapno saanda a paallukoy iti kinadakes? Babaen ti naimbag nga ehemployo iti pagadalan, pagtaengan, ken iti kongregasion, mapabilegyo ti pammati dagiti dadduma nga agtutubo nga agibumbunannag. (Roma 1:12) Paragsakenyo ti puso ni Jehova babaen iti ehemplo kadagiti sabsabali.

⁵ Babaen ti Kawes ken Panagbubuok: Maysa a kabsat nga agtutubo a babai ti sinutil ken inuyawda gapu iti natakneng a panagkawesna ket binirngasanda iti “di masagid.” Saan a daytoy ti nangkelga kenkuana a makidanggay iti saan a nadiosan a pagrukodan daytoy lubong. Imbes, inlawlawagna kadakuada a maysa a Saksi ni Jehova ket ti nangato a pagalagadan dagiti Saksi iti salimetmetanna. Adda aya dayta a kinatibker kadakayo? Wenno palubosanyo iti lubong ni Satanas a mangmolde kadakayo iti wagas ti panunot ken konduktana? Anian a ragsak a mapaliiw dagiti adu nga agtutubo a mangipangpangag iti sursuro ni Jehova ken agtukkiadda kadagiti nadulpet nga istilo, dagiti moda, idolo, ken sursuro daytoy lubong. Kinapudnona, kas naadaltayo iti kallabes a kombension ti distrito, masapul a bigbigentayo a dagitoy a bambanag ket namunganayda iti lubong a naimpluensiaan dagiti demonio.​—1 Tim. 4:1.

⁶ Babaen iti Napili a Pagliwliwaan ken Paglinglingayan: Masapul nga adda iti panunot dagiti nagannak ti kasapulan a panangtulong iti annakda ti nainsiriban a panangpili iti umiso a kita ti pagliwliwaan ken paglinglingayan. Nasao ti maysa a kabsat a lalaki a sipapadayaw iti maysa a nasayaat a pamilia nga inayatna unay manipud idadakkelna. Kas sipapanunot iti espiritual, impaay dagiti nagannak ti giya a naiyaplikar met iti paglinglingayan ti pamilia. Nakuna ti kabsat iti kapaliiwanna: ‘Raemek ti panagaramidda kadagiti bambanag a sangsangkamaysa. Saan laeng a tulongan dagiti nagannak iti annakda nga agsagana a maipaay ti serbisio, ngem no tiempo iti panaglinglingay, maragsakanda a mapan agpasiar, sumarungkar kadagiti museo, wenno basta agintekda iti balay ket agay-ayam wenno agaramidda kadagiti proyekto. Ti ayatda iti maysa ken maysa ken kadagiti sabsabali ti mamagrikna kenka iti talek a magnada ti kinapudno iti masakbayan, aniaman ti mapasamak.’

⁷ Siempre, adda tiempo a saan a mabalin nga ti intero a pamilia ket rumaman iti panaglinglingay ken panagliwliwa. Dakayo nga agtutubo ti masapul nga agannad iti daytoy ken ti kinaserioso iti panangpili no kasanoyo nga usaren ti dadduma a nawaya a tiempoyo. Determinado ni Satanas a mangiyaw-awan kadakayo no mabalin. Dagiti agtutubo ken awan kapadasanna ti nangruna a ponteria iti nasikap nga aramid ken makaallilaw a pangallukoyna. (2 Cor. 11:3; Efe. 6:11) Isu nga ita usaren ni Satanas iti nagduduma a pamay-an a manggargari kadakayo a mangibaw-ing ken mangsurot iti biag ti naagum a panagpennek iti ragragsak ken kinakillo.

⁸ Ti telebision isut’ nalaing a manggargari kas promotor iti materialistiko ken imoral nga istilo ti panagbiag. Dagiti pelikula ken video ti regular a mangipabuya iti kinaranggas ken agdadata a sekso. Kumarkaro ti kinalaad ken kinaalas dagiti popular a musika. Dagiti pangargari ni Satanas ti agparang nga inosente, ngem natallangawanna dagiti rinibo nga agtutubo a Kristiano iti dakes a pampanunot ken kondukta. Tapno masarkedan dagita a pakaisagmakan, sibibileg koma a suroten iti kinalinteg. (2 Tim. 2:22) No kasapulan nga atoren iti pampanunot ken konduktayo maipapan ti panagliwliwa ken panaglinglingay, kasano a maaramid daytoy? Ited ti salmista iti sungbat: “Iti amin a pusok binirbirokka. Dinak baybay-an a sumiasi kadagiti bilbilinmo.”​—Sal. 119:10.

