Siririingtayo Kadi—A Mangliklik Kadagiti Pakasingaan?
1 Iti Lucas 21:36, namakdaar ni Jesus: “Agtalinaedkayo a siririing, . . . tapno makapagballigikayo iti pananglisi” kadagiti kalamidad a sigurado a dumteng. Ti didigra agur-uray kadagidiay mangitulok nga agdungsa iti naespirituan. Dinakamat ni Jesus ti pannangan, panaginum, ken dagiti pakaringgoran iti inaldaw a panagbiag. Apay? Gapu ta dagitoy a bambanag ti mabalin a mangsinga, ken mangiturong iti napeggad a naespirituan a panagdungsa.
2 Dagiti Gagangay a Pakasingaan: Adda dadduma nga okupado unay iti nalabes a panaglinglingay, a nagbalindan nga adikto iti TV. Siempre, ti panangsapul nga umuna iti Pagarian saanna a kayat a sawen nga idiantay dagiti amin a porma ti panaglinglingay. No usarentay ti kinatimbeng, ti panaglinglingay ket makagunggona. (Idilig iti 1 Timoteo 4:8.) Ngem pakasingaan no ipangpangruna dayta iti biag, a mangagaw ti tiempotayo, sanikua, wenno ti pannakiramantay iti panangikasaba iti Pagarian.
3 Ti sabali pay a gagangay a pakasingaan isu ti panagtarigagay kadagiti saan a nasken a material a bambanag. Napukaw ti dadduma dagiti naespirituan a kalatda babaen ti pannakaigubetda iti pananggun-od iti material a sanikua tapno maragpatda ti nanamnam-ay a wagas ti panagbiag. Bayat a kasapulantay ti “pagtaraon ken pagkawestayo,” masapul nga agaluadtayo iti itatanor ti panagayat iti kuarta. (1 Tim. 6:8-10) No ditay maipamaysa dagiti matatayo kadagiti interes ti Pagarian, mabalin a bumaaw ti panangtamingtayo kadagiti naespirituan a kasapulan ti pamiliatayo ket ditay mairingpas ti ministeriotayo.—1 Tim. 5:8; 2 Tim. 4:5.
4 Kaskasdi a palubosan dagiti dadduma ti ‘puspusoda a madagsenan kadagiti pakaringgoran iti biag.’ (Luc. 21:34) No dadduma, agdandanagtayo gapu iti problema ti salun-at wenno iti pamilia. Ngem masapul a saan a palubosan ti kasta a personal a pakaseknan a mangkissay iti kinaridamtayo iti napardas nga iyaay ti panungpalan daytoy sistema dagiti bambanag.—Mar. 13:33.
5 Awan ti ad-adda a pagragsakan ti Diablo no di ti panagballigina a mamagdungsa kadatayo. Ammotayo a ti ‘aldaw ni Jehova ket umay a kas mannanakaw,’ gapuna a nasken nga “agtalinaedtayo koma a siririing ket sipupuottayo.” (1 Tes. 5:2, 6) No madlawtay nga agdungsatayo, dagus nga “ikkatentayo ngarud dagiti ar-aramid a kukua ti kinasipnget.”—Roma 13:11-13.
6 Katulongan a Mamagtalinaed Kadatayo a Siririing: Nasken ti panagkararag. Agkararagtayo koma a di agressat. (1 Tes. 5:17) Ti kinasinged iti Nakristianuan a kongregasion isut’ ‘manggutugot kadatayo iti ayat ken nasayaat nga ar-aramid.’ (Heb. 10:24) Ti naimbag nga ugali iti panagadal ti mangtaginayon kadatayo a “nataraonan kadagiti sasao ti pammati.” (1 Tim. 4:6) No nagagettayo, makapagtalektayo a maliklikan dagiti pakasingaan, ‘agtalinaed a siririing, ken makapagtakder a natibker iti pammati.’—1 Cor. 16:13.