Dagiti Wagas a Mangparang-ay iti Panangikasabatayo ti Pagarian
1 Nagangganat itan ti trabahotayo a panangasaba ngem iti kaanoman. Ti panagbiag wenno ipapatayto ti tattao ket agpannuray iti panangawatda iti naimbag a damag. (1 Ped. 4:5, 6, 17; Apoc. 14:6, 7) Masapul ngarud a kanayon nga ikagumaantay a parang-ayen ti panangikasabatayo iti Pagarian. Ania ti sumagmamano a wagas tapno maparang-ay?
2 Naimbag a Panagsagana: No usarenyo ti agdama a ruar Ti Ministeriotayo iti Pagarian, pilienyo ti presentasion a makaawis kadagiti tattao iti teritoriayo. Wenno nalabit kayatyo ti mangisagana iti bukodyo a presentasion, nga usarenyo dagiti Kasuratan nga ammoyo nga epektibo. Masapulyo ti makaabbukay-interes nga introduksion. (Kitaenyo ti libro a Panakirinnason, pinanid 9-15.) Nalabit kayatyo a pagsaludsodan wenno pagkomentuen ti bumalay iti lokal a damdamag. No napanunotyon ti presentasionyo, ensayuen a kadua ti maysa a kameng ti pamilia wenno iti sabali nga agibumbunannag a makaited kadakayo kadagiti makaparang-ay a singasing.
3 Makisarita iti Tattao: Ti panggeptayo isut’ panangidanon ti napateg a mensahe. Maaramidan daytoy babaen ti pannakisarita iti tattao. No sumupiat wenno agkomento ti bumalay, denggenyo a naimbag ti ibagana. Makatulongto ti komentona iti panangitedyo ti Nainkasuratan a sungbat. (1 Ped. 3:15) No saan a maitunos ti panangmatmatna iti Biblia, mabalinyo a kunaen: “Adu a tattao ti addaan iti kas iti riknayo. Ngem, adtoy ti sabali a panangmatmat iti tema.” Kalpasanna, basaenyo ti maitutop a teksto, sayo pagkomentuen.
4 Maaddaan iti Eskediol a Nalaka nga Itunos: Bassitto ti pateg ti naimbag a panagsagana no dikay maisao kadagiti tao. Addada luglugar ita a sumagmamano laeng a bumalay ti adda iti balayda no mapantayo. No kasta ti teritoriayo, padasenyo nga itunos ti eskediolyo tapno ad-adu a tao ti madanonyo no mapankayo. Nalabit ti kasayaatan nga isasarungkar isut’ ngudo ti lawas; mabalin a nalaklaka a kasarita ti dadduma iti sardam. Kaaduanna agin-inaná ti tattao ken kaykayatda ti makisarita kadagita a panawen.
5 Usigen no Epektibo ti Presentasionyo: Kalpasan a panawanyo ti tunggal balay, saludsodanyo ti bagiyo: ‘Nadanonko ngata ti puso ti bumalay? Pinaregtak aya nga agsao ket inimdengak ti nakunana? Nataktika aya a sinungbatak? Inusarko aya ti kasayaatan a pannakisarita?’ Nalabit makatulong ti pannakikadua iti aduan-kapadasan nga agibumbunannag wenno maysa a payunir sagpaminsan ket siaannad a denggen ti presentasionna tapno maparang-ay ti kinaepektiboyo iti ministerio.
6 No nasigokay iti trabahoyo, maiburayyonto dagiti kinapudno ti Pagarian ket ‘maisalakanyonto agpadpada ti bagiyo ken dagidiay agimdeng kadakayo.’—1 Tim. 4:16; Prov. 22:29.