⁹ Ti panangidolo kadagiti bituen iti sport ken pagpalpaliwaan ket nasaknap. Ti panagbuteng ken Jehova isut’ tumulong kadakayo nga umadayo a mangidolo iti imperpekto a tattao. Uray ti seksual nga imoralidad ket idoluen dagiti adu kadagitoy nga aldaw. Masaluadankayo kadagitoy no liklikanyo iti pornograpia ken ti rinuker a musika. Maipapan iti musika, ti Abril 15, 1993, a ruar iti Ti Pagwanawanan kunana: “Ti musika ket sagut ti Dios. Nupay kasta, adu dagiti naigamer iti daytoy. . . . Ikabilyo ti musika iti lugarna ket ti aramid ni Jehova ti ipangrunayo koma. Agbalinkayo a napili ken naannad no iti musika a denggenyo. Iti kasta mausaryo​—saan a maabuso​—daytoy a sagut ti Dios.”

¹⁰ Kultibarenyo ti naan-anay a panagrurod no ania iti dakes. (Sal. 97:10) No masulisogka nga agaramid ti dakes, panunotem no kasano ti panangmatmat ni Jehova iti dayta a banag, ken utobem ti pagtinnaganna: ti di tarigagayan a panagsikog, makaakar a sakit iti sekso, pannakatuok iti panunot wenno rikna, kaawan panagraem iti mismo a bagi, ken pannakapukaw ti pribilehio iti kongregasion. Liklikan ti panaguper iti pabuya ti TV, pelikula, video, kanta, wenno panagsasarita a mamaregta iti kinadakes. Liktadan ti makikuykuyog kadagidiay kunaen iti Biblia a “dagiti maag.” (Prov. 13:19) Napilikayo koma; pilienyo dagiti nasinged a kakuyog iti kongregasion nga isu dagidiay managayat ken Jehova ken ti nalinteg a pagalagadanna.

¹¹ Wen, dagiti agtutubo a pudno a mayat a mangay-ayo iti puso ni Jehova ti masapul a mangipangag iti pammagbaga a masarakan idiay Efeso 5:15, 16: “Siputanyo a siaannad no kasano ti pannagnayo a saan a kas kadagiti nakuneng ngem kas masirib a tattao, a gatangenyo ti nagundawayan a tiempo nga agpaay kadakayo, agsipud ta dakes dagiti al-aldaw.” Ania ti tumulong kadakayo a “nasiput” iti panagprogresoyo kadagitoy maudi nga al-aldaw?

¹² Panangtaripato iti Espiritual a Kasapulan: Iti Mateo 5:3, naikomento ni Jesus: “Naragsak dagidiay sipupuot iti espiritual a kasapulanda.” Uray dakayo naragsakkayo met babaen ti panagpuotyo iti espiritual a kasapulanyo. Ti panangpunno iti dayta a kasapulan ramanenna ti panagregta a makiraman iti panangikasaba ti naimbag a damag, idinto ta daytoy ti mamabileg iti pammati kadagiti bambanag a maadaltayo.​—Roma 10:17.

¹³ Manipud iti mismo a kapadasan ammoyo a saan a kanayon a nanam-ay ti regular a pannakiraman iti ministerio. Nalabit a gapu iti kurang a panagtalek. Gapuna, ti nabileg a keddeng iti biangyo ti kasapulan. Babaen ti regular a wagas a pannakiraman iti ministerio, maparang-ayyo ti laingyo a manaksi ken mapabileg iti panagtalek ti abilidadyo a mangasaba.

¹⁴ Makitulagkayo a makipagtrabaho kadagidiay napnuan kapadasan nga agibumbunannag iti kongregasion, kas kadagiti regular payunir ken panglakayen. Umimdengkayo a naimbag kadagiti presentasionda ken no kasanoda a sanguen dagiti pangontra iti ruangan. Ikagumaanyo nga usaren ti libro a Panakirinnason ken dagiti singasing a naidatag idiay Ti Ministeriotayo iti Pagarian. Saan nga agbayag makagun-odkayo ti dakdakkel a rag-o manipud iti ministerio gapu ta ipapaayyo ti aminyo ken Jehova.​—Ara. 20:35.

