Inaldaw a Panangiwaragawag iti Kinapudno Kas Panangtulad Ken Jesus
1 Adda espesipiko a trabaho nga ileppas ni Jesus idi immay ditoy daga ‘tapno saksianna ti kinapudno.’ (Juan 18:37) Kasla taraonna daytoy a trabaho. (Juan 4:34) Impadamag ni Lucas a nagtultuloy ni Jesus a “nangisursuro nga inaldaw idiay templo.” Sakbay la unay ti ipapatayna, nabalinanna nga imbaga iti Amana: “Pinadayagka ditoy daga, naturposko ti trabaho nga intedmo kaniak nga aramidek.”—Juan 17:4.
2 No napno ti pusotayo iti apresasion kadagiti amin a naaramidan ni Jehova, matignaytayo met nga agsao maipapan kenkuana iti inaldaw. Agbalintayo a kas kadagiti adalan ni Jesus a situtured a nangikuna: “Dikam mabalin ti agsardeng nga agsao maipapan kadagiti bambanag a nakita ken nangngegmi.” (Ara. 4:20) Nagtultuloy ti panagsaoda maipapan ken Jehova, ta kuna ti rekord nga “iti tunggal aldaw . . . nagtultuloyda nga awan sardayna.” (Ara. 5:42) Iyimtuodtay koma, ‘Tultuladek kadi ti Mannursurok a ni Jesus?’
3 Panangasaba a Buyogen ti Kinaganat: Impadto ni Jesus nga inton naipakaammon ti mensahe ti Pagarian iti intero a daga, “iti kasta umayton ti panungpalan.” (Mat. 24:14) Daytoy koma ti mamagpanunot kadatayo maipapan iti kinapateg ken kinaganat ti trabahotayo. Yantangay asidegen ti panungpalan, napaababan ti tiempo a panangileppas iti daytoy a trabaho!
4 Ipakita dagiti report a pappapartaken ni Jehova ti trabaho a panangurnong. (Isa. 60:22) Iti adu a pagilian, nakaad-adu a tattao ti mangab-abrasa iti kinapudno, a kunkunada: “Dakami kumuyogkaminto kenka, ta nangngegmi a ti Dios adda kenka.” (Zac. 8:23) Pudno ti sasao ni Jesus: “Ti anien dakkel, ngem bassit dagiti managobra . . . Ipakaasiyo iti Apo ti panagani a mangibaon kadagiti managobra iti panaganina.”—Mat. 9:37, 38.
5 Inaldaw nga Ipakaammoyo ti Kinapudno: Inaldaw koma nga agbiroktay kadagiti pamay-an tapno maiburaytay ti kinapudno kadagiti sabsabali. Mabalinyo kadi a teleponuan ti maysa a gayyem? Wenno agsuratkayo? Ti ngay panagitukon iti tract iti aglaklako no mapankay ag-shopping? Nalabit adda pay sabsabali a gundawaytayo a mangiburay iti namnamatayo kadagiti sabsabali.
6 Inaldaw koma a tuladentay ti kababalin ni Jesus, a nangilawlawag no apay a naibaon ditoy daga: “Masapul nga ideklarak ti naimbag a damag ti pagarian ti Dios.” (Luc. 4:43) No kayattay ti agbalin a kas iti Mannursurotayo, kayattay met a tuladen dayta.—Luc. 6:40.