Asikasuenyo ti ‘Arte ti Panangisuroyo’
“Ikasabam ti sao, . . . mangtubngarka, mangtinggarka, mamagbagaka, buyogen ti isuamin a mabayag a panagitured ken arte ti panangisuro.”—2 TIM. 4:2.
1. Ania ti imbilin ni Jesus kadagiti adalanna, ken ania ti impakitana nga ulidan?
NUPAY simimilagro a nangpaimbag ni Jesus bayat ti ministeriona ditoy daga, isu ket nagdindinamag kangrunaanna kas mannursuro imbes a kas mangngagas wenno managaramid iti milagro. (Mar. 12:19; 13:1) Ti panangiwaragawag iti naimbag a damag ti Pagarian ti Dios ti impangpangruna ni Jesus, ket kasta met dagiti pasurotna ita. Naibilin kadagiti Kristiano nga itultuloyda ti agaramid iti adalan babaen ti panangisuroda kadagiti tattao a mangtungpal iti amin nga imbilin ni Jesus.—Mat. 28:19, 20.
2. Ania ti masapul nga aramidentayo tapno maitungpaltayo ti annongentayo a mangasaba?
2 Tapno maitungpaltayo ti annongentayo nga agaramid iti adalan, masapul nga itultuloytayo a parang-ayen ti abilidadtayo a mangisuro. Impaganetget ni apostol Pablo ti kinapateg daytoy nga abilidad idi nagsurat iti kaduana a mangaskasaba a ni Timoteo. Kinunana: “Itultuloymo nga asikasuen ti bagim ken ti isursurom. Agtalinaedka kadagitoy a banag, ta babaen ti panangaramidmo iti daytoy maisalakanmonto agpadpada ti bagim ken dagidiay agimdeng kenka.” (1 Tim. 4:16) Ti tuktukoyen ditoy ni Pablo a panangisuro ket saan a basta panangyallatiw iti pannakaammo. Dagiti nasigo a Kristiano a ministro danonenda ti puso dagiti tattao ken gutugotenda ida a mangbalbaliw iti biagda. Maysa dayta nga arte wenno abilidad. Kasanoyo ngarud a sukayen ti “arte ti panangisuro” bayat nga ikaskasabayo ti naimbag a damag ti Pagarian ti Dios?—2 Tim. 4:2.
Panangsukay iti “Arte ti Panangisuro”
3, 4. (a) Kasanotayo a masukay ti “arte ti panangisuro”? (b) Kasano a matulongannatayo ti Teokratiko nga Eskuelaan ti Panagministro nga agbalin a nasigo a mannursuro?
3 Maysa a diksionario ti nangdepinar iti “arte” kas ti “abilidad a mapatanor babaen ti panagadal, panangpaliiw, wenno panangyaplikar.” Nasken a parang-ayentayo dagitoy tallo a banag tapno agbalintayo a nalaing a mannursuro iti naimbag a damag. Babaen ti panagadal a nabuyogan iti kararag, maaddaantayo iti umiso a pannakaawat iti ad-adalentayo. (Basaenyo ti Salmo 119:27, 34.) Babaen ti panangpaliiw kadagiti nasigo a ministro, masursuro ken matuladtayo dagiti pamay-anda. Ken babaen ti regular a panangyaplikar iti nasursurotayo, mapasayaattayo dagiti abilidadtayo.—Luc. 6:40; 1 Tim. 4:13-15.
