Awan Sarday a Panangiwaragawag iti Naimbag a Damag
1 Impasnek dagiti nagkauna a Kristiano ti ministerioda. Inreport ni Lucas: “Iti tunggal aldaw idiay templo ken iti binalay-balay nagtultuloyda nga awan sardayna a mangisursuro ken mangidekdeklara iti naimbag a damag maipapan iti Kristo, a ni Jesus.” (Ara. 5:42) Awan, uray pay pannakaidadanes, ti nakalapped kadakuada! (Ara. 8:4) Inaldaw a nakisaoda kadagiti sabsabali maipapan iti kinapudno.
2 Datayo met ngay? Saludsodanyo ti bagiyo: ‘Mariknak kadi ti kinaganat ti tiempo? Agduyosak kadi nga agtultuloy a mangiwaragawag iti naimbag a damag nga awan sardayna?’
3 Dagiti Moderno-Aldaw nga Ulidan iti Panangasaba nga Awan Sardayna: Naidalit iti iron lung ti maysa a kabsat a babai, a biktima ti polio. Saanna a kabaelan ti mapan iti Kingdom Hall wenno tumabuno iti asamblea. Ngem, iti unos ti 37 a tawen a pannakaidalitna, 17 a tattao ti natulonganna a mangammo iti kinapudno! Kasanona a naaramid dayta? Nupay di makapamalaybalay, nakasarak iti pamay-an a mangasaba iti inaldaw iti di pormal kadagidiay umasideg kenkuana.
4 Nasken a sarangten dagiti kakabsattayo idiay Bosnia ti gubat ken kinakurapay. Nupay kasta, regular nga agtultuloy a kaskasabaanda dagiti sabsabali. Idiay Sarajevo, nakapromedio iti 20 nga oras dagiti agibumbunannag kada bulan iti panangasaba, ken agpromedio iti dua a panagadal iti Biblia ti ikonkondukta ti tunggal maysa.
5 Naregta met dagiti agtutubo iti ministerio. Idiay Rwanda, naipupok ti maysa a pamilia dagiti Saksi iti maysa a siled a sadiay nakasagana dagiti soldado a mangpapatay kadakuada. Kiniddaw ti pamilia nga agkararagda pay nga umuna. Napatgan daytoy, ket nagkararag iti napigsa ti ubing nga anak a babai, ni Debora: “Jehova, iti daytoy a lawas nakapaimakami ken Papa iti lima a magasin. Kasano pay a masublianmi dagitoy a tattao tapno isuro kadakuada ti kinapudno ken tulongan ida a gumun-od iti biag?” Gapu iti nabileg a pammati