Sarunuenyo ti Interes a Nasarakanyo
1 No agbalaybalaytayo, limitado laeng ti tiempo a mausartayo iti maysa nga interesado a tao. Ti pudno a panangisuro a trabaho ti maaramid no agsarungkartayo ken maidaulo iti panagadal ti Biblia. (Mat. 28:19, 20) Tapno epektibo ti panangisuro no agsarungkartayo, kasapulan a repasuen no ania ti mapagsaritaan iti umuna a sarungkar sa mapaadu daytoy.
2 No nagsaokayo maipapan ti saan a kinatalna iti urnos ti pamilia, mabalinyo nga usaren ti kapitulo 29 iti “Agbiag nga Agnanayon” a libro. Mabalinyo a kunaen:
◼ “Iti napalabas nagsaotayo maipapan ti kinasirib iti panangsurot ti balakad iti Biblia tapno maadda ti naragsak a pamilia. Ania ti mariknayo a tulbek iti nagkaykaysa a pamilia kadagitoy nga aldaw?” Palubosan a sumungbat. Iturong iti parapo 27 idiay panid 247, sa mabasa ti Colosas 3:12-14. Mailawlawag no kasano a ti regular a panagadal iti Agbiag nga Agnanayon a libro ket makasolbar kadagiti problema.
3 No napagsaritaanyo iti panagrakaya ti kasasaad ti lubong iti umuna a sarungkar, mabalinyo a kunaen:
◼ “Ipakita ti Biblia a ni Satanas isut’ kangrunaan a puon iti agdama a kasasaad ti lubong. Adu ti agsiddaaw no apay a pinalubosan ti Dios iti napaut a panagtultuloyna. Ania met ti makunayo?” Palubosan a sumungbat. Iturong iti panid 20, parapo 14 ken 15, iti Agbiag nga Agnanayon a libro, sa ilawlawagyo no apay a ni Satanas ket saan pay laeng a napukaw. Sa mabasa ti Roma 16:20.
4 No nagsaritakayo maipapan kadagiti bendision iti sidong ti turay ti Dios, iti sarungkaryo mabalinyo a kunaen:
◼ “Dagiti nakaskasdaaw a bendision nga iyeg iti Pagarian ti Dios ditoy daga ken sangatauan ket nailadawanda ditoy pinanid 12 ken 13. Ania ti makitayo a makaallukoy kadakayo? [Palubosan a sumungbat.] Panunotenyo no ania iti kapada ti agbiag iti maysa a lubong a kas iti daytoy.” Basaen ti parapo 12. No adda interes, isaludsod ti saludsod iti parapo 13, sa malawagan ti sungbat. Mayurnos a maituloy ti diskusion iti sumaruno a sarungkaryo.
5 Mabalinyo a mairugi ti panagadal babaen ti panagkunayo:
◼ “Adu a tattao ti nakasarak iti sungbat dagiti saludsodda ti Biblia babaen ti panangusarda iti daytoy a libro.” Iturong iti benneg dagiti linaonna, sa isaludsod: “Ania a suheto ti kangrunaan a makapainteres kadakayo?” Palubosan a sumungbatda, sa maiturong iti kapitulo a nakaawis ti interesda, sa basaen ti umuna a parapo. Mailawlawag ti wagas iti panagadal ken maibinsabinsa babaen ti pananglawlawag iti maysa wenno dua a parapo. Maurnos ti panagsarungkar manen.
6 Ti panangsaruno iti interes iti Agbiag nga Agnanayon a libro idemostrana ti tarigagaytayo a mangitungpal a naan-anay iti ministeriotayo. (2 Tim. 4:5) Babaen ti panangaramid a kasta, mabalintayo a tulongan dagiti managdengngegtayo a makaragpat iti agnanayon a biag.—Juan 17:3.