4 Ni Jehova ti Naindaklan nga Instruktortayo. Babaen ti makitkita a paset ti organisasionna, iwanwanwanna dagiti adipenna ditoy daga no kasanoda nga itungpal ti annongenda a mangasaba. (Isa. 30:20, 21) Gapuna, mangang-angay ti tunggal kongregasion iti linawas a Teokratiko nga Eskuelaan ti Panagministro, a nadisenio a mangtulong iti amin a nagpasalista nga agbalin nga epektibo a manangiwaragawag iti Pagarian ti Dios. Ti Biblia ti kangrunaan a libro daytoy nga eskuelaan. Ibaga kadatayo ti naipaltiing a Sao ni Jehova no ania ti isurotayo. Ipatuldona pay no ania dagiti epektibo ken maitutop a pamay-an ti panangisuro. Kanayon nga ipalagip ti Teokratiko nga Eskuelaan ti Panagministro nga agbalintayo a nasigsigo a mannursuro no ibataytayo iti Sao ti Dios ti isursurotayo, mangusar kadagiti epektibo a saludsod, mangisuro iti pamay-an a nalaka a maawatan, ken mangipakita iti pudno a pannakaseknan iti sabsabali. Saggaysaentayo nga usigen dagitoy a punto. Kalpasanna, pagsasaritaantayo no kasano a danonen ti puso ti iyad-adalantayo.
Ibatayyo ti Isursuroyo iti Sao ti Dios
5. Ania koma ti nakaibatayan ti isursurotayo, ken apay?
5 Kas ti katan-okan a mannursuro a nagbiag ditoy daga, imbatay ni Jesus dagiti pannursurona iti Kasuratan. (Mat. 21:13; Juan 6:45; 8:17) Saan a nangisuro a naibatay iti bukodna a kapanunotan no di ket iti kapanunotan Daydiay nangibaon kenkuana. (Juan 7:16-18) Dayta ti ulidan a surotentayo. Gapuna, naan-anay koma a naibatay iti Sao ti Dios ti isursurotayo no mangasaba wenno mangyadaltayo iti Biblia. (2 Tim. 3:16, 17) Uray kasano kalaingtayo nga agrason, mas epektibo ken nabilbileg ti naipaltiing a Kasuratan. Adda autoridad ti Biblia. Aniaman ti punto a kayattayo nga ipaawat iti estudiante, kasayaatan latta nga ipabasa kenkuana ti kunaen ti Kasuratan maipapan iti dayta.—Basaenyo ti Hebreo 4:12.
6. Kasano a masigurado ti mannursuro a natarusan ti estudiante ti ad-adalenda?
6 Dina kayat a sawen a saanen a kasapulan nga agsagana ti maysa a Kristiano no mangyadal iti Biblia. Imbes ketdi, nasaksakbay nga ikeddengna no ania kadagiti naisitar a teksto ti basaenna wenno basaen ti iyad-adalanna bayat ti panagadal. Kaaduanna, nasayaat a basaen dagiti teksto a nakaibatayan dagiti patpatientayo. Nasken met a tulonganna ti estudiante a mangtarus iti teksto a binasana.—1 Cor. 14:8, 9.
Agusar Kadagiti Epektibo a Saludsod
7. No mangisursuro, apay nga epektibo ti panagusar kadagiti saludsod?
7 Mamagpanunot ti nasigo a panangusar kadagiti saludsod ken tulonganna ti mannursuro a mangdanon iti puso ti estudiante. Isu nga imbes nga ilawlawagmo ti teksto, kiddawem iti iyad-adalam nga isu ti mangilawlawag iti dayta. No dadduma, kasapulan ti kanayonan wenno agsasaruno pay ketdi a saludsod tapno matulongam ti iyad-adalam a maaddaan iti umiso a pannakaawat. No kastoy ti pamay-am a mangisuro iti iyad-adalam, saanmo laeng a matulongan a mangtarus kadagiti rason a nakaibatayan ti maysa a sursuro no di ket magutugotmo pay a mangakseptar iti dayta a sursuro.—Mat. 17:24-26; Luc. 10:36, 37.