¹⁵ Nabaelan dagiti dadduma ti nangundaway iti oportunidad a mangsaksi idiay pagadalan ken nagballigida a nagaramid iti adalan. (Mat. 28:19, 20) Maysa a Kristiano nga agtutubo ti nagkuna: “Bayat dagiti libre a periodo, naaddaanak iti adu a gundaway a nangasaba, nangruna bayat dagiti nangina nga aldaw daytoy lubong. No makaibatiak ti publikasion iti Biblia idiay pagtugawak a makita dagiti dadduma, adu dagiti interesado nga estudiante ti umasideg kaniak.” Idi agtanoy, dadduma kadagiti estudiante ken uray iti maestro ti tumabunon kadagiti Kristiano a gimong. Kinapudnona, ti maestro ket nagprogreso agingga iti punto a nagbalin a dedikado a Saksi. Kasta unay ti rag-o ni Jehova no dagiti agtutubo a managdayaw a kas kadakayo ket makaiyeg iti dayaw ti naganna.

¹⁶ Ti sabali pay a wagas a mangpennek iti espiritual a kasapulan isut’ babaen ti personal a panagadal. Tapno maparagsak iti puso ni Jehova, masapul ti panangammo kenkuana, ti panggepna, ken dagiti reglamentona kadatayo. Nakaitaningkayo kadin iti tiempo ti personal a panagadalyo? Regular aya ti panagadalyo, a kas iti panangitiempo ti regular a pannanganyo? (Juan 17:3) Adda kadi personal nga iskediolyo nga agbasa ti Biblia a mainayon iti panangikagumaan a sumurot iti panagbasa ti Biblia nga iskediol iti Teokratiko a Pagadalan iti Ministerio? Agsagsaganakayo aya a naimbag sakbay dagiti gimong? Basbasaenyo kadi a kanayon iti Pagwanawanan ken Agriingkayo! Kangrunaan, maitiempoyo kadi a basaen iti kada artikulo ti serye nga “Agimtuod Dagiti Agtutubo . . . , a siaannad a kitaenyo iti kada kasuratan? Ket dikay liplipatan iti libro a dinisenio ti Sosiedad a nangruna nga agpaay iti espiritual a kasapulanyo, ti Dagiti Saludsod nga Iyimtuod ti Agtutubo​—Dagiti Sungbat nga Epektibo. Dagiti agtutubo a Kristiano ken dagiti nagannak iti intero a lubong ti nagsurat a nangibaga a daytoy a libro ket natulonganna ida nga immasideg ken Jehova.

¹⁷ No basaenyo ti Biblia ken dagiti teokratiko a katulonganna, ibagada maipapan ken Jehova, ti panunotna, ken dagiti panggepna. Utobenyo no kasano a dagitoy a pakaammo ket tumulongda kadakayo. Saritaenyo dagiti basbasaenyo ken dagiti nabasayon iti napalabas. Ramanenna daytoy ti panagmennamenna. Ti panagmennamenna ti mangipalubos iti pakaammo a dumanon iti puso ket paggunayennakayo.​—Sal. 77:12.

¹⁸ Agrag-otayo no makita dagiti agtutubo a naridam iti espiritual a kasapulanda a tumabuno kadagiti gimong ti kongregasion. Dakayo a Kristiano nga agtutubo ti makaparegta iti dadduma babaen ti regular a nabagas a panagkomentoyo bayat iti gimong. Aramidenyo a kalat ti mangted iti uray maysa laeng a komento ti kada gimong. Parayrayenyo ti nabara a relasionyo kadagiti tattao iti amin a grupo ti edad iti kongregasion babaen ti makapabileg a pannakikadua iti sakbay ken kalpasan dagiti gimong. (Heb. 10:24, 25) Maysa nga agtutubo a kabsat a lalaki ti nagkomento a dagiti nagannakna iti namaregta kenkuana a makisao iti uray maysa laeng a nataengan a kabsat a lalaki wenno babai iti kada gimong. Ita tagipatgennna ti kapadasan a nagun-odna manipud iti pannakikadua kadagiti nataengan a miembro ti kongregasion.

¹⁹ Ragpaten Dagiti Espiritual a Kalat: Naladingit a banag a ti biag dagiti adu nga agtutubo ket awanan iti panggep ken turongda. Nupay kasta, saan kadi a nasayaat a masagrap iti rikna nga aggubuay kadagiti teokratiko a kalat ken sibaballigi a maragpat ida? Dagitoy a kalat, a maragpat babaen iti lawag ti nadiosan nga edukasion, ti personal a makapnek itan ken iti ultimo mangiturong ti biag nga agnanayon.​—Ecl. 12:1, 13.

