Ania a Kita ti Espiritu ti Ipakpakitayo?
1 Ginibusan ni Pablo ti suratna iti kongregasion ti Filipos iti daytoy a pammabileg: “Ti di kaikarian a kinamanangaasi ni Apo Jesu-Kristo maadda koma iti espiritu nga ipakpakitayo.” (Fil. 4:23) Kinomendaranna ida gapu iti napudno nga interesda iti panangikasaba ti naimbag a damag kasta met iti kinabara, naayat a pannakaseknanda agpaay iti paglaingan ti maysa ken maysa.—Fil. 1:3-5; 4:15, 16.
2 Tarigagayantay koma nga ipakita ti umasping nga espiritu iti kongregasiontayo. No amin agregta, aganus, ken managpadagus, daytoy patanorenna ti espiritu a nakadidillaw kadagiti managpaliiw. Ti positibo ken naayat nga espiritu yegna ti panagkaykaysa ken espiritual a panagrang-ay. (1 Cor. 1:10) Ti negatibo nga espiritu pataudenna ti pannakaupay ken kinaaleng-aleng.—Apoc. 3:15, 16.
3 Yun-una Dagiti Panglakayen: Responsabilidad dagiti panglakayen a pagtalinaeden ti nasayaat, positibo nga espiritu iti bagbagida ken iti uneg ti kongregasionda. Apay? Agsipud ta makaimpluensia iti kongregasion ti kababalin ken ug-ugalida. Apresiarentayo ti kaadda dagiti panglakayen a naregta iti tay-ak ti serbisio, a mangkablaaw kadatayo iti nasam-it nga isem ken naanus a sasao, sa positibo ken makapabileg ti balakadda, pribado man daytoy wenno manipud iti plataporma.—Heb. 13:7.
4 Rebbengna, a makiramantay amin a mamagbalin ti kongregasion a mannakigayyem, managpadagus, naregta, ken maseknan iti naespirituan. Kas indibidual, maipariknatay ti bara ken ayat iti intay pannakilangen iti sabsabali. (1 Cor. 16:14) Awan koma ti panaglalasin no iti edad, pulí, edukasion, wenno kasasaad iti biag kadatayo. (Idiligyo ti Efeso 2:21.) Gapu iti namnamatayo, maisilnagtayo ti espiritu ti rag-o, naparabur a panagpadagus, ken regta iti ministerio.—Rom. 12:13; Col. 3:22, 23.
5 Maiparikna koma kadagiti amin a maitimpuyog kadatayo, agraman kabbaro, a maawatda ken madlawda ti ayat ken debosion iti panagkakabsat. Babaen ti ministeriotayo ken ti panangiparangarang kadagiti nasayaat a Nakristianuan a kualidad, mapaneknekantayo a ti kongregasion ket “maysa nga adigi ken sadiri ti kinapudno.” (1 Tim. 3:15) Mapadasantay met “ti talna ti Dios” a mangaywan iti puspuso ken pannakabalin ti isiptayo. (Fil. 4:6, 7) Sapay koma ta ikagumaantay amin ti mangipakita a siaanus iti kita ti espiritu a mangipanamnamanto kadatayo iti di kaikarian a kinamanangaasi ni Jehova babaen ken Apo Jesu-Kristo.—2 Tim. 4:22.