Panangsukimat ni Jehova—Apay a Makagunggona
1 Tunggal maysa tarigagayanna ti nasayaat a salun-at. Kaskasdi, adu kadagiti mangtagtagiragsak iti naimbag a salun-at ti agkasapulan pay iti sagpaminsan a panagpasukimat. Apay? Sarakenda ti aniaman a tumataud a problema ti salun-at tapno mapalaing daytoy. Ad-adda pay a napatpateg a saluadan ti naespirituan a salun-attayo. Agpannuray ti anamong ni Jehova iti panangsalimetmet iti ‘nasalun-at a pammati.’—Tito 1:13.
2 Itan ti maitutop a tiempo nga agpasukimattay ken Jehova. Apay a kasta? Agsipud ta ni Jehova addan iti nasantuan a templona, ket suksukimatenna ti puspuso dagiti amin a tattao. (Sal. 11:4, 5; Prov. 17:3) Kas ken David, kiddawentay ken Jehova nga usigennatayo a naan-anay: “Usigennak, O Jehova, ken padasennak; tingitingem dagitoy bekkelko ken pusok.”—Sal. 26:2.
3 Masapul nga agaluadtay kadagiti mamagpeggad iti naespirituan a salun-attayo a mabalin a datay ti pagtaudanna gapu iti imperpekto a lasagtayo. Ibalakad ti Proverbio 4:23: “Nangruna ngem kadagiti amin a masapul a masaluadan, saluadam ta pusom, ta manipud kenkuana aggubbuay ti biag.”
4 Mabalin met a madangran ti naespirituan a salun-attayo babaen iti rinuker, imoral a lubong a nanglawlaw kadatayo. No palubosantay ti bagbagitayo a naasideg unay iti daytoy dakes a sistema, mabalin a rugiantayo ti agpanunot a kas iti dayta ken makapatanor kadagiti nailubongan a kababalin. Wenno mabalin a maakarantayo iti nailubongan nga estilo ti panagbiag ken parukmaennatayo ti espiritu ti lubong.—Efe. 2:2, 3.
5 Mabalin nga usaren ni Satanas ti panangidadanes a pangdadael iti espiritualidadtayo. Masansan, sisisikap nga usarenna dagiti nailubongan a pangallukoy a panggargari kadatayo. Gutugotennatay ni Pedro nga ‘agtalinaed a sipupuot ken managbantay,’ ta ni Satanas ket “kasla leon a ngumerngernger, nga agsapsapul iti asinoman nga alun-onenna.” Magutugottayo a ‘tumakder a bumusor kenkuana, a natibker iti pammati.’—1 Ped. 5:8, 9.
6 Kasapulan a salaknibantay ti naespirituan a salun-attayo babaen iti panagtalinaed a napigsa iti pammatitayo ken babaen iti panangpabileg iti dayta nga inaldaw. Irekomenda ni apostol Pablo nga ituloytay a suoten ti pammatitayo. Kas iti nainsiriban a panangipangagtay iti praktikal a balakad ti nalaing a doktor, masapul met a dumngegtayo ken Jehova no ipalgak ti espiritual a panagsukimatna nga adda problema a masapul nga agasan. Daytoy ti ‘mangator’ kadatayo.—2 Cor. 13:5, 11.
7 Pudno unay a ni Jehova ti naindaklan a Manangsukimat. Kanayon nga umiso ti panangrekonoserna. Babaen ti Saona ken ‘ti matalek nga adipen,’ iresetana ti makapasalun-at a naespirituan a taraon. (Mat. 24:45; 1 Tim. 4:6) Ti regular a pannangan iti daytoy a taraon iti pagtaengan ken kadagiti gimong ti kongregasion ket tumulong kadatayo a mangtaginayon iti naespirituan a salun-at. Ti regular a naespirituan nga ehersisio iti ministerio ket makagunggona met. Gapuna, pagragsakantay ti regular a panangsukimat ni Jehova, nga agtalek a taginayonennatayo iti kasayaatan a naespirituan salun-at.