²⁰ No mangitaningkayo iti kalat, aramidenyo a buyogen ti kararag. Makisaokayo kadagiti nagannakyo ken dagiti panglakayen. Usigenyo ti bagbagiyo ken iti abilidadyo, ket mangituyangkayo kadagiti praktikal a kalat sigun ti kabaelanyo nga ibanag a saan a maidilig iti dadduma. Nagduduma ti pannakasukogtayo​—iti pisikal, mental, emosional, ken espiritual. Gapuna, dikay namnamaen a maaramidyo iti tunggal banag gapu ta nabaelan dagiti dadduma.

²¹ Ania ti dadduma kadagiti kalat a mabalinyo a ragpaten? No saankayo pay nga agibumbunannag wenno nabautisaran, apay a dikay aramiden dagitoy a kalatyo? No maysakayon nga agibumbunannag, mabalinyo a kalaten ti masinunuo nga oras iti ministerio ti kada lawas. Itrabahoyo ti panagbalin a makabael a mannursuro no agsarungkarkayo, ken aramidenyo a kalat ti mangidaulo iti panagadal ti Biblia. No bautisadokayon nga agtutubo idiay pagadalan, apay a dikay aramiden a kalat ti ag-auxiliary payunir bayat dagiti bulbulan iti kalgaw? Adda “nawadwad nga aramiden iti trabaho ti Apo.”​—1 Cor. 15:58.

²² Nasken ti Tulong Dagiti Nagannak: Saan koma a riknaen dagiti agtutubo iti kongregasion nga isuda laeng ti mangikagkagumaan a makagun-od iti biag. Ni Jehova, babaen ti organisasionna, nangted iti balakad a tumulong kadagiti agtutubo a mangaramid ti inaldaw a desision a mangparukma kadagiti pakasikoran iti biag. Dagiti dedikado a nagannak, siempre, ti addaan iti kangrunaan a rebbengen a tumulong kadagiti annakda a mangaramid ti umiso a desision. Iti 1 Corinto 11:3, inkeddeng ti Biblia nga iti asawa a lalaki isut’ ulo ti sangakabbalayan. Gapuna, ti Kristiano a sangakabbalayan, a danggayan iti asawa a babai nga agtrabaho, ti ama isut’ mangidaulo iti pannakaisuro dagiti annak kadagiti bilin ti Dios. (Efe. 6:4) Maaramid daytoy babaen ti nakonsiensiaan a panangsanay manipud kinamaladaga. Idinto ta ti utek iti ubing ket mamitlo ti panagdakkelna iti umuna a tawen ti biagna, saan koma a tagibassiten dagiti nagannak ti abilidad iti maladaga a makaadal. (2 Tim. 3:15) Bayat a dumakkel dagiti ubbing, kasapulan ti naprogreso a panangisuro dagiti nagannak kadakuada nga agayat ken Jehova ket mapatanor iti naimbag a relasionda kenkuana.

²³ Iti daydi “Nadiosan a Sursuro” a Kombension ti Distrito, adda palawag a napauluan iti “Agtrabahokayo a Sipipinget a Maipaay iti Pannakaisalakan ti Sangakabbalayanyo.” Nagduduma a puntos ti nairanud kadagiti nagannak a kumita iti praktikal a wagas a pangtulong ti annakda. Ti nasayaat a naamaan ken nainaan nga ehemplo isut’ kasayaatan a pangrugian. Mas adu ti maaramidan daytoy kadagiti annakyo ti naespirituan ngem iti adu a sao kadakuada maipapan no ania ti aramiden ken saanda nga aramiden. Ti umiso nga ehemplo dagiti nagannak ramanenna iti panangipakita kadagiti bunga ti espiritu iti pagtaengan, iti asawa ken annak. (Gal. 5:22, 23) Napadasan dagiti adu nga iti espiritu ti Dios isut’ nabileg nga impluensia iti naimbag. Tulongannakayo a mangsukog iti panunot ken puso dagiti annakyo.

