Ni Kristo kas Modelo Dagiti Agtutubo
1 Kalpasan ti panagsasarita iti Biblia, kinuna ti maysa nga agtutubo a taga-lubong: “Magustuak ti nabileg a personalidad ni Jesu-Kristo. Adtoy ti maysa a pangulo a mabalinko a patien.” Saan a maikuna dayta iti asinoman a mabigbigbig a tao iti ili wenno kadagiti bannuar ti ay-ayam ken paglinglingayan. Saanda a maikari a modelo kadatayo gapu kadagiti nailubongan a pagalagadan ken di-nakristianuan a wagas ti panagbiagda.—Sal. 146:3, 4.
2 Mainanama dagiti agtutubo a no mamatida ken Jesu-Kristo, isuda dagiti karnero ti Dios ken am-ammo ken aywanan ida ni Jesus. (Juan 10:14, 15, 27) Maparaburan dagiti agtutubo a sumurot ken Kristo a kas Modeloda.
3 Maysa a kabsat a lalaki nga agserserbi idiay Brooklyn Bethel ti nangaramid iti daytoy a pribilehio kas kalatna manipud pay idi agtawen iti walo. Naparegta a mangmatmat iti panagserbi iti Bethel a kas praktikal a wagas a panangsurot iti ulidan ni Kristo inton tumaenganen. Pinagtalinaed dagiti nagannakna, agraman agdaldaliasat a manangaywan, daytoy a kalat kenkuana. Tapno matulongan nga agsagana, pinaregtada nga aggaget a kas iti maysa a Bethelite, a sanguenna dagiti trabaho iti pagtaengan, tumulong a mangmantener iti Kingdom Hall, ken rumang-ay iti ministerio. Kalpasan a tagtagiragsakenna ti panagserbina idiay Bethel, iti sumagmamano a tawen itan, agyaman unay ta inkagumaanna a tinulad ti ulidan ni Kristo bayat ti idadakkelna.
4 Saan a nangala ni Jesus iti nailubongan a karera; pinilina ti ministerio. Maysa a kabsat a babai ti mayat koma nga agpayunir kalpasan a nagraduar ngem nagkedked gapu iti kaawan ti part-time a panggedanna. Pinampanunotna: ‘Agbirokak pay nga umuna iti panggedak, sakonto ited ti aplikasionko.’ Inlawlawag ti maysa a panglakayen a no bayagenna ti aguray, lalo a magustuannanto ti mangged iti amin-tiempo, agsipud ta awan ti mangigawid kenkuana a mangawat iti dayta. Kinunana: “Inkararagko ti espiritu ni Jehova a mangidalan kaniak.” Dagus a nagpalista kas auxiliary payunir ket kalpasanna nagbalin a regular payunir. Di nagbayag kalpasan dayta, nakasarak iti maiparbeng a panggedan a maitutop iti eskediulna kas payunir.
5 Situtured nga inwaragawag ni Jesus ti mensahe ti Pagarian kadagiti amin. (Mat. 4:23) Masursuro met dagiti agtutubo a Kristiano ti agbalin a natured a mangasaba, a dida kabuteng dagiti dadduma. Impadamag ti maysa a Saksi nga agtawen iti 14: “Ammoda amin idiay pagadalan ti takderko kas Kristiano. . . . Pagaammoda unay a no adda masabetko a kaeskuelaak bayat nga addaak iti ministerio, saanak nga agbain. Masansan a dumngeg dagiti kaeskuelaak, ken masansan a mangalada ti literatura.”
6 Ti panangusig iti ulidan ni Kristo ket tumulong kadagiti agtutubo a mangaramid kadagiti nainsiriban a desision maipapan iti masakbayanda. Ti ulidanna paregtaenna ida a ‘manglaglagip iti Naindaklan a Namarsuada’ babaen ti sireregta a panagserbi ken Jehova. (Ecl. 12:1) Kas ken Kristo Jesus, sukayenda “ti ayat ti Ama,” a mangyeg kadagiti bendision a nasaysayaat ngem ti aniaman a maitukon ti lubong. Imbes nga ‘aglabasda,’ manamnamada ti ‘agtalinaed iti agnanayon.’—1 Juan 2:15-17.