Panagsagana—Tulbek ti Balligi
1 Tumulong ti nasakbay a panagsagana a mangparukma iti aniaman a panagnerbiosyo maipapan ti pannakiraman iti tay-ak ti serbisio. No umasidegkayo kadagiti ruangan, ammoyo no ania ti kayatyo nga isao iti bumalay. Saan a masapul nga agbutengkayo maipapan ti panangsungbat kadagiti pangontra. Wen, ti naan-anay a panagsagana ti tulbek iti panangpatadem iti laingtayo a mangasaba ken mangisuro.
2 Gutugotennatayo ni Pablo a dagiti ‘sakatayo ket makapetanda iti alikamen ti naimbag a damag ti kappia.’ (Efe. 6:15) Ramanen daytoy ti panangisagana iti panunot ken pusotayo ken kaadda ti positibo a panangmatmat. No nakasaganatayo, magunggonaantay kadagiti bunga ti Pagarian, a mangparagsak kadatayo.—Ara. 20:35.
3 No Kasano ti Panagsagana a Maipaay iti Panangasaba: Pilientay koma ti maysa a presentasion a laklakaentay nga iparang, nalabit manipud kadagidiay adda iti libro a Panakirinnason wenno kadagidiay adda iti maudi a panid Ti Ministeriotayo iti Pagarian. Siaannad nga usigenyo ti kasuratan a planoyo nga usaren, nga ikeddeng no ania a sasao wenno grupo dagiti sasao ti maigunamgunamyo tapno maparuar ti kangrunaan a punto. Saan a nasayaat nga ikabesa ti presentasion; imbes ketdi, kasayaatan no maikabil ti ideya iti panunot ket idatagyo iti bukodyo a sasao iti makaawis a wagas.
4 Kitaenyo ti publikasion a planoyo nga itukon, ket pilienyo dagiti punto a pagarupenyo a paginteresan ti tattao idiay teritoriayo. Panunotenyo no kasano nga ibagayyo ti presentasionyo iti nagduduma a bumalay—maysa a lalaki, maysa a babai, maysa a nataengan, wenno maysa nga agtutubo.
5 Pinadasyo kadin ti nangangay iti sesion ti panagensayo? Agtitiponkayo a kadua ti miembro ti pamilia wenno dadduma nga agibumbunannag tapno pagsaritaanyo no ania dagiti presentasion nga epektibo, kalpasanna ensayoenyo ida a sangsangkamaysa tapno makabesadoda amin. Padasenyo nga usaren dagiti aktual a kasasaad ken pangontra a masabet idiay teritoria. Parang-ayen ti kasta a panagsanay ti naannayas a panagsao, pasayaatenna ti kinaepektibo iti panangasaba, ken pabilgenna ti panagtalekyo.
6 Mainayon iti panangisagana ken panangensayo iti presentasionyo, isaludsodyo met koma iti bagiyo, ‘Ti kadi kawes nga isuotko ket maiparbeng iti ministerio? Addaanak aya kadagiti kasapulan iti bagko, agraman literatura a planok nga usaren? Nasayaat met laeng ti kasasaadda? Addaanak kadi iti libro a Panakirinnason, dagiti tract, house-to-house record, ken lapis?’ Ti natanang a panagplano a nasakbay mangted iti nabungbunga nga aldaw ti panagserbi.
7 Kalpasan nga inaramidtay ti inggat’ kabaelantayo nga agsagana, ikararagtay koma a tulongannatay ti espiritu ni Jehova nga agballigi. (1 Juan 5:14, 15) No ilugarantay ti panagsagana, agresulta iti pannakasarak iti dakdakkel a rag-o iti trabahotayo, bayat a ‘naan-anay a maitungpal iti ministeriotayo.’—2 Tim. 4:5.