Pagsilnagen nga Awan Sarday ti Silawtayo

¹ Ania kadi ti lawag? Nupay narang-ay ti teknolohiana, kaskasdi a di masungbatan a naan-anay ti tao ti saludsod a pinataud ni Jehova iti Job 38:24. Agbiagtay ngata no awan ti lawag? Saan. Nasken ti lawag iti pisikal a panagkita, ket ibaga kadatayo ti Biblia nga iti espiritual a kaipapanan, “Ti Dios ket silaw.” (1 Juan 1:5) Naan-anay nga agpannuraytayo iti Daydiay “mangted kadatayo ti lawag.”​—Sal. 118:27.

² Pudno daytoy iti pisikal a pannakaawat ngem nangnangruna iti naespirituan a wagas. Inyaw-awan dagiti ulbod a relihion ti masa dagiti tattao, a binaybay-anda ida iti naespirituan a kinasipnget, nga ‘agar-arikapda iti diding a kas iti bulsek a tattao.’ (Isa. 59:9, 10) Natignay babaen ti di maartapan nga ayat ken dungngo, ni Jehova ‘imbaonna ti lawag ken kinapudnona.’ (Sal. 43:3) Literal a nangipangag dagiti minilion a manangipateg, a rimmuar “manipud kinasipnget nga agturong iti nakaskasdaaw a lawagna.”​—1 Ped. 2:9.

³ Inakem ni Jesu-Kristo ti kangrunaan a papel a nangyeg iti daytoy a lawag ditoy Iubong. Kinunana: “Immayak kas maysa a silaw iti lubong, tapno tunggal maysa nga addaan iti pammati kaniak di agtalinaed iti sipnget.” (Juan 12:46) Amin a tiempo, pigsa, ken kabaelanna ket inusarna tapno maipakaammo ti lawag ti kinapudno. Nagdaliasat iti intero a pagilianna, nangaskasaba ken nangisursuro iti gistay amin a siudad ken purok.

⁴ Iti Mateo 5:14-16 inwardas ni Jesus dagiti disipulona: “Dakayo ti silaw ti lubong. . . . Agsilnag koma ti silawyo iti sanguanan dagiti tattao, tapno makitada dagiti nasayaat nga aramidyo ket mangipaayda ti dayag iti Amayo nga adda iti langlangit.” Kas ken Jesus, ‘nagsilnagda a kas silsilaw iti lubong.’ (Fil. 2:15) Siraragsak nga inawatda dayta a rebbengen, a minatmatanda a kas kangrunaan a panggep iti biag. Nagkaykaysa ti intero a Nakristianuan a kongregasion a mangilepleppas iti dayta dakkel a trabaho.

⁵ Rebbeng nga agyamantayo ita ta maysatayo kadagidiay ‘nangikkat iti ar-aramid a kukua ti kinasipnget.’ (Roma 13:12, 13) Maipakitatay ti panangipategtayo babaen ti panangtulad iti ulidan nga intuyang ni Jesus ken dagiti matalek a Kristiano iti napalabas. Nagangganat ken nakarkaro ita a masapul dagiti dadduma a dumngeg iti kinapudno ngem iti aniaman a tiempo iti natauan a historia.

⁶ Kasanotay nga Agsilnag a kas Silsilaw? Ti kangrunaan a pamay-an tapno makapagsilnagtayo isut’ pannakiraman iti trabaho a panangikasaba iti Pagarian. Kada kongregasion ti addaan iti regular, organisado nga urnos a panangasaba iti naituding a teritoria. Nawadwad dagiti maala a nagduduma a literatura ken iti adu a pagsasao. Adda detaliado a pannakaisuro kadagiti gimong, ken maitukon ti personal a tulong a mangsanay iti sabsabali babaen dagidiay aduan ti kapadasan. Silulukat kadagiti lallaki, babbai, nataengan, ken uray ubbing dagiti gundaway a makipaset. Amin nga aramid ti kongregasion ket naisentro iti panangasaba, agraman probision a tumulong iti kada miembro a makipaset iti aniaman a wagas. Ti regular, nadekket a pannakitimpuyog iti kongregasion isut’ kasayaatan a wagas a panangsierto nga agtultuloy ti panagraniag ti silawtayo.

⁷ Makapagsilnagtayo iti wagas nga awan ti berbal a panangsaksi. Mabalin a maawistay ti atension dagiti sabsabali babaen laeng ti konduktatayo. Dayta ti adda iti panunot ni Pedro idi indariragna: “Taginayonenyo a nasayaat ti kababalinyo iti tengnga dagiti nasion, tapno . . . dayawenda koma ti Dios kas bunga ti nasayaat nga ar-aramidyo a masaksianda.” (1 Ped. 2:12) Adu ti mangukom iti maysa a trabaho wenno organisasion babaen ti kondukta dagidiay naitimpuyog iti dayta. No makita dagiti managpaliiw a nadalus ti moral dagiti tattao, mapagpiaran, natalna, natulnog iti linteg, matmatanda dagita a tattao a kas naiduma ket kunaenda nga agbibiagda iti pagalagadan a nangatngato ti kalidadna ngem iti sursuroten ti kaaduan. Isu a pagsilsilnagen ti asawa a lalaki ti silawna no raemen ken kupikopanna ni asawana iti naayat a wagas; kasta met [nga agsilnag] ti asawa a babai babaen ti panangraemna iti kinaulo ni lakayna. Agminar ti pannakaiduma dagiti annak no agtulnogda kadagiti nagannakda ken liklikanda ti seksual nga imoralidad ken ti panagusar ti droga. Ti maysa nga empleado a sipapanunot iti trabahona, mapagpiaran, ken nakonsiderar iti sabsabali ket maipateg unay. Babaen ti panangiparangarang kadagitoy Nakristianuan a kualidad, pagsilsilnagentay ti silawtayo.

