“Agsilnag Koma ti Silawyo”
1. Ania ti ik-ikutantayo a pribilehiotayo nga iranud?
1 Manipud parbangon agingga iti sardam, ti kinangayed ti makita a lawag ket pakaidayawan ni Jehova a Dios. Nupay kasta, adda sabali a lawag a kayat ni Jesus nga ikutan dagiti adalanna—“ti silaw ti biag.” (Juan 8:12) Ti panangikut iti naespirituan a lawag ket maysa nga espesial a pribilehio a napakuyogan iti nadagsen a responsabilidad. Imbilin ni Jesus: “Agsilnag koma ti silawyo iti sanguanan ti tattao,” iti kasta, mabenepisiaran dagiti sabsabali. (Mat. 5:16) Gapu ta nakaro ti naespirituan a kinasipnget iti kaaldawantayo, masapul nga isilnagtayo daytoy a lawag, ket nangnangruna nga aramidentayo dayta ita! Kasanotayo a matulad ni Kristo iti panangisilnagtayo iti lawagtayo?
2. Kasano nga impakita ni Jesus ti kinapateg ti panangiranud iti naespirituan a lawag?
2 Babaen ti Panangasaba: Inusar ni Jesus ti panawen, pigsa, ken sanikuana a mangipakaammo iti lawag ti kinapudno kadagiti tattao kadagiti pagtaenganda, kadagiti publiko a plasa, kadagiti tuktok ti bantay—iti sadinoman a pakasarakanna kadakuada. Ammona ti manayon a pateg ti pudpudno a pannakalawlawag iti naespirituan. (Juan 12:46) Tapno ad-adu pay ti malawlawagan, insagana ni Jesus dagiti adalanna nga agbalin a “silaw ti lubong.” (Mat. 5:14) Insilnagda ti silawda babaen ti panangaramidda iti naimbag kadagiti kaarrubada ken babaen ti panangiranudda kadagiti naespirituan a kinapudno.
3. Kasanotayo a maipakita ti napaypayso nga apresasion iti lawag ti kinapudno?
3 Saan a tagtagilag-anen dagiti adipen ti Dios ti responsabilidadda nga ‘agtultuloy a magna kas annak ti lawag,’ ken mangaskasabada iti sadinoman a pakasarakanda kadagiti tattao. (Efe. 5:8) Uray ti panagbasa iti Biblia wenno ti sabali pay a Nakristianuan a publikasion iti lugar a makita dagiti tattao kabayatan ti panagiinana iti trabaho wenno klase ket makailukat iti gundaway para iti Nainkasuratan a saritaan. Adda maysa nga agtutubo a kabsat a babai a nakairugi iti panangyadal iti Biblia ken nakaipaima iti libro kadagiti 12 a kaklasena idi inaramidna daytoy!
4. Apay a ti ‘panangisilnagtayo iti lawagtayo’ ramanenna ti mapagulidanan a kababalin?
4 Babaen ti Nasayaat nga Aramid: Ti panangisilnag iti lawagtayo ramanenna met ti kababalintayo iti inaldaw. (Efe. 5:9) Masansan a mapaliiw dagiti sabsabali ti Nakristianuan a konduktatayo iti man pagtrabahuan, eskuelaan, ken iti dadduma pay a publiko a lugar ken makailukat dayta iti gundaway tapno mairanudtayo dagiti kinapudno iti Biblia. (1 Ped. 2:12) Kas pagarigan, dagiti nagannak ti lima ti tawenna nga ubing a lalaki ket pinaayaban ti maestra gapu iti nasayaat a kababalin ti ubing. Kinuna ti maestra, “Awan pay ti nakitak nga ubing a kasta ti kapigsa ti determinasionna a mangaramid iti umiso!” Wen, ti ministeriotayo ken ti nasayaat a kababalintayo tignayenna dagiti tattao a mangawat iti “silaw ti biag” ken mangidaydayaw iti Diostayo.