Idaydayawyo ni Jehova iti Inaldaw
1. Dagiti adipen ti Dios ket natignay a mangaramid iti ania, ken apay?
1 Inyebkas ni Ari David ti determinasionna a mangidaydayaw ken Jehova iti “intero nga agmalem,” uray agingga iti tiempo a di nakedngan. (Sal. 145:2, 7, 21) Addaantayo met iti nasayaat a rason a mangidaydayaw ken Jehova iti tunggal aldaw.—Sal. 37:10; 145:14, 18; 2 Ped. 3:13.
2. Kasano a ni Jehova ket maidaydayaw nga inaldaw dagiti pamilia?
2 Panangidaydayaw ken Jehova iti Pagtaengantayo: Addaantayo kadagiti makapabileg a literatura a mabalintayo a pagsasaritaan bayat ti panangusigtayo iti teksto iti inaldaw, bayat ti panagdaydayawtayo kas pamilia, ken bayat ti panagsaganatayo kadagiti gimong ti kongregasion. Nakaugalian ti adu a pamilia nga agsasangoda iti uray maysa laeng a pannangan iti tunggal aldaw. Dayta ti mangted kadakuada iti gundaway nga agsasarita ken mangidaydayaw ken Jehova. Dagiti kasta a gagangay a panagsasarita nga iyun-una dagiti nagannak ket dakkel ti maitulongna iti panangpadakkelda kadagiti annakda “iti disiplina ken panangiturong-panunot ni Jehova.”—Efe. 6:4; Deut. 6:5-7.
3. Ania dagiti gundawaytayo a mangidaydayaw ken Jehova no kaduatayo dagiti kakabsattayo?
3 Panangidaydayaw ken Jehova a Kadua Dagiti Kakabsattayo: No makiramantayo iti serbisio iti tay-ak wenno tumabunotayo kadagiti gimong iti kongregasion, addaantayo kadagiti nagsayaat a gundaway a mangidaydayaw ken Jehova a kadua dagiti kapammatiantayo. (Prov. 15:30; Fil. 4:8; Heb. 13:15) Yantangay agpapadatayo a mangipatpateg ken Jehova, naglaka laeng nga iyebkastayo ti napasnek nga apresasiontayo iti kinaimbag ni Jehova bayat ti panagsasaritatayo.—Sal. 106:1.
4. Kadagiti ania a kasasaad a mabalinyo nga idaydayaw ni Jehova?
4 Panangidaydayaw ken Jehova no Makisarsaritatayo Kadagiti Di Manamati: Nupay mabalin a saan nga ipalubos ti kasasaad a makiramantayo nga inaldaw iti ministerio iti publiko, ti pannakisaritatayo iti apagbiit kadagiti katrabahuan, kaeskuelaan, ken dadduma pay iti maipapan ken Jehova ken kadagiti panggepna ikkanna iti namnama dagiti napudno ti panagpuspusona a tattao. (Sal. 27:14; 1 Ped. 3:15) Bayat a nakalugan iti eroplano, kinasabaan ti maysa a kabsat a babai ti padana a pasahero. Naliwliwa ken naparegta unay ti babai isu nga intedna ti adres ken numero ti teleponona iti kabsat tapno maitultuloyda ti saritaanda. Bayat nga umad-adu ti pakariribukan ken dumakdakes ti kasasaad ti lubong, dagiti adipen ni Jehova itultuloyda nga idanon ti “naimbag a damag ti maysa a banag a nasaysayaat” kadagidiay sidadaan a dumngeg. Daytoy ti mangted kadagiti sabsabali iti namnama ken mangtignay kadakuada a mangidaydayaw ken Jehova.—Isa. 52:7; Roma 15:11.
5. Apay a tarigagayantayo nga idaydayaw ni Jehova, ken ania ti mabalin nga ibanag daytoy?
5 Maay-ayo la ketdi unay ni Jehova a makakita kadagiti adipenna a mangidaydayaw kenkuana iti tunggal aldaw! Kas kadagiti parsua ni Jehova nga adda iti aglawlawtayo, maidaydayawtayo met ti Dios iti inaldaw kadagiti pagtaengantayo, iti kongregasion, ken no makisarsaritatayo kadagiti sabsabali a saan pay nga agdaydayaw kenkuana.—Sal. 19:1-4.