Danonenyo ti Puso iti Estudianteyo ti Biblia
1 Kayatyo kadi a ti estudianteyo iti Biblia ket agtignay a maitunos iti maadalna? Tapno matignay ti estudianteyo iti Biblia nga aggunay, masapul a danonenyo ti pusona. Idi aldaw ti Pentecostes 33 K.P., ti makapikapik a diskurso ni apostol Pedro isut’ “simmalput iti puso” dagiti agarup a 3,000 a tattao, isuda a “nangabrasa iti saona a naimpusuan” ket nabautisaranda iti dayta nga aldaw. (Ara. 2:37, 41) Kasanoyo a madanon ti puso iti estudianteyo ti Biblia?
2 Agsaganakayo a Naimbag: Dikay padasen a wanasen iti adu a material a kurang ti tiempo a makirinnason iti estudiante. Ikeddengyo a nasakbay dagiti punto nga ilawlawagyo, ken siguruenyo a maawatan ken maiyaplikaryo dagiti kasuratan a sisasayaat. Utobenyo a nasakbay dagiti saludsod a mabalin a lumtuad iti panunot ti estudiante maigapu iti nabangonanna.
3 Tuladenyo ti Metodo ni Jesus iti Panangisuro: Nagusar ni Jesus kadagiti ilustrasion a pangpalaka kadagiti narikut a punto ken tapno matulonganna dagiti estudiantena a mangawat iti kababagas ti kasasaad. (Luc. 10:29-37) Umasping, maimulayo dagiti naimbag a sursuro iti puso ti estudianteyo iti Biblia babaen ti panangpalaka kadagiti ilustrasion, nga adawenyo ida manipud kadagiti kairuaman a bambanag ti biag, ken iyaplikaryo ida a masinunuo iti sasaaden ti estudiante.
4 Makatulong a nangruna dagiti saludsod a sumarut iti puso dagiti estudiante ti Biblia, kas masansan nga indemostra ni Jesus. (Luc. 10:36) Ngem saankayo koma a mapnek no ti estudiante ket basaenna latta iti sungbatna manipud ti libro. Mangusarkayo iti mangiwanwan a salsaludsod tapno maiturong ti panunotna iti maysa a konklusion a dina pay a nausig iti napalabas. Dakamaten dagiti panangmatmat a saludsod tapno pangammuan no kasano ti panamatina iti maysa a banag. Tumulong daytoy kadakayo a mangtinong no sadino a beddeng iti pakasapulanna ti tulong.
5 No ti estudiante iti Biblia ket saan a rumangrang-ay, masapul a palutpotenyo dagiti makagapu. Apay nga agkitakit nga agtignay? Adda aya dadduma a Nainkasuratan a punto a saanna a maawatan? Agkedked kadi a mangihusto iti wagas ti panagbiagna? No ti estudiante iti Biblia ket padpadasenna iti ‘panagalla-alla iti dua a nagduma a kapanunotan,’ tulonganyo a mangilasin iti kapeggad dayta.—1 Ar. 18:21.
6 Nabigbig ni apostol Pablo a ti panangisuro iti kinapudno ti Biblia ket maysa a pangsalbar ti biag a trabaho, gapuna a binalakadanna dagiti Kristiano a ‘kanayon a tamingenda iti panangisuroda.’ (1 Tim. 4:16) Masapul a maadal dagiti estudianteyo ti Biblia iti nasursurok ngem ti basta bambanag maipapan iti Biblia ken paspasamak ti lubong. Masapul a magun-odda iti umiso a pannakaammo maipapan ken Jehova ken ni Jesus ket mapatanorda iti personal a relasion kadakuada. Babaen laeng ti panangaramidda iti dayta a matignayda a mangidemostra ti pammati ken aramidda. (Sant. 2:17, 21, 22) No madanon iti puso ti estudiante, isut’ mapagunay a mangsurot iti kurso a pakaidayawan ni Jehova ken pakasaluadan iti mismo a biagna.—Prov. 2:20-22.