Agserbikayo ken Jehova nga Awan Makasinga

¹ “Naragsak ti umili a ti Diosna ni Jehova!” (Sal. 144:15) Dagitoy kadi a sasao ni Ari David ket pudno agpapan ita, uray agingga kadagitoy a dakes nga al-aldaw? (Efe. 5:16) Wen! Dagiti Kristiano ti kaskasdi a maragsakan iti panagserbi ken Jehova. Saan a kanayon a nalaka dagiti bambanag kadatayo. Patauden ni Satanas dagiti rigat kadatayo bayat dagitoy “napeggad a tiempo,” ngem kaskasdi a ditay maupay. (2 Tim. 3:1, 2) Ti kumarkaro a kasasaad isut’ kanayonan a pammatalged a tiempon a ti Pagarian ti Dios ket walisanna daytoy agrakrakaya a daan a lubong ket suktanna iti nadalus a baro a lubong. (2 Ped. 3:13) Ti sipnget daytoy lubong saanna a maiddep iti apuy ti naragsak a namnamatayo; imbes, ti namnama ti Pagarian ket agraniag a sirarayray. Saankayo kadi a maragsakan nga agserbi ken Jehova kas silsilaw iti daytoy nasipnget a lubong?​—Fil. 2:15.

² Kas indibidual, masapul a naridamtayo nga agsiput no kasano ti panagserbitayo ken Jehova. Apay? Agsipud ta ni Satanas isut’ dakkel a Manangsinga. Maysa a diksionario ti nangdepinar iti “panangsinga” a kas “mangibaw-ing,” “guyoden wenno iturong (ti asikaso) iti sabali a panggep wenno naiduma a direksion iti isu met laeng a tiempo,” ken “paglagawen wenno riribuken babaen iti agsasamusam a rikna wenno motibo.” Manipud pay naigarangugong ditoy daga, nagballigi ni Satanas a “mangiyaw-awan” iti sangatauan. Mangaramat iti nagduduma a kagawaan tapno kiburenna ti asikaso dagiti tattao manipud iti pudno nga isyu kadagitoy aldawtayo. (Apoc. 12:9) Nupay inkagumaan dagiti Saksi ni Jehova nga inkasaba ti Pagarian iti naglabas a sangagasut a tawen, mano a tattao ti nangipateg iti kaskenan nga isyu ti panakasantipikar iti nagan ti Dios ken panakaalangon ti soberaniana babaen iti Pagarianna? Bassit laeng. (1 Juan 5:19) No naibaw-ing ni Satanas dagiti binilion a tattao ditoy daga, ti agdama a peggad isut’ pannakabaelna met a singaen wenno kayawan iti asikasotayo tapno pagpanawan iti serbisio ni Jehova. Makapaldaang, dadduma a kakabsat ti natikaw babaen iti panangulaw ni Satanas. Pinalubosanda ti panunotda a naallukoy iti nagduduma a direksion. Nagduduma dagiti pakalapdan ita. Usigentayo ti sumagmamano kadakuada.

³ Problema ti Ekonomia ken Ayat iti Material a Bambanag: Kadduan a pagilian ditoy daga, ti kaawan panggedan ken kangina iti gagatangen a pagbiag ti mamataud iti panaglagaw. Pudno, masapul nga ipaayan ti taraon, kawes, ken paglinongan iti bagi ken pamiliatayo. Ngem no palubosan ti bagbagitayo a madanagan unay maipapan iti kasapulan ti panagbiag, daytoy a pakaseknan ti mangdominar iti panunottayo. Ti pisikal a pannakailasattayo ti mabalin nga isut’ kaskenan a banag iti biag imbes a ti panangsuportar iti isyu ti Pagarian. Nangted ni apostol Pablo ti balakad iti daytoy a banag idiay Hebreo 13:5, 6. Impanamnama ni Kristo Jesus kadatayo a dagidiay mangsapul nga umuna iti Pagarian ti saan nga agdanag; ipaay ni Jehova no ania ti pudno a kasapulan. (Mat. 5:25-34) Dagiti payunir ken dadduma pay nga amin-a-tiempo nga ad-adipen iti intero a lubong ti mangpatalged a pudno daytoy.

