Tignayen Ida nga Agbalin a Pasurotna
1 Idiay 1 Corinto 3:6, nagsurat ni Pablo: “Nagmulaak, ni Apolos ti nagsibug, ngem intultuloy ti Dios a padpadakkelen dayta.” Tultulongan ditoy ni Pablo dagiti kakabsatna a mangapresiar iti pasetda iti trabaho a panagmula ken panagsibug.
2 Aggibus dayta mangisalakan-biag a trabaho iti kaaldawantayo. Kas dedikado a Kristiano, responsabilidadtayo a tulongan ti sabsabali nga agbalin a pasurot ni Jesus. (Ara. 13:48) Kasanontot’ panangsarungkaryo iti nasarakanyo nga interesado no usarenyo ti libro a Ti Katan-okan a Tao a Nagbiag Pay Laeng?
3 No mapanyo sarungkaran ti tao a napaimaanyo ti libro, mabalinyo a kunaen:
◼ “Idi naudi a panagsaotayo, naibatik kadakayo ti libro a Ti Katan-okan a Tao a Nagbiag Pay Laeng. Ania kadit’ kangrunaan a nakatignay kadakayo maipapan iti panangisuro ken personalidad ni Jesus?” Bay-anyo a sumungbat. Ukagenyo ti kapitulo 113, sayo salaysayen ti nakaskasdaaw nga ulidan ni Jesus iti kinapakumbaba. Itukon ti panagsubli tapno yadal ti ad-adu pay iti dayta a banag.
4 Nalabit kaykayatyo daytoy nga introduksion:
◼ “Nagsaritaantay idi dagiti bambanag nga inaramid ni Jesus bayat nga adda ditoy daga a mangipakita a pudno a maseknan kadatayo. Ania ngatat’ pagarupyo nga aramidennanto iti kamaudianan tapno mabang-aran dagidiay napalalon ti panagsagabada?” Bay-anyo a sumungbat. Ukagenyo ti kapitulo 133, sayo basaen dagiti punto iti maikalima a parapo. Ukradenyo iti ladawan iti sumaruno a panid a mangipakita no aniantot’ kasasaad inton maaramid ti pagayatan ti Dios ditoy daga. Itukon ti panagsubli a maipaay iti ad-adu pay panagsasarita.
5 No kurang ti interes idi damo a maitukon ti libro, nalabit mabalinyo a rugian ti panagpatangyo iti kastoy:
◼ “Tultuladen ti adu a tattao itatta dagiti matmatmatanda a kas modelo. Ni Jesu-Kristo ti kasasayaatan a modelo ti siasinoman. Kayatko nga iraman kadakayo ti maysa a napateg a leksion a naadalko iti ulidan ni Jesus. [Ukagen ti kapitulo 40 iti libro a Katan-okan a Tao, sa iturong iti inyadal ni Jesus maipapan iti asi.] Pinalagipannak daytoy no kasano a masapul nga idemostrak daytoy a kualidad iti sabsabali.” Basaenyo ti Mateo 5:7. Itukon ti libro no adda makita nga interes.
6 Wenno nalabit kayatyo a padasen daytoy direkta a yaasideg:
◼ “Idi maudi a kaaddak ditoy, nagsaritaantayo ti kinapateg ti pananggun-od ti pannakaammo maipapan ken Jesus. Kuna ti Juan 17:3 a ti pananggun-od iti pannakaammo iti dayta ‘kaipapananna ti agnanayon a biag.’ Kasanotay ngata nga aramiden dayta?” Bay-an a sumungbat. Ituloyyo babaen ti panangilawlawagyo ti urnostayo iti panagadal ti Biblia.
7 Kuna ni Pablo a ti agani “awatennanto ti bukodna a gunggona sigun iti bukodna a panagbannog.” (1 Cor. 3:8) No igaedtay a tulongan ti sabsabali nga agbalin a pasurot ni Jesus, dakkelto ti gunggonatayo.