Progresibo a Panangmatmat iti Naganat a Trabaho a Panagaramid Kadagiti Adalan
1 Sakbay a pimmanaw ditoy daga, binilin ni Jesus dagiti pasurotna nga ‘agaramidda kadagiti adalan a tattao iti isuamin a nasnasion.’ Kalikaguman daytoy ti naganetget a kampania ti panangasaba ken panangisuro ken isaknapda ti trabahoda iti intero a mapagnaedan a daga. (Mat. 28:19, 20; Ara. 1:8) Minatmatanda kadi daytoy nga annongen kas dadagsen—a narigat unay nga awiten? Saan sigun ken apostol Juan. Kalpasan ti panangbusbosna iti 65 a tawen iti panagaramid adalan, insuratna: “Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.”—1 Juan 5:3.
2 Ti Nainkasuratan a rekord ti trabaho dagidi nagkauna a Kristiano paneknekanna a naganetgetda a nangitungpal iti annongenda nga agaramid kadagiti adalan ni Jesu-Kristo. (2 Tim. 4:1, 2) Inaramidda daytoy, saan laeng a gapu ta annongenda, no di ket gapu iti naayat a tarigagayda a mangidayaw iti Dios ken mangipakaammo kadagiti sabsabali ti namnama iti pannakaisalakan. (Ara. 13:47-49) Gapu ta amin a nagbalin nga adalan ket nagaramidda met a mismo kadagiti adalan idi agangay, napartak ti irarang-ay ti kongregasion Kristiano idi umuna a siglo.—Ara. 5:14; 6:7; 16:5.
3 Pumarpartak ti Trabaho a Panagaramid-Adalan: Ti kadaklan pay laeng a trabaho a panagaramid-adalan ket maar-aramid iti daytoy maika-20 a siglo! Iti agdama, minilion a tattao ti nangawat iti naimbag a damag ken nagtignay maitunos iti dayta. (Luc. 8:15) Yantangay dandanin agngudo ti agdama a sistema ti bambanag, impaayannatayo “ti matalek ken masirib nga adipen” kadagiti alikamen a mangpapartak iti panangadal dagiti nasingpet panagpuspusona a tattao iti kinapudno.—Mat. 24:45.
4 Idi 1995 inawattayo ti libro a Pannakaammo a Mangiturong iti Biag nga Agnanayon, ket idi 1996 sinaruno daytoy ti broshur nga Ania ti Kalikaguman ti Dios Kadatayo? Maipapan iti libro a Pannakaammo, kastoy ti kuna ti Enero 15, 1996 a ruar Ti Pagwanawanan, panid 14: “Mapagadalan daytoy 192-panid a libro iti ababa a panawen, ket dagidiay ‘siuumiso a maikari iti agnanayon a biag’ rumbeng a masursuruanda a naimbag babaen ti panangadal iti dayta tapno makapagdedikarda ken Jehova ken mabautisaran.”—Ara. 13:48.
5 Ti Hunio 1996 a suplemento Ti Ministeriotayo iti Pagarian a “No Kasano ti Panagaramid Kadagiti Adalan Babaen ti Libro a Pannakaammo,” impaayna kadatayo daytoy a kalat: “Agpannuray iti kasasaad ken kaalisto ti estudiante, nalabit masaklawyo dagiti kaaduan a kapitulo iti maysa a sesion iti maysa nga oras wenno nasursurok, a di agap-apura iti panagadal. Nasaysayaat ti panagrang-ay dagiti estudiante no agpadpada nga itungpal ti mangyad-adal ken ti estudiante ti tulaganda nga agadal iti kada lawas.” Intuloy ti artikulo: “Manamnama nga iti kanito a ti tao nakompletonan nga adalen ti libro a Pannakaammo, agminarton ti kinapasnek ken kinapinget ti interesna nga agserbi iti Dios.” Kastoy ti inlawlawag ti “Saludsod” iti Oktubre 1996 a Ministeriotayo iti Pagarian: “Manamnama nga iti ababa a tiempo, matulongan ti epektibo a mannursuro ti napasnek nga estudiante a gumun-od iti umdas a pannakaammo a mamagdesision kenkuana nga agserbi ken Jehova.”