8. Kasanotayo a maammuan no ania ti linaon ti puso ti iyad-adalantayo?
8 Ti pamay-an ti panangadal kadagiti publikasiontayo ket babaen kadagiti saludsod ken sungbat. Awan duadua a kaaduan kadagiti iyad-adalanyo iti Biblia ti nalaka a makasungbat kadagiti nayimprinta a saludsod, nga ibatayda dayta kadagiti parapo. Ngem no kayat ti mannursuro a danonen ti puso ti iyad-adalanna, saan koma a mapnek lattan kadagiti umiso a sungbat. Kas pagarigan, mabalin a siuumiso a mailawlawag ti iyad-adalanna no ania ti panangmatmat ti Biblia iti pannakiabig. (1 Cor. 6:18) Ngem babaen ti nasigo a panangusar kadagiti saludsod, maammuanna ti kapanunotan ti estudiante maipapan iti maad-adalna. Mabalin nga iyimtuod ti mannursuro: “Apay a kondenaren ti Biblia ti panagdenna ti di agassawa? Ania ti makunam iti daytoy nga iparparit ti Dios? Panagkunam makagunggona kadi ti panangannurot kadagiti moral a pagalagadan ti Dios?” Ti sungbatna kadagita a saludsod ti mangipalgak iti linaon ti pusona.—Basaenyo ti Mateo 16:13-17.
Nalaka Koma a Maawatan
9. Ania koma ti laglagipentayo no isursurotayo dagiti kinapudno a linaon ti Biblia?
9 Gagangay a nalaka a maawatan ti kaaduan a kinapudno iti Biblia. Ngem mabalin a mariro dagiti iyad-adalantayo gapu kadagiti doktrina nga isursuro ti palso a relihion. Kas mannursuro, kayattayo a pagbalinen a nalaka a maawatan dagiti pannursuro ti Biblia. Simple, nalawag, ken umiso ti panangyallatiw dagiti nasigo a mannursuro iti impormasion. No kasta, saantay koma a pagbalinen a narikut dagiti nalaka a maawatan a kinapudno. Liklikantayo dagiti saan a kasapulan a detalye. Saan a masapul a komentuan ti amin a paset ti teksto a basaentayo. Tratarentayo laeng dagiti pasetna a manglawlawag iti maus-usig a punto. Total, in-inutto met laeng a matarusan ti iyad-adalantayo dagiti naun-uneg a kinapudno iti Biblia bayat a rumangrang-ay ti pannakaawatna.—Heb. 5:13, 14.
10. Ania ti mangikeddeng no kasano kaadu ti masaklaw a material bayat ti panagadal iti Biblia?
10 Kasano kaadu ti saklawen a material iti kada panagadal? Masapul a tingitingen a naimbag dayta. Agduduma ti abilidad ken kasasaad ti iyad-adalan ken ti mannursuro. Kaskasdi, kanayon koma a laglagipentayo a ti panggeptayo kas mannursuro ket tulongan dagiti iyad-adalantayo a maaddaan iti natibker a pammati. Gapuna, ikkantayo iti umdas a tiempo a mangbasa, mangtarus, ken mangakseptar kadagiti kinapudno a naidatag iti Sao ti Dios. Saantayo a mangsaklaw iti nakaad-adu a material a dinanto met laeng maaw-awatan. Nupay kasta, saantay met a kayat nga agbalin a nakabambannayat ti panagadal. No naawatanen ti estudiante ti punto, mapantayon iti sumaganad.—Col. 2:6, 7.
11. Ania ti maadaltayo ken apostol Pablo mainaig iti panangisuro?
11 Simple ti panangidatag ni apostol Pablo iti naimbag a damag kadagiti kabbaro. Nupay de adal, saan a nagusar kadagiti sasao a narigat a maawatan. (Basaenyo ti 1 Corinto 2:1, 2.) Makaatrakar ken makapnek kadagiti napasnek a tattao ti kinasimple dagiti Nainkasuratan a kinapudno. Saan a masapul a nakasirsirib ti maysa tapno maawatanna dayta.—Mat. 11:25; Ara. 4:13; 1 Cor. 1:26, 27.
