Saludsod
◼ Ania a pamay-an ti masurot no maidatag dagiti resolusion iti kongregasion?
Kasapulan ti resolusion no maaramid iti desision maipapan dagiti nasken a bambanag a kas iti pananggatang ti sanikua, panangritubar wenno panangibangon iti Kingdom Hall, panangipatulod ti espesial a kontribusion iti Sosiedad, wenno panangtaming ti gastos iti manangaywan ti sirkito. Masansan a kasayaatan no maidatag iti resolusion a maanamongan ti kada tiempo a maigasto iti pundo ti kongregasion.
Addada mailaksid a kaso a mangiraman iti espesial a kasapulan mainaig kadagiti nasken a proyekto ken aktibidad. Kas ehemplo, mabalin a maminsan laeng ti resolusion iti kongregasion maipapan ti kontribusion iti masinunuo a kantidad ti kada bulan iti Sosiedad a maipaay ti sangalubongan a trabaho wenno maipaay iti pundo ti Kingdom Hall. Kasta met, dagiti gagangay a gastos iti panagandar ti Kingdom Hall, kas iti elektrisidad ken abasto ti panagdalus, saandan a kasapulan iti resolusion.
No adda kasapulan, pagsasaritaan a naimbag dayta ti bagi dagiti panglakayen. No pagtutunosan ti mayoridad nga aramiden iti maysa a banag, maysa kadagiti panglakayen, nalabit miembro iti Komite ti Serbisio iti Kongregasion, ti mangisagana iti naisurat a resolusion a maidatag bayat iti Gimong ti Serbisio.
Ti panglakayen nga agakto kas tserman iti mangilawlawag ti ababa iti kasapulan ken no ania ti mairekomenda iti bagi dagiti panglakayen a mangtaming ti dayta. Maikkan ti kongregasion iti oportunidad nga agsaludsod ti aniaman a rumbeng a saludsod. No narikut daytoy a banag, nasaysayaat no mataktak pay laeng iti panangbotos agingga ti sumaruno a Gimong ti Serbisio tapno maipaayan iti tunggal maysa ti tiempo a mangpanunot iti dayta. Ti aktual a botos isut’ aramiden dagiti miembro ti kongregasion babaen iti panangitayagda ti imada.
Ti panangbotos iti resolusion ti limitado laeng kadagiti dedikado ken bautisado a miembro iti kongregasion. Saan a maiparbeng kadagiti bisita manipud sabali a kongregasion ti makipaset.
Kalpasan a naanamongan ti resolusion, masapul a mapetsaan, mapirmaan, ken mailugar iti pagipempenan ti kongregasion.