6 Epektibo ti Libro a Pannakaammo: Idi mabautisaran ti maysa nga agkabannuag a babai, insalaysayna ti riknana maipapan iti panangadal iti libro a Pannakaammo. Medio nabayag met nga inadalna ti libro nga Agbiag nga Agnanayon. Idi nairuar ti libro a Pannakaammo, inyallatiw ti sister a mangyad-adal kenkuana iti baro a libro. Di nagbayag, natarusan ti estudiante a daytoy ti mangkalikagum iti panagdesisionna, ket natignay a mangpapartak iti irarang-ayna manipud idin. Dayta nga agkabannuag a babai, a kabsattay itan, kunana: “Ti libro nga Agbiag nga Agnanayon tinulongannak nga agayat ken Jehova, ngem ti libro a Pannakaammo tinulongannak nga agdesision nga agserbi ken Jehova.”
7 Imutektekanyo no kasanot’ kabiit a naadal ti sabali pay a babai ti kinapudno. Kalpasan ti maikadua a panagadalna, nakigimong idiay Kingdom Hall kabayatan ti bisita ti manangaywan ti sirkito. Iti dayta a lawas, kabayatan ti maikatlo a panagadalna, imbagana iti manangaywan ti sirkito a nagdedikaren ken Jehova ket kayatnan ti agbalin a di bautisado nga agibumbunannag. Nakisarita kadagiti panglakayen, a nangaprobar kenkuana kas agibumbunannag, ket iti simmaganad a lawas nangrugin nga agserbi idiay tay-ak. Napalalo ti kinaanepna nga agadal iti Biblia ken nagbakasion pay iti trabahona tapno makapagadal iti mamindua wenno mamitlo iti kada lawas ken tapno ad-adu ti mabusbosna a tiempo iti ministerio. No dadduma, saklawenda ti dua wenno tallo a kapitulo iti kada sesion. Rinugianna nga inyaplikar ti maad-adalna iti amin nga aspeto ti panagbiagna, naileppasna ti libro a Pannakaammo iti uppat a lawas, sa nagpabautisar!
8 Deskribiren ti asawa ti maysa a sister ti bagina a dati a “gagangay a di manamati nga asawa.” Maysa nga aldaw, intukon kenkuana ti maysa a kabsat a lalaki nga adalenna ti Biblia babaen iti libro a Pannakaammo a ti kondision ket mabalin nga isardeng ti lalaki kalpasan ti umuna a panagadal wenno iti uray ania a kanito kalpasan dayta. Immanamong ti asawa a lalaki a padasenna, nupay dina impasnek ti nagadal idi agtutubo pay ken di nagadal iti aniaman a narelihiosuan a literatura kabayatan ti nasurok a 20 a tawen. Aniat’ reaksionna iti panagadal iti libro a Pannakaammo? Kinunana: “Pudno a makaparagsak a makita a nakasimsimple ti pannakaisurat daytoy a katulongan iti panagadal iti Biblia. Nakalawlawag ken lohikal ti pannakaipresenta ti impormasion isu nga iti di nagbayag, segseggaak unay idin ti sumaganad a panagadalmi. Sinurot a naimbag ti nangyadal kaniak dagiti metodo iti panangyadal nga imbalabala ti Sosiedad, ket iti tulong ti espiritu ni Jehova, nabautisaranak kalpasan ti uppat a bulan. Pudno a maikunak a no patanorentay ti ayattayo iti panagaramid kadagiti adalan, itultuloytay a biroken dagiti nasingpet panagpuspusona a tattao iti tay-ak ti ministerio, usarentay ti libro a Pannakaammo ken dadduma pay a katulongan iti panagadal iti Biblia nga ipapaay ti Sosiedad, ken kangrunaanna, no ikararagtay ti panangiwanwan ni Jehova, mabalintay ti maaddaan iti naisangsangayan unay a pribilehio a tumulong iti panagaramid kadagiti adalan.” Pudno a naisalsalumina dagiti nadakamat a kapadasan. Kaaduan nga iyad-adalantayo saan a kasta ti kapartakda a mangadal iti kinapudno.
