Nailadawan Dagiti Nalatak a Magasina
1 Dagiti ruar iti Abril ken Mayo a Ti Pagwanawanan ken Agriingkayo! ket iladawanda dagiti makaatrakar nga artikulo a paginteresan dagiti amin. Mainayon kadagiti artikulo a maipapan iti sangalubongan a talna iti Abril 1 ken 15 a ruar iti Ti Pagwanawanan, ti Mayo 1 a ruar ket iladawanna iti “Minilmilion a Natayen Agbiagdanto Manen” ken ti Mayo 15 a ruar dakamatenna ti “Armagedon—Kaano?”
2 Dagiti ruar ti Agriingkayo! a maipaay iti Abril ken Mayo ti mangsaklaw kadagiti suheto nga “Aniat’ Panginanamaan iti Napapaut a Biag?,” “Nadalus a Daga—Agbiagkayo Aya a Kumita iti Dayta,” ken “Lubong nga Awanan Igam—Posible Kadi?” Umanamongkayo aya a dagiti tattao idiay teritoriayo ket masapul a gundawayanda a basaen dagitoy a ruar?
NAPARANG-AY A PANNAKIPASET
3 Iplanotayo itan a paaduen ti maiwarastayo kadagitoy a nagpaiduma a ruar. Apay a dikay iyurnos iti ad-adu ngem ti gagangay a tiempo nga agiwaras iti magasina? Babaen ti kaadu dagiti auxiliary payunir bayat dagitoy a bulan, agraman dagiti naintiempuan a suheto nga itukon, makitanto ti naimbag a resultana.
4 Ania ti tumulong kadatayo a mangparang-ay iti maipaima a magasina? Umuna, masapul a basaentayo a naimbag dagiti magasina. No kasano a mas kabisadotayo kadakuada, naregreggettayo met a mangitukon kadagitoy. Bayat a basbasaen, siputanyo dagiti puntos a mangilawlawag kadagiti nagduduma nga artikulo. Saludsodanyo ti bagbagiyo: ‘Siasino dagiti nangruna a maragsakan kadagitoy nga artikulo? Ania ti makaapelo iti maysa a kaaruba, iti maysa a negosiante, iti maysa nga estudiante, ken dadduma pay?’
ITUYANGYO ITI PERSONAL A KALAT
5 Kayat dagiti dadduma ti mangituyang iti bukodda a kalat a maipaay ti magasina iti Abril ken Mayo. Ngem no aramidenyo dayta, masapul nga usisaenyo iti adipen ti magasina iti nasakbay tapno masigurado nga adda supisiente a magasina a mausar.
6 Siempre, adu a wagas iti panangipaima ti magasina malaksid laeng iti panagbalaybalay a ministerio. Mabalintayo nga itukon dagiti magasina kadagiti panangasaba iti kalsada ken bayat a mapantayo kadagiti lugar ti negosio. Adu dagiti kakabsat ti nangipasdek iti rota ti magasina. No agsarungkarkayo kadagiti interesado a tattao, mabalin a maibati dagiti kaudian a ruar. Ti impormal a panangasaba isut’ maysa nga ekselente a wagas iti panangsaksi ken panangipaima ti magasina. No dadduma ti panangipakita laeng kadagiti akkubda ket umdasen a rugian iti saritaan wenno panangipaima kadakuada.
7 Laglagipenyo a dagiti magasinatayo ket nagdudumada. Itudoda iti dalan ti talna, ragsak, ken agnanayon a biag. (Juan 17:3) Gapuna nga iplanoyo itan a sagrapen iti mainayon nga aktibidad babaen dagiti nalatak nga artikulo a maiwarnak iti Abril ken Mayo a ruar iti Ti Pagwanawanan ken Agriingkayo!