Paset 2—Ipakita ti Konsiderasion iti Sabsabali
1 Agingga ti mabalin, kayattayo a masalimetmetan ti naimbag a relasion kadagiti tattao iti komunidadtayo. Kasapulan daytoy nga ipakita ti konsiderasion ken panagraem iti kalintegan ken riknada.
2 Agdinamag dagiti Saksi ni Jehova iti naimbag a kababalinda. Ti takder iti panagkawkawes iti sangakaarrubaan, idiay pagadalan, pagtrabahuan, kadagiti asambleatayo, isut’ suheto dagiti adu a napaboran a komento.—Kitaenyo ti Hunio 15, 1989, Pagwanawanan, panid 20.
3 Ti naimbag a kondukta ket ramanenna ti kinamapagpiaran, kinagaget, ken nadalus a moral. Saklawenna met ti kinadayaw kadagiti lumugar nga agnanaed iti aglawlaw ti Kingdom Hall. Ti nadiosan a konduktatayo iti sabali a bambanag ti nalabit a di maikaskaso no saantayo a nakonsidera iti kaarrubatayo. Kiniddaw ni Pablo kadatayo nga “agtignaykayo iti pamay-an a maikari iti naimbag a damag.”—Fil. 1:27.
4 Sagpaminsan, adda reklamo dagiti agnanaed iti asideg ti dadduma a Kingdom Hall gapu iti mariknada a kaawan ti konsiderasion dagidiay a tumabtabuno iti gimong. Masapul a liklikan dagiti kakabsat ti aguummong iti igid ti kalsada iti sango ti Kingdom Hall a naariwawada a mangngegan iti sangakaarrubaan. Saan koma a mapalubosan dagiti ubbing nga agtaray a rummuar ken umuneg iti Kingdom Hall. Ti napigsa a panangirikep iti lugan ken panagbosina ti makadisturbo iti sangakaarrubaan. Daytoy a tipo iti kondukta ti mangisarming iti saan a napabor a sao iti kongregasion.
5 Dagiti kaasping a problema ti naireport a maisinggalut iti panagparada ti lugan. Dagiti lugan ti saan koma a maiparada iti pribada a sanikua wenno kadagiti lugar a mangsinga iti trapiko ken kadagiti pagruaran. Dagiti paradaan a lote iti negosio ti saan koma a mausar no awan iti pammalubos. Kasta met, nasken a suroten dagiti pagalagadan ti trapiko no agmanehokayo iti dayta a disso.—Roma 13:1, 2, 5.
6 Idagadag ti Biblia kadatayo nga “aramidenyo ti isuamin a bambanag a maipaay iti dayag ti Dios,” ket dayta ramanenna ti panangipakita iti konsiderasion kadagiti tagaruar. (1 Cor. 10:31-33) No ‘kitaen ti personal a paginteresan dagiti dadduma,’ saantayo a sidudursok a sumrek iti bukodda a sanikua. (Fil. 2:4) Liklikantayo met ti bumiang iti ar-aramid ti negosio dagiti lokal a komersiante.
7 Ti panangipakita ti konsiderasion iti sabsabali—agpadpada iti uneg ken ruar ti kongregasion—isut’ naruar nga ebkas no ania ti marikna iti puspusotayo. No ania ti aramiden ken sawen masapul a maidemostra nga “ayatentayo ti kaarrubatayo a kas iti bagitayo.”—Mat. 7:12; 22:39.