Dayawenyo ni Jehova iti Inaldaw
1 Ni Jehova a Diostayo, ti Gubuayan ti amin a biag ken kinaragsak. Maikari iti panangidayaw dagiti amin a parsuana. Tunggal maysa, kayattayo a baliksen a kas iti salmista: “Degdegakto ti amin a pannakaidaydayawmo. Ti mismo a ngiwatko saritaennanto ti kinalintegmo, iti agmalmalem ti panangisalakanmo.” (Sal. 71:14, 15) Tapno maaramid daytoy, masapul a birokentayo dagiti pamay-an tapno maidayawtay ni Jehova iti inaldaw-aldaw.
2 Nangituyang dagiti immuna a Kristiano iti naimbag nga ehemplo iti panangidayaw ken Jehova. Maipapan kadagiti 3,000 a nabautisaran idi Pentecostes, kunaen ti Aramid 2:46, 47: “Iti inaldaw-aldaw naynay nga agserserbida idi idiay templo buyogen ti panagkaykaysa, . . . nga indaydayawda ti Dios ket nasarakanda ti anamong dagiti isuamin a tattao.” Naadalda dagiti nakaskasdaaw a kinapudno maipapan ken Jehova ken ti Mesiasna. Ti rag-oda ti nangparegta pay iti dadduma a dumngeg ken agadal ken mangidayaw ken Jehova.
3 Inaldaw nga Adda Dagiti Oportunidad: Adu itatta dagiti makasarak a mabalinda nga idayaw ni Jehova iti inaldaw babaen ti impormal a panangsaksi. Tumulong kadakuada a nabungbunga ti nasakbay a panagplano. Natakuatan ti maysa a kabsat a babai a nangikeddeng a makiraman iti impormal a panangasaba nga adda nangbuong iti dua a tawa sada sinerrek ti kotsena. Nangayab ti mangtarimaan ket sinaganaanna a kasabaan ti mekaniko. Nairaman iti panagsaganana ti panangikararag iti panangidalan ni Jehova. Kinasabaanna ti mekaniko iti las-ud ti maysa nga oras ket napaimaanna iti libro nga Agbiag nga Agnanayon.
4 Sabali pay a kabsat a babai ti kanayon a makasabat iti kaarrubana bayat nga ipaspasiarda dagiti asoda. Maysa nga aldaw, serioso a napagsaritaanda maipapan dagiti problema ti biag, ket dayta ti nangiturong iti kanayonan pay a panagpatang. Idi agtanoy, nairugi ti panagadal iti Biblia. Makapainteres ta iti kamaudiananna impudno ti kaarruba a saan koma a dumngeg kadagiti Saksi ni Jehova no idiay ruanganda ti immawaganda, gapu ta saan a mamati iti Dios wenno iti Biblia.
5 Adda dadduma a makaipaay ti pammaneknek no adda agtagilako a sumangbay. Maysa a kabsat a babai idiay Ireland ti binisita ti maysa a lalaki nga ahente ti seguro. Inlawlawagna a kumitkita iti masakbayan a sagrapennanto ti agnanayon a biag. Baro a banag daytoy iti lalaki a Romano Katoliko. Inawatna ti libro nga Agbiag nga Agnanayon, timmabuno ti gimong iti sumaruno a lawas, ken immannugot nga agadal iti Biblia. Itan daytoy nga ahente ket maysan a bautisado a kabsat.
6 Naalibtaktayo koma amin kadagiti oportunidad tapno inaldaw a maidayawtay ni Jehova. Mangikabilkayo ti sumagmamano a magasin wenno tract iti lugar a makita ken itukon ida kadagiti sangaili. Nangikabil dagiti dadduma nga agtutubo a Saksi iti pagadalan iti literatura ti Biblia iti rabaw ti lamisaanda kas pangipuonan ti saritaan kadagidiay makadlaw ken agimtuod iti dayta. Adda koma iti panunotyo ti maysa wenno dua a reperensia a Kasuratan a mabalinyo nga usaren. Kiddawenyo ti tulong ni Jehova. Mabendisionankayo no aramidenyo dayta.—1 Juan 5:14.