⁸ Ti panangasaba isut’ pannakisao kadagiti sabsabali maipapan iti naadaltayo manipud iti Sao ti Dios. Maaramid dayta babaen kadagiti palawag iti gimong wenno panagsao kadagiti ruangan, ngem saan laeng a kadagita nga okasion. Iti inaldaw nga aktibidadtayo adut’ masabettay a tattao. Mano a daras iti maysa nga aldaw a makasaoyo dagiti mismo a kaarrubayo? Kasano ti kasansan nga adda agtuktok iti ridawyo? Mano a nagduduma a tattao ti masabetyo no mapankay aggatang, aglugan iti bus, wenno agtrabaho iti sekular a panggedanyo? No maysakay nga agtutubo nga ages-eskuela, mabilangyo kadi dagiti tao a makasaoyo iti kada aldaw? Dagiti oportunidad nga agsao iti sabsabali ket gistay awan pagpatinggaanna. Ti laeng kasapulanyo isut’ kaadda ti sumagmamano a Nainkasuratan a kapanunotan iti isipyo, addaankay iti Biblia ken sumagmamano a tract, ken dakay ti umuna nga agsao no adda gundawayyo.

⁹ Nupay nalaka laeng nga aramiden ti impormal a panangasaba, agsarimadeng dagiti dadduma a mangpadas iti dayta. Mabalin a mabainda unay wenno agnerbiosda a makisao kadagiti ganggannaet. Mabalin a maamakda di la ket ta makangngegda iti nagubsang a sungbat. Maibaga kadakayo dagidiay adut’ padasnan iti impormal a panangasaba a gistay awan a pulos ti pagdanagan. Dagiti sabsabali ket kas kadatayo met Iaeng; pareho ti masapsapulda, isu met laeng ti pakaseknanda, ken kayatda dagiti isu met laeng a bambanag nga agpaay kadakuada ken ti pamiliada. Kaaduan ti agtignay a siaasi iti naragsak nga isem wenno nainggayyeman a kablaaw. Tapno marugian, kasapulanyo laeng ti ‘mangurnong iti tured.’ (1 Tes. 2:2) Nupay kasta, apaman a mairugiyo, mabalin a masdaaw ken maragsakankayo iti resultana.

¹⁰ Mabendisionantayo no Pagsilnagentay ti Silawtayo: Adtoy ti sumagmamano nga ehemplo dagiti kapadasan a resulta ti impormal a panangasaba. Ginandat ti maysa a babai nga agedad iti 55 ti bumallasiw iti kalsada. ldi gistay dungparenen ti lugan, ginammatan ti maysa a kabsat a babai ti takiagna sana inguyod iti natalged a lugar, a kinunana: “Pangngaasiyo ta agannadkayo. Agbibiagtayo iti napeggad a tiempo!” Kalpasanna inlawlawagna no apay a ti tiempo ket napeggad unay. Insaludsod ti babai, “Maysaka kadi a Saksi ni Jehova?” Gapu ta addaanen iti maysa kadagiti librotayo a naggapu ken manangna, kayat a makasarita ti babai ti maysa kadagiti Saksi ni Jehova, ket daytoy a pasamak ti nakaigapuan dayta.

¹¹ Inrugi a kinasarita ti sister ti maysa a babai idiay pagurayan a kuarto iti opisina ti doktor. Sipapasnek a nagimdeng ti babai ket sana kinuna: “Nakasarsaritakon dagiti Saksi ni Jehova; ngem no bilang agbalinakto a maysa kadagiti Saksi ni Jehova iti masanguanan, maigapunto iti kaibagbagam kaniak. Ti panagimdeng kenka ket umasping iti panangrugi a pannakakita ti lawag iti kasipngetan.”

¹² Ti panangipakita ti kinaasi ket mabalin a pangrugian a tumulong iti dadduma a mangammo iti kinapudno. Bayat a magmagna nga agawid manipud iti tay-ak ti serbisio, nadlaw ti dua a kakabsat a babbai ti maysa a baket a kasla masakit bayat a dumsaag iti bus. Simmardengda ket sinaludsodda iti baket no kasapulanna ti tulong. Nasdaaw unay ta naginteres kenkuana ti dua a dina pulos am-ammo nga impapilitna nga ammuen no aniat’ nakaigapuan ti kasta a naasi a tignay. Daytoy ti nangiruangan iti maysa a panangsaksi. Sidadaan nga inted ti babai ti direksionna ken sibabara nga inawisna ida a bumisita kenkuana. Nairugi ti panagadal. Di nagbayag makigimgimongen ti babai ket ita iranranudnan ti kinapudno iti sabsabali.

