Saludsod

◼ Itan ta adda kadatayo ti libro a Pannakaammo a Mangiturong iti Biag nga Agnanayon, kasano ti kapaut a maikondukta dagiti panagadal ti Biblia iti pagtaengan?

Inrekomenda Ti Ministeriotayo iti Pagarian idi Setiembre 1993 nga agtultuloy ti panagadal ti Biblia iti pagtaengan kadagiti kabbaro nga interesado agingga a maadal dagiti dua a libro a Mabalinyo ti Agbiag nga Agnanayon iti Paraiso a Daga ken Nagkaykaysa iti Panagdayaw iti Maymaysa a Pudno a Dios. Itan ta adda kadatayo ti libro a Pannakaammo, kasla maitutop a maaramid ti panagbalbaliw iti daytoy wagas, kas naibalabala iti pinanid 13 ken 14 iti Enero 15, 1996, a ruar Ti Pagwanawanan.

Nadisenio ti libro a Pannakaammo a tumulong kadagidiay “siuumiso a maikari iti agnanayon a biag” a mangadal no ania ti masapul nga ammuenda tapno makapagdedikarda ken Jehova ken mabautisaranda. (Ara. 13:48) Ngarud, kalpasan a makompletoda daytoy baro a publikasion, saanen a masapul a mayadal ti maikadua a libro iti isu met laeng nga estudiante. Bayat nga agprogreso dagiti estudianteyo iti Biblia, paregtaenyo a nayonanda ti pannakaammoda babaen ti itatabuno kadagiti gimong agraman panagbasa iti Biblia ken nagduduma a Nakristianuan a publikasion.

No kabesadoyo dagiti saludsod idiay pinanid 175 aginggat’ 218 iti libro nga Organisado a Mangitungpal iti Ministeriotayo, mabalin a makatulong daytoy. Nupay dikay iturong wenno irepaso iti estudiante ti Biblia dagitoy a saludsod, nasayaat no maigunamgunam dagiti punto iti libro a Pannakaammo a mangtulong iti estudiante a mangyebkas iti umiso a pannakaawat kadagiti pamunganayan a kinapudno ti Biblia inton irepaso dagiti panglakayen ti salsaludsod kadagiti kandidato ti bautismo.

Gagangay a saanen a kasapulan a nayonan ti impormasion idiay libro a Pannakaammo, a mangiserrek kadagiti kanayonan nga argumento a mangparukma kadagiti palso a doktrina. Mangpaatiddog laeng daytoy iti tiempo ti panagadal. Imbes ketdi, manamnama a nadardaras a mawanas ti libro, nalabit iti agarup innem a bulan. Ipaganetget daytoy a masapul nga adalentayo a nasakbay tapno maidatagtayo a silalawag ken ab-ababa. Magutugot met ti estudiante nga agadal a nasakbay, a kitaenna dagiti naisitar a kasuratan, ken padasenna nga usigen no ania ti maisursuro iti kada kapitulo.

Impaganetget Ti Pagwanawanan a kasapulan a mangidaulotayo iti ad-adu nga epektibo a panagadal ti Biblia iti ab-ababa a tiempo.—Isa. 60:22.