Awisen ti Sabsabali a Sumurot iti Katan-okan a Tao
1 Idiay Mateo 5:14, imbaga ni Jesus kadagiti adalanna: “Dakayo ti silaw ti lubong.” Masapul nga ibaga dagiti pasurot ni Jesus iti tattao iti amin a lugar maipapan ti naayat a sagana ni Jehova maipaay iti pannakaisalakan babaen ken Jesus. Bayat a pampanunotentay dayta, iti Disiembre, iliwentayo nga itukon ti libro a Ti Katan-okan a Tao a Nagbiag Pay Laeng. Adtoy ti sumagmamano a singasing a nalabit kayatyo nga usaren.
2 Kalpasan ti pannakiam-ammoyo, mabalinyo a kunaen:
◼ “Adut’ mangpattapatta no ania ngatat’ kinatao ni Jesus idi nagbiag a kas tao ditoy daga. Kadagiti ania a wagas ti pagarupyo a nakaidumaanna iti sabsabali? [Palubosan a sumungbat.] Ilawlawag daytoy libro a Ti Katan-okan a Tao a Nagbiag Pay Laeng, ti biag ken ministeriona, ken ilawlawagna no ania a kita ti tao idi [ni Jesus]. Kalpasan a mabasada dayta, ibilang dagiti dadduma a kas man la naaddaanda iti gundaway a makilangen a personal kenkuana.” Ipakitayo ti umuna nga ilustrasion iti libro. Kalpasanna mapankayo iti introduksion, sayo basaen ti maikadua a parapo iti baba ti sub-tema a “Magunggonaan Babaen ti Panangammo Kenkuana.” Itukon ti libro.
3 Wenno mabalinyo a kunaen ti kastoy:
◼ “Iti daytoy a panawen pampanunoten ti tattao ti maipapan ken Jesus. Nupay kasta, gapu iti nagkaadu a dakes a bambanag a mapaspasamak iti intero a lubong, agduadua dagiti dadduma no pudpudno a maseknan ni Jesus kadatayo. Aniat’ riknayo maipapan iti dayta?” Palubosanyo a sumungbat. Ukagenyo ti kapitulo 24 ti libro a Katan-okan a Tao, sayo salaysayen iti apagbiit no apay nga immay ni Jesus ditoy daga. Kalpasanna basaen ti Juan 15:13, nga ipaganetget ti napasnek a panagayat ni Jesus iti sabsabali. Itukonyo dagiti kabaruan a magasin, maysa a broshur, wenno maysa a tract no dida awaten ti libro.
4 Adtoy ti sabali pay a singasing:
◼ “Kaaduan nga agtutubo agbirbirokda iti modelo a tuladen, ngem narigat a sapulen ti nasasayaat. Nangisaad ni Jesu-Kristo iti perpekto nga ulidan para iti tunggal maysa. [Basaen ti 1 Pedro 2:21.] Naipamaysa idi ti intero a biagna iti panagdayaw iti nailangitan nga Amana. Ti pagarupyo, ania ngatat’ kasasaad no ad-adu a tao ti mangikagumaan nga agbalin a kas kenkuana?” Palubosanyo a sumungbat. Ilawlawagyo no kasano a matulongannatay amin ti libro a Katan-okan a Tao nga agbalin a nasaysayaat a Kristiano.
5 Nalabit kayatyo nga usaren daytoy:
◼ “No adda mangdakamat ken Jesu-Kristo, adu a tattao ti mangipagarup nga isu ket maysa nga ubing wenno maysa nga agsagsagaba a tao a ngangnganin matay. Ti ammoda maipapan ken Jesus ramanenna laeng ti pannakaipasngay ken ipapatayna. Idinto ta ti naaramidan ni Jesus bayat ti panagbiagna ket apektaranna ti tunggal tao iti rabaw ti daga. Dayta ti gapuna no apay a napateg nga adalentay ti inggat’ kabaelantayo maipapan kadagiti nakaskasdaaw a banag nga inaramidna gapu kadatayo.” Basaenyo ti Juan 17:3. Ukagenyo ti umuna a panid ti introduksion ti libro a Katan-okan a Tao, sayo basaen ti maikapat a parapo. Ilawlawagyo no kasano a magun-odan ti libro ken usaren iti personal a panagadal.
6 Siguraduenyo ti mangsalimetmet iti rekord dagiti interesado tapno adda sarungkaranyo. Regtaantay a tulongan dagiti nasingpet ti panagpuspusona a tao nga agbalin a pasurot ti Manangisalakantayo, ni Jesu-Kristo.—Mat. 16:24.