⁴ Itandudo daytoy lubong ni Satanas ti ayat kadagiti material a bambanag. Ti panagurnong iti adu a sanikua ken panangidanag kadakuada isut’ nabileg a puersa iti biag dagiti minilion. Dagiti kaasping a pakasikoran ti adda met idi aldaw ni Jesus. Maysa a nabaknang nga agtutubo nga agturay ti nagsaludsod ken Jesus no ania iti kasapulanna tapno matawidna ti agnanayon a biag. Simmungbat ni Jesus: “No kayatmo ti agbalin a naan-anay [wenno kompleto], inka ilako dagiti sanikuam ket itedmo kadagiti napanglaw ket maaddaankanto iti gameng idiay langit, ket umayka agbalinka a pasurotko.” (Mat. 19:16-23) Nabatad, dagiti nawadwad a material a sanikuana ti nangsinga iti daytoy nga agtutubo a tao manipud ti panagserbina iti Dios a buyogen ti amin-a-kararua. Ti pusona ti naiturong iti kinabaknangna. Ammo ni Jesus a daytoy nga agtutubo a tao ket magunggonaan koma no palag-ananna ti bagina manipud kadagitoy a pakasingaan. Dagitoy ti nanglapped kenkuana manipud kinakompleto iti debosionna ti Dios. Kasanoka met? Madlawmo aya iti bagim nga ad-adu ti mausarmo a tiempo iti sekular a panggedan tapno mataginayonmo iti istilo ti biag a nakairuamam? Daytoy kadi ti nangapektar iti serbisiom ken Jehova? Dagiti aya material a sanikuam ti nangleppes iti intereses ti Pagarian? (Mat. 6:24) Mabalinmo kadi a mapasimple ti biagmo tapno maipaaymo iti ad-adu a tiempo kadagiti espiritual a paginteresan?

⁵ Dagiti Gagangay a Bambanag iti Inaldaw a Biag: No ditay agannad, magaburantayo kadagiti gagangay laeng a bambanag iti biag ket rugiantayon a liwayan dagiti espiritual a pagrebbengan. Laglagipenyo dagiti tattao idi aldaw ni Noe. Kupadoda kadagiti sosial a bambanag, pannangan ken panaginum, panangasawa ken panangiyasawa iti annakda, ket saanda nga inkankano iti pakdaar a mensahe ni Noe maipapan ti mapasungad a Delubio. Sakbay nga agbalawda, ti Layus isut’ nangiyanud kadakuada. Dagiti pakasingaan ti nagbanag a nakadadaelanda. Kuna ni Jesus: “Kastanto ti kaadda ti anak ti tao.” (Mat. 24:37-39) Agpayso, kaaduan kadagiti tattao ita ti makumikom iti bukodda a panagbiag tapno asikasuenda koma iti pakdaar a mensahe nga iyegtayo kadakuada. Ipakitada ti makadismaya a di panangipirpirit kadagiti espiritual a bambanag.

⁶ Ti kadi panagbiagyo ket naremmengan kadagiti sosial nga aktibidad a dagiti espiritual a bambanag ket saanen a masango? Iti maysa nga okasion, inawis ni Jesus dagiti sangaili idiay balay da Marta ken Maria. Sipipinget ni Maria a dimngeg no ania ti sawenna. Iti sabali a bangir, ni Marta ket “nasinga iti panangasikaso kadagiti adu nga annongen.” Maseknan unay ni Marta maipapan iti panagbalin a naimbag a manangaili. Napaay a mangipateg iti kasapulan a mangitiempo a dumngeg ken Jesus. Siaanus nga intudo ni Jesus ken Marta a ti nalabor a sagana ket saan a nasken; a ti ad-adu nga asikaso ti maited iti espiritual a bambanag. Kasapulanyo kadi nga iyaplikar dayta a pammagbaga? (Luc. 10:38-42) Impakdaar met ni Jesus a masapul a saluadan ti bagbagitayo tapno ditay sumubra a mangan ken uminum, a dayta ti mangbibineg iti sentidotayo. Iti daytoy napeggad nga oras iti natauan a historia, masapultayo ti naan-anay a panagridam.​—Luc. 21:34-36.

⁷ Pannakaisagmak iti Ragragsak: Maysa kadagiti kadakkelan a makasinga nga usaren ti Diablo tapno maiyadayona ti asikaso manipud iti isyu ti Pagarian isut’ pannakaisagmak iti ragragsak. Minilion iti Kakristianuan ti nangisaad iti ragragsak iti lugar ti Dios. Kaykayatda ti maray-aw iti pagraragsakan ngem ti serioso a panaginteres iti Sao ti Dios. (2 Tim. 3:4) Siempre, ti makabang-ar a panagliwliwa ken panaglinglingay ket awan pagdaksanda. Ngem ti panangibus iti tiempo ti kada lawas kadagiti bambanag kas iti telebision, pelikula, video, ay-ayam, panagbasa ti nobela, wenno aniaman a pagay-ayatan ti mabalin a mangipalubos iti nasikap a puso a mamatanor ken mangguyod kadatayo nga umadayo ken Jehova. (Jer. 17:9; Heb. 3:12) Kasano a mapasamak dayta? Bayat dagiti Kristiano a gimgimong, nalabit nga agalla-alla ti panunotyo; mabalin a kayatyo payen a malpas ti gimong tapno mapankayon kadagiti pagragsakanyo. Di agbayag, masarakanyo ti bagbagiyo a bumirok iti pambar nga agbati iti balay imbes a tumabuno iti gimong wenno makipaset iti tay-ak ti serbisio. Itan ti tiempo nga ikeddeng a sibabatad no dagitoy a pagragsakan ti makasinga iti biagyo. (Luc. 8:14) Saan kadi a dadduma kadagiti orasyo a maiyibus iti pagliwliwaan ket nasaysayaat koma a mausar iti espiritual a panagrang-ay?

