Agsaganakayo a Maipaay iti Trabaho a Panagmagasin Inton Abril
Kas nailanad iti 1996 Calendar, marambakan ti Pangrabii ti Apo iti daytoy a tawen inton Abril 2. Gapu ta maparegta babaen iti daytoy naindaklan nga okasion, makiramantay koma amin iti naregta a panagiwaras ti magasin iti intero nga Abril. Anian a naintiempuan dagiti magasin nga usarentayo! Ipamaysanto Ti Pagwanawanan [a ruar] ti Abril 1 ti palawag publiko iti kombension distrito itay napan a tawen, “Idaydayawyo ti Ari ti Kinaagnanayon!” Ti Pagwanawanan nga Abril 15, isarunona ti tema ti espesial a palawag publiko idi Abril, “Ti Panungpalan ti Ulbod a Relihion Asidegen.” Kalpasanna ti espesial a palawag inton Abril 21 iti daytoy a tawen, “Panagtalinaed nga Awan Pakapilawanna iti Tengnga ti Nakillo a Kaputotan,” mangtedto iti kanayonan a pammaregta iti trabahotayo iti Pagarian. Itampoktayto met ti Abril 22 nga Agriingkayo! iti topiko nga “Inton Awanen Dagiti Gubat.”
Kas pasarunson daydi kampania ti Kingdom News idi Abril, naidumanto koma a bulan ti panagibunong ti magasin daytoy Abril. Itan ti tiempo a panagplano. Adunto ti mayat nga agpalista kas auxiliary payunir. Kas pasakbay iti daytoy, masapul a mapedido dagiti kanayonan a kopia dagiti magasin a ruar ti Abril. Mabalin nga iplano dagiti Aldaw ti Panagmagasin, a no mabalin pakipasetan ti amin, iti agsapa, malem, ken/wenno iti sardam. “Agbalin[tay koma amin] a managtungpal iti sao.” Kas naipadto maipapan iti Mesias idiay Salmo 69:9, maikunatayo met koma: “Ti regta a maipaay iti balaymo ibusennakto.”—Sant. 1:22; Juan 2:17.