¹³ Gunggundawayan ti bumaketen a kabsat ti mangasaba iti lokal nga igid ti baybay iti parbangon. Masarakanna sadiay dagiti katulongan iti balay, dagiti agaw-awir, agtartrabaho iti banko, ken babaknang a babbai nga agpagnapagna iti agsapa kadagiti pagkalantayan a tabla. Mangidadaulo kadagiti panagadal iti Biblia, a situtugawda kadagiti banko iti asideg ti baybay. Sumagmamano a tattao ti nakaadal ti kinapudno kenkuana ket itan maysadan a Saksi ni Jehova.

¹⁴ Iti panggedanna, nangngeg ti maysa a kabsat a babai ti katrabahuanna a nagsao maipapan iti maysa a partido ti politika a patienna a makasolbar kadagiti problema ti lubong. Bimmallaet ti kabsat a babai, insalaysayna dagiti kari maipapan iti aramidento ti Pagarian ti Dios. Daytoy a pannakipatang idiay panggedan ti nangiturong iti regular a panagadal iti Biblia iti pagtaengan, ket kamaudiananna nagbalinen a Saksi daytoy a babai ken ti lakayna.

¹⁵ Dikay Liplipatan a Maysakayo a Saksi! Idi inladawan ni Jesus dagiti disipulona a kas “ti silaw ti lubong,” impabigbigna a masapul a tulonganda dagiti dadduma a magunggonaan iti naespirituan a pannakalawlawag iti Sao ti Dios. No iyaplikartayo ti balakad ni Jesus, kasanotay a matmatan ti ministeriotayo?

¹⁶ No agsapulda iti panggedan, pilien ti dadduma a tattao ti paset-tiempo a trabaho. Limitaranda ti kaadu ti tiempo ken pigsa a busbosenda iti dayta agsipud ta kaykayatda nga usaren ti kaaduan a tiempoda iti ar-aramid nga ammoda nga ad-adda a makagunggona kadakuada. Kasta met aya ti panangmatmattay iti ministeriotayo? Nupay mabalin nga ibilangtay nga obligasion ken situtuloktay pay ketdi a mangilasin ti sumagmamano a tiempo iti ministerio, ti kadi kangrunaan nga interestayo ket adda iti sabali?

¹⁷ Gapu ta ammotayo nga awan ti makuna a paset-tiempo a Kristiano, nagdedikartayo, ‘pinaglikudan ti bagbagitayo’ ken immannugot nga “agtultuloy” a suroten ni Jesus. (Mat. 16:24) Agtultuloy ti tarigagaytayo a kas “amin-kararua,” a gundawayan ti kada oportunidad a mangisilnag iti lawagtayo tapno madanon dagiti tattao sadinoman ti ayanda. (Col. 3:23, 24) Masapul a sarangtentay dagiti nailubongan a kababalin, a salimetmetan ti regtatayo kas idi damo, ken siguraduen a ti silawtayo agtultuloy nga agraniag. Impalubos dagiti dadduma ti regtada a lumamiis ken kumudrep dagiti silawda, a narigaten a makita uray iti asideg. Agkasapulan dagita ti tulong tapno mapasubli ti napukaw a regtada iti ministerio.

¹⁸ Adda dadduma nga agkedked agsipud ta saan a popular iti adu ti mensahetayo. Kinuna ni Pablo a ti mensahe maipapan ken Kristo ket “kinamaag kadagidiay a mapukaw.” (1 Cor. 1:18) Nupay kasta, aniaman ti kinuna dagiti dadduma, sibibileg nga indeklarana: “Ta diak ibain ti naimbag a damag.” (Roma 1:16) Asinoman a mangibain mariknana a nalaad wenno di maikari. Kasano koma a mabaintayo no agsaotay maipapan iti Supremo a Soberano ti uniberso ken dagiti nakaskasdaaw a sagana nga inaramidna maipaay iti agnanayon a kinaragsaktayo? Saan a nainkalintegan a mariknatay ti kinalaad wenno di pannakaikari no sawentayo dagitoy a kinapudno iti sabsabali. Imbes ketdi, agduyostay koma a mangaramid iti kabaelantayo, a mangiparangarang iti kombiksiontayo “nga awan ti aniaman nga ibainna.”​—2 Tim. 2:15.

¹⁹ Ti lawag ti kinapudno nga agsilsilnag itan iti amin a pagilian iti intero a daga ket sibabara a mangituktukon iti namnama ti agnanayon a biag iti paraiso a baro a lubong. Ipakitatay nga impapusotayo ti balakad a pagsilnagen nga awan sardayna ti silawtayo! No aramidentayo, adda pangigapuan nga agrag-otayo a kas kadagiti adalan nga iti inaldaw-aldaw “nagtultuloyda nga awan sardayna a mangisursuro ken mangidekdeklara iti naimbag a damag maipapan iti Kristo, a ni Jesus.”​—Ara. 5:42.