⁸ Pagpalnedan-ti-Oras a Nagduduma nga Isyu: Naallukoy dagiti dadduma iti ranta a solbaren dagiti komon a problema ti moderno a sosiedad. Masapul a liklikan dagiti Kristiano ti pannakiraman kadagiti awan patinggana a debate ditoy lubong maipapan iti sosial nga isyu wenno awan kaeskanna a panaggarasugas a mangrupir iti di kinahustisia. (Juan 17:16) Amin dagitoy ti paset iti disenio ni Satanas a mangibaw-ing ti asikaso manipud iti balakad ti Biblia ken ti punganay a kinapudno a maymaysa laeng iti manayon a solusion​—ti Pagarian ti Dios. No nagsagabatayo iti personal a ranggas wenno di kinahustisia, agannadtayo a maibusor iti emosion a panagpungtot wenno panagibales a malipatantayo a datayo ket ​—Saksi ni Jehova. Iti ringbaw ti amin, ni Jehova iti nagbasolanda, ket ti naganna ti santipikarentayo.​—Isa. 43:10-12; Mat. 6:9.

⁹ Bayat a tunggal maysa ket kayatna a salimetmetan iti rukod ti naimbag a salun-at, ti subra nga asikaso iti awan patinggana a teoria ken remedio a maitukon ti mangigubet iti maysa a tao kadagiti bambanag ti salun-at. Adu a tattao ti mangitandudo iti nagdudumna a kita ti dieta, panangagas, ken terapia kadagiti pisikal ken emosional a problema, nga adu kadagitoy ti agaangat. No ania ti aramiden ti maysa a tao maipapan iti salun-at isut’ personal a desision, ngem saanyo a palubosan ti tiempo ken asikasoyo a maagaw kadagita nga ar-aramid a mangpalamiis ti regtayo a mangikasaba iti Pagarian ti Dios kas kakaisuna a remedio iti saksakit ti sangatauan.​—Isa. 33:24; Apoc. 21:3, 4.

¹⁰ Bumilegkayo, Di Maisin: Bayat nga umadani ti panungpalan, paaduen ni Satanas ti pamuspusan a mangsinga kadakayo manipud iti serbisioyo ken Jehova. “Ngem agtakderkayo a bumusor kenkuana, natibker iti pammati.” (1 Ped. 5:9) Kasano? Masapul a taraonanyo ti bagiyo iti panunot ti Dios. (Mat. 4:4) Dikay ipalubos dagiti pakasingaan ditoy lubong a mangipaidam kadakayo ken ti pamiliayo iti tiempo a kasapulanyo nga agutob ken mangiyaninag a siuulimek iti Sao ti Dios. Iti pannangan ti pamilia, pagsasaritaanyo a sangsangkamaysa dagiti makapabileg a kapadasan ken espiritual a bambanag. Agintekkayo iti maiparbeng nga iskediol iti personal a panagadal ken panagsagana a maipaay ti gimong.

¹¹ No dagiti pakasikoran ket pagdanagenna ti nakemyo, ipaawityo ken Jehova ti dadagsenyo babaen iti kararag. Masiguroyo a taripatuennakayo. (1 Ped. 5:7) Palubosanyo iti talna ti Dios a mangsaluad iti puso ken bilegyo nga agpanunot. (Fil. 4:6, 7) Dikay ipalubos dagiti pakasingaan a mangpalidem ti espiritual a panagkitayo. Isaadyo ni Jehova a kanayon iti saklangyo, kas inaramid ni Jesus. (Ara. 2:25) Iturongyo ti panagkitayo a diretso iti masanguanan a kalatyo, kas imparegta ti Proverbio 4:25-27 kadatayo: “No maipapan kadagita matam, kumitada kadi nga aglinteg laeng, wen, ket dagita kalub ti matam sililinteg kadi ti turongda dita sanguanam. Palanasem ti pagnaan dagita saksakam, ket dagiti amin a daldalanmo ket nasimpada koma. Dika sumiasi iti makanawan wenno iti makatigid.”

¹² Simamatalekka a tumabuno iti amin a gimong, ket disiplinaem ta bagim tapno maipaaymo ti asikasom iti panangiwanwan manipud iti Sao ti Dios. (Heb. 2:1; 10:24, 25) Ket imbes a kumitaka iti ragragsak nga itukon daytoy agpakpakadan a lubong, aramidem a kalat a salimetmetam iti nabunga a ministerio. Daytoy ti mangyeg iti manayon a rag-o ken pannakapnek. (1 Tes. 2:19, 20) Kamaudiananna, dikay palubosan iti aniaman a banag wenno asinoman a tao a mangsinga kadakayo manipud iti sagrado a serbisioyo. “Iti kasta, dungdunguek a kakabsat, agbalinkayo a natibker, di magaraw, a kankanayon nga aduankayo ti aramiden iti trabaho ti Apo, nga ammoyo a ti panagbannogyo saan nga ubbaw mainaig iti Apo.” ​—1 Cor. 15:58.