Ti Sao ti Pagarian—Panangala ti Kababagasna
1 Iti pangngarigna maipapan ti managmula, nakuna ni Jesus a ti bin-i a nagdisso “iti nasayaat a daga” iladawanna “daydiay dumdumngeg iti sao ket maal-alana ti kababagasna.” (Mat. 13:23) Kalpasan a nangngegan maipapan iti Pagarian, naalatayo met laeng “ti kababagasna”? Ilugartayo kadi nga umuna dagiti interes ti Pagarian, iti kasta maipakita a naalatayo ti kababagas ti damag?
2 Ti umiso a pannakaawat iti damag ti Pagarian kasapulanna ti personal a panagadal. Kasapulantayo ti panangitiempo nga agutob iti naipaay a naespirituan a taraon. Ti naapura a panagbasa Ti Pagwanawanan ket umasping ti panangalimon iti naraman ken naimas a taraon. Tapno magunggonaan a naimbag, masapul nga adda panaggartem ken nasalun-at a naespirituan a ganas. No awan dagitoy, dagiti sabali nga aktibidad ti mangkissay iti gunggona ti personal a panagadal wenno ibusenna ti oras a kasapulan iti dayta. Ti panagintek iti nasayaat nga iskediul ti panagadal ket saan a nalaka, ngem ti espiritual a kinabaknang a magun-odan ket saan a magatadan.—Prov. 3:13-18; Col. 1:27.
3 Daydiay Panangsukimat Kadagiti Kasuratan ti tumulong kadatayo iti kada aldaw a mangsango a positibo, kadagiti makapabileg a kapanunotan maipapan ti Pagarian. Dagidiay a “sipapanunot iti naespirituan a kasapulanda” iplanoda ti mangala iti sumagmamano a minutos ti kada aldaw a mangbasa iti teksto ken komento. (Mat. 5:3) Adu a teksto ti mangilawlawag iti nagduduma a langa ti Pagarian. Kas ehemplo, iti Nobiembre 22, 1994, ti teksto dinakamatna iti Mateo 13:4. Inlawlawag ti komento iti namnama ti Pagarian ken impalagipna kadatayo dagiti peggad ti dakes a pannakikuykuyog kadagiti kabagian ken kaarruba. Ti kinapudno a kadagiti pagtaengan a Bethel iti sangalubongan, ket adda 15-minutos a diskusion iti inaldaw a teksto ti kada agsapa isut’ mangigunamgunam iti gunggona ken kaserioso iti panangusig ti teksto iti aldaw a sangsangkamaysa. Iramraman aya ti pamiliayo iti umasping a panangusig iti inaldaw a rutinayo?
4 Bayat a dumegdeg ti panangipategyo iti Pagarian, adda dakdakkel a pamkuatan a mangiranud iti damag ti Pagarian kadagiti dadduma. Ti Pagwanawanan ken Agriingkayo! tumulongda kadatayo a naridam no kasano a dakkel ti panagkasapulan daytoy lubong iti Pagarian ti Dios. Tumulongda kadatayo nga agbalin a naespirituan a tattao, nga “addaantayo iti panunot ni Kristo.” (1 Cor. 2:15, 16) Amin dagitoy ti mangparang-ay iti regtatayo a mangiraman iti namnama ti Pagarian iti sabsabali.—1 Ped. 3:15.
5 Nasken unay a maalatayo a personal ti kababagas iti damag ti Pagarian. Ti Pagarian isut’ kangrunaan a tema ti Biblia. Isut’ pamay-an ti Dios nga usarenna a mamagpatingga iti kinadakes ken mangyeg iti baro a lubong. Imbilin ni Jesus kadatayo nga ilugartayo nga umuna daytoy iti biagtayo. (Mat. 6:10, 33) Alaenyo a naan-anay ti gundawayyo a mangsagrap kadagiti bendisionna.