9 Nagduduma ti Kapartak ti Irarang-ay Dagiti Estudiante: Masapul a bigbigen a nagduduma ti abilidad agpadpada dagiti mannursuro ken estudiante ti Sao ti Dios. Mabalin a mabayag wenno napartak ti naespirituan nga irarang-ay. Dadduma nga estudiante rumang-ayda iti sumagmamano laeng a bulan idinto ta mabaybayag ti irarang-ay ti dadduma. Ti edukasion a naragpat ti maysa a tao, ti kadakkel ti apresasionna iti naespirituan a bambanag, ken ti kauneg ti debosionna ken Jehova isut’ mangapektar iti naespirituan nga irarang-ayna. Saan nga amin nga iyad-adalantayo ket addaan “ti napalalo unay a kinagagar ti panunot” a mangadal iti Kasuratan iti inaldaw, a kas ti kinagagar dagidi nagkauna a taga Berea a nagbalin a manamati.—Ara. 17:11, 12.
10 Dayta ti gapuna a ti suplemento ti Abril 1998 a Ministeriotayo iti Pagarian a “Kasapulan—Ad-adu Pay a Panangyadal iti Biblia,” ipaayna daytoy realistiko a panangiwanwan: “Siempre, saan nga agpapada ti kapartak ti irarang-ay ti tunggal estudiante iti Biblia. Dadduma dida matulad ti kinaanep dagiti sabsabali iti naespirituan wenno nakapkapuyda a mangtarus kadagiti maisuro kadakuada. Okupado unay ti dadduma ket dida maiwayaan ti tiempo a kasapulan tapno mawanas ti intero a kapitulo iti kada lawas. Gapuna, iti dadduma a kaso nalabit kasapulan a saan a pampaminsanen nga adalen ti maysa a kapitulo ken kasapulan ti kanayonan a bulan tapno maileppas ti libro.”
11 Dagiti Agar-aramid iti Adalan Salimetmetanda ti Natimbeng a Panangmatmat: Nasken a tingitingentayo ti kapartak ti panagadal sigun kadagiti sirkumstansia ken abilidad ti estudiante. Yantangay maiparparegta kadatayo nga irugitay ti panangyadal iti broshur a Kalikaguman, mabalin a masaklaw dayta iti dua agingga iti tallo a bulan sakbay nga umallatiw iti libro a Pannakaammo. No iyaplikartay amin a singasing a naibalabala iti suplemento ti Hunio 1996 a Ministeriotayo iti Pagarian, mabalin a kasapulan ti sabali pay nga innem agingga iti siam a bulan a panangileppas iti libro a Pannakaammo. Dagiti dadduma a kairugrugida ti panagadal iti libro a Pannakaammo inyallatiwda iti broshur a Kalikaguman tapno matulongan ti estudiante a mangadal a naparpartak kadagiti pamunganayan a kinapudno ti Biblia. Kalpasanna intuloyda ti panagadal iti libro a Pannakaammo. No mairugi ti panagadal iti libro a Pannakaammo ket nasayaat ti panagprogresona, mabalin a makagunggona nga adalen ti broshur a Kalikaguman apaman a mairingpas ti libro, iti kasta dagus a mairepaso dagiti pamunganayan a kinapudno iti Sao ti Dios. Iti aniaman a kasasaad, ditay kayat nga isakripisio ti nalawag a panangtarus ti estudiante gapu laeng iti kinapartak. Kasapulan ti tunggal estudiante ti natibker a pundasion ti kaipaspasdek a pammatina iti Sao ti Dios.
12 Yantangay ammotay ti ayantayo iti agus ti panawen, ad-adda a naganat ita ti panangtulong kadagiti sabsabali a mangammo iti kinapudno. Malaksid iti agtultuloy a panangikararag a makairugi kadagiti baro a panangyadal iti Biblia, ikararagantay dagidiay makipagad-adalen kadatayo. Iti kasta pagrag-oantayto ti agtultuloy a panangpabautisar iti ad-adu pay nga adalan “iti isuamin nga al-aldaw agingga iti panungpalan ti sistema ti bambanag.”—Mat. 28:20.