Tulongan Dagiti Estudiante a Mangipateg iti Maad-adalda
12, 13. Ania ti mabalin a mangtignay iti estudiante a mangyaplikar iti maad-adalna? Iyilustraryo.
12 Tapno epektibo ti panangisurotayo, masapul a madanontayo ti puso ti iyad-adalantayo. Nasken a maawatanna no kasano nga agaplikar ken makagunggona kenkuana ti impormasion, ken no kasano a mapasayaat ti biagna no surotenna ti panangiwanwan ti Kasuratan.—Isa. 48:17, 18.
13 Kas pagarigan, nalabit us-usigentayo ti Hebreo 10:24, 25, a mangiparparegta kadagiti Kristiano nga aggigimongda tapno matagiragsakda ti naespirituan a pammabileg ken naayat a panaglalangen. No saan pay a makigimgimong ti estudiante, mabalin nga ikkantayo iti pamalatpatanna no kasano a maang-angay dagiti gimong ken no ania ti mapagsasaritaan sadiay. Mabalin a dakamatentayo a paset ti panagdayawtayo dagiti gimong ti kongregasion ken ipakitatayo no kasano a nagunggonaantayo a mismo. Kalpasanna, mabalin nga awisentayo ti estudiante a makigimong. Ipangagna koma ti bilin ti Kasuratan gapu ta tarigagayanna ti agtulnog ken Jehova, saan ket a gapu ta kayatna a pagustuan ti mangyad-adal kenkuana.—Gal. 6:4, 5.
14, 15. (a) Ania ti masursuro ti maysa nga agad-adal iti Biblia maipapan ken Jehova? (b) Apay a makagunggona iti agad-adal iti Biblia a maammuanna ti personalidad ti Dios?
14 Ti maysa a dakkel a magunggona ti estudiante iti panagadalna iti Biblia ken panangyaplikarna kadagiti Nainkasuratan a prinsipio ket maam-ammo ken masursurona nga ayaten ni Jehova kas maysa a persona. (Isa. 42:8) Malaksid nga Isu ti Namarsua ken Makinkukua iti uniberso ken maysa a naayat nga Ama, iyam-ammona pay ti personalidad ken abilidadna kadagidiay agayat ken agserbi kenkuana. (Basaenyo ti Exodo 34:6, 7.) Idi inruar ni Moises ti nasion ti Israel manipud Egipto, inyam-ammo ni Jehova ti bagina babaen kadagitoy a sasao: “Agbalinakto no anianto ti pagbalinak.” (Ex. 3:13-15) Dayta ti mangipamatmat a kabaelan ni Jehova ti agbalin iti aniaman a kayatna a pagbalinan tapno maitungpal ti panggepna mainaig iti pinilina nga ili. Gapuna, naam-ammo dagiti Israelita ni Jehova kas maysa a Manangisalakan, Mannakigubat, Manangipaay, Managtungpal iti karina, ken dadduma pay.—Ex. 15:2, 3; 16:2-5; Jos. 23:14.
15 Mabalin a saan a mapasaran ti iyad-adalantayo iti Biblia dagiti namilagruan a tulong ni Jehova a kas iti inaramidna idi panawen ni Moises. Nupay kasta, maparayray ti pammati ken panangipategda kadagiti maad-adalda, ken bayat nga iyaplikarda dagita, awan duadua a makitada a kasapulan nga agpannurayda ken Jehova maipaay iti tured, sirib, ken giya. No aramidenda dayta, maam-ammoda ni Jehova kas maysa a masirib ken mapagtalkan a Manangbalakad, Mannalaknib, ken naparabur a Manangipaay iti amin a kasapulanda.—Sal. 55:22; 63:7; Prov. 3:5, 6.