²⁴ Nadakamat met idiay kombension a kasapulan dagiti nagannak nga ituyang ti naimbag nga ehemplo iti personal a panagadal a kababalin, itatabuno iti gimong, ken regular a pannakipaset iti tay-ak ti ministerio. No sirarayraykayo nga agsao maipapan ti kinapudno iti pagtaengan, idauloyo ti naregta a ministerio, ken positibokayo iti personal a panagadal, maparegta dagiti annakyo nga aginteres iti espiritual a bambanag.

²⁵ No sipapanunot a maisagana, ti regular, adda kaipapananna a panagadal iti Biblia ti pamilia ket makapainteres ken makaay-ayo, kas mamasingked iti panagkaykaysa ti pamilia. Itiempoyo a danonen ti puso dagiti annakyo. (Prov. 23:15) Bayat nga adu a pamilia ti mangusar iti daytoy nga okasion nga agsagana a maipaay iti linawas a Panagadal ti Pagwanawanan, makaparegta no masansan a mausig dagiti masinunuo a kasapulan ti pamilia. Dagiti saludsod a kumiddaw iti panangmatmat ken panagimdeng ti komento iti kada miembro ti pamilia isut’ makalawag ken makapresko. Ti panangidaulo iti panagadal a makagunggona iti kada miembro ti pamilia ket maysa a karit iti ulo ti pamilia. Ngem anian a makagunggona no amin ket dumakkel iti espiritual! Babaen ti panangiraman iti tunggal maysa, agturay ti naragsak nga espiritu.

²⁶ Ti naayat, nagpaiduma a panangsanayyo itan ti nasken a pakasalbaran iti biag dagiti annakyo. (Prov. 22:6) No adda iti panunotyo daytoy, nalakayo a maawatan a daytoy ti kangrunaan a panangisuro a naaramidanyo. Dikay pagarupen nga agwaywayaskayo iti daytoy nga espesial ken nasken nga aramid. Suruenyo ti agpannuray ken Jehova a maipaay iti giya a mangtaripato iti napamiliaan a responsabilidadyo. Saan laeng a daytoy. Adda pay sabsabali a makaipaay iti nawadwad a tulong.

²⁷ No Ania ti Maitulong Dagiti Dadduma: Mabalin a dagiti panglakayen ket iramanda dagiti agtutubo, agraman nagannakda, nga agdalus iti Kingdom Hall. Paregtaen dagiti ubbing kadagiti gimong ti kongregasion. Dagiti panglakayen ken ministerial nga adipen a natudingan iti paset ti Gimong iti Serbisio ti masapul a nasiput kadagiti maitayag nga ima dagiti ubbing no adda paset a makiraman dagiti dumdumngeg. Kitaenyo dagiti oportunidad a mangusar iti mapagulidanan nga agtutubo kadagiti demostrasion agraman nagannakda. Dadduma kadakuada ti mainterbio ken mapagkomento iti ababa.

²⁸ Dikay tagilag-anen iti kinapingetda. Napatalgedan a dagiti agtutubo ket pudno a sanikua iti kongregasion. Babaen ti naimbag a konduktada, mabalinda nga ‘arkosan iti sursuro ti Manangisalakantayo, ti Dios.’ (Tito 2:6-10) Sipupuotkayo koma a mangpadayaw kadagiti agtutubo a nakipaset uray iti bassit laeng a wagas. Daytoy ti mamaregta kadakuada nga agsagana ken aggartem nga agaramid manen iti masakbayan. Ti kasta nga interes dagiti nataengan kadagiti agtutubo ti napateg unay. Kasano ti kadaras kadakayo a panglakayen wenno ministerial nga adipen nga immasideg kadagiti agtutubo a miembro ti kongregasion tapno padayawanyo ida iti palawag ken panangiparangda bayat ti gimong?

²⁹ Dakayo a payunir, ania ti maitulongyo? Apay a dikay repasuen ti iskediolyo tapno makita no kasanoyo nga iraman dagiti ageskuela nga ubbing iti minalem ken ngudo ti lawas nga urnosyo? Positibo aya ti pannakisaoyo kadakuada maipapan iti napiliyo nga amin a tiempo a serbisio? Ipakpakita kadi dagiti langayo a naragsakkayo iti ministerioyo? Mairekomendayo aya dayta iti dadduma, nangruna dagiti agtutubo? No agtrabahokayo kadagiti ruruangan, makapabileg ken positibo kadi iti sasaoyo? No kasta, kas payunir mabalinanyo met a mairanud daytoy nasken unay a panangsanay a trabaho.

³⁰ Amin iti kongregasion ti masapul a siriridam iti daytoy napateg a trabaho a mangsanay kadagiti agtutubo. Makaaramidkayo aya ti masnup nga urnos a mangikuyog kadakuada iti tay-ak ti ministerio? Mabalinyo kadi a makadua ida a mangsanay ti panangiparang a kas panagsagana iti trabaho kadagiti ruangan? Nasiputkayo aya kadagiti gundaway a mamaregta kadakuada iti masanguanan a maipaay ti espiritual nga aktibidad no makakuyogyo ida iti ministerio? Tunggal agibumbunannag ti masapul a naridam nga uray iti bassit laeng a komento ket paandarenna ti positibo a panagpanunot iti espiritual a kalat ti agnanayon a biag, nga agpaay iti agnanayon a pagimbagan ti maysa nga agtutubo.

³¹ Matulongan Dagiti Agtutubo ti Mismo a Bagida: Agtutubo, paregtaendakayo a mangipangag iti sursuro ni Jehova ken liktadanyo ti tukon daytoy lubong. Itultuloyyo a suoten iti bagbagiyo babaen ti panangusigyo iti kondukta ken riknayo. Ania iti riknayo ken Jehova ken ania ti namnamaenna kadakayo iti kada aldaw a panagbiagyo? Makigubgubatkayo kadi a sipipinget a maibusor iti impluensia dagiti ideya ni Satanas? (1 Tim. 6:12) Idinto ta dagiti tattao, nangruna dagiti agtutubo, ket gagangay a tarigagayanda ti anamong dagiti kapatadanda, magargarikayo kadi a sumurot iti kaaduan nga agaramid ti dakes? (Exo. 23:2) Naawatan ni apostol Pablo nga adda napigsa a guyod a kumanunong iti daldalan ti lubong.​—Roma 7:21-13.

³² Kasapulanna ti tured a mangsaranget iti impluensia ti lubong, nga alaen ti kurso a naiduma kadagiti nailubongan a kapatadan, ken ipangag dagiti sursuro ti Dios. Dagiti tattao idi ugma ti nangaramid ken nagballigi iti dayta. Usigenyo ti tured ni Noe. Kinondenarna ti intero a lubong babaen iti pammatina ken ti panagtalinaedna a naisina kadagiti managdakdakes idi tiempona. (Heb. 11:7) Makigubalkayo a sipipinget ta masubbot iti bannogyo. Dikay tuladen dagiti nalupoy, awan tulangna, a managbuteng a sumurot iti umariwekwek ni Satanas. Maisupadi, sarakenyo ti makikadua kadagidiay mangsapsapul iti pabor ti mata ni Jehova. (Fil. 3:17) Palawlawanyo ti bagiyo kadagiti kakadua a makimartsa kadakayo nga agturong idiay naikari a baro a lubong ti Dios. (Fil. 1:27) Laglagipenyo nga adda laeng maymaysa a dalan nga agturong iti agnanayon a biag.​—Mat. 7:13, 14.

³³ No maragsakantayo a makakita kadagiti agtutubo a mangyeg ti dayaw ken dayag iti Diostayo, anian a ragsak ti maiyeg daytoy kenkuana! Awan duadua a makaay-ayo ken Jehova no makitana dagiti agtutubo a tattao a naan-anay a makibulig a mangiwaragawag kadagiti grande a panggepna. Isuda ti “maysa a tawid” manipud kenkuana, ket kayatna dagiti kasayaatan iti agpaay kadakuada. (Sal. 127:3-5; 128:3-6) Mangisarming iti interes ni Amana, nasarakan ni Kristo Jesus iti rag-o a nakitimpuyog kadagiti agtutubo nga ubbing, ket intiempona a pinaregta ida iti panagdayawda ken Jehova. Imparangarangna ti nadungngo a rikna kadakuada. (Mar. 9:36, 37; 10:13-16) Matmatantayo kadi dagiti agtutubotayo iti wagas a panangmatmat da Jehova ken Kristo Jesus? Dagiti kadi agtutubo iti kongregasiontayo ket mariknada no kasano a ni Jehova ken dagiti anghelna ket matmatanda ti kinasungdo ken naimbag nga ehemploda? Makomendaran ken maparegtada a mangparagsak ken Jehova babaen ti panangragpatda kadagiti espiritual a kalat. Agtutubo, ragpatenyo dagiti kalat nga agresulta iti bendision kadakayo itan ken iti masanguanan.