Mangipakita iti Naayat a Pannakaseknan
16. Apay a saan a ti kinalaing a mangisuro ti kangrunaan a mangikeddeng iti epektibo a panangisuro?
16 Dikay koma maupay no saankay a nasigo a mangisuro a kas iti kayatyo koma a pagbalinan. Ngamin, ni Jehova ken ni Jesus ti mangiwanwanwan iti programa ti panangisuro a maar-aramid iti intero a lubong ita. (Ara. 1:7, 8; Apoc. 14:6) Bendisionanda ti panagreggettayo tapno matignay ti puso dagiti nasingpet a tattao. (Juan 6:44) Nupay saantayo a nasagudayan iti laing a mangisuro, punnuan dayta ti napudno a panangipategtayo iti iyad-adalantayo. Impakita ni apostol Pablo a naawatanna ti importansia ti panangipateg kadagidiay mayad-adalan.—Basaenyo ti 1 Tesalonica 2:7, 8.
17. Kasanotayo a maipakita ti napasnek a pannakaseknan iti tunggal iyad-adalantayo iti Biblia?
17 Umasping iti dayta, maipakitatayo ti napasnek a pannakaseknan kadagiti iyad-adalantayo iti Biblia no isu ket am-ammuentayo a naimbag. Bayat nga ilawlawagtayo kenkuana dagiti prinsipio ti Biblia, mabalin a maammuantayo ti kasasaadna. Mabalin a mapaliiwtayo nga iyap-aplikarnan ti dadduma a maad-adalna iti Biblia. Iti dadduma a benneg, nalabit kasapulanna pay ti panagbalbaliw. Babaen ti panangtulong iti estudiante a mangkita no kasano nga agaplikar kenkuana dagiti maad-adalna iti Biblia, siaayat a matulongantayo nga agbalin a pudno nga adalan ni Kristo.
18. Apay a napateg a makipagkararag ken ikararagantayo ti iyad-adalantayo?
18 Kangrunaan iti amin, mabalin a makipagkararag ken ikararagantayo ti iyad-adalantayo. Nalawag koma kenkuana a ti panggeptayo ket kayattayo a matulongan a mangammo a naimbag iti Namarsua, suminged kenkuana, ken magunggonaan iti panangiwanwanna. (Basaenyo ti Salmo 25:4, 5.) No ikararagtayo a bendisionan ni Jehova ti panagreggetna a mangyaplikar iti maad-adalna, mabigbignanto a napateg ti panagbalin a “managtungpal iti sao.” (Sant. 1:22) Ken bayat nga im-imdengan ti estudiante ti napasnek a kararagtayo, masursurona met no kasano ti agkararag. Anian a rag-o ti itden ti panangtulong iti iyad-adalantayo iti Biblia a mangpatanor iti relasionna ken Jehova!
19. Ania ti mausig iti sumaganad nga artikulo?
19 Makaparagsak a maammuan a nasurok nga innem ket kagudua a milion a Saksi iti intero a lubong ti okupado a mangparparang-ay iti “arte ti panangisuro,” tapno matulonganda dagiti nasingpet-panagpuspusoda nga indibidual a mangtungpal iti amin nga imbilin ni Jesus. Ania ti naibanag ti panangasabatayo? Mausig dayta iti sumaganad nga artikulo.
Malagipyo Kadi?
• Apay a masapul a parang-ayen dagiti Kristiano ti “arte ti panangisuro”?
• Ania dagiti pamay-an a mamagbalin nga ad-adda nga epektibo ti panangisurotayo?
• Nupay saantayo a nasagudayan iti kinalaing a mangisuro, ania ti mabalin a mangringbaw iti dayta?
[Ladawan iti panid 9]
Nagpasalistakayo kadin iti Teokratiko nga Eskuelaan ti Panagministro?
[Ladawan iti panid 10]
Apay a nasaysayaat nga ipabasayo ti teksto iti iyad-adalanyo?
[Ladawan iti panid 12]
Makipagkararag ken ikararaganyo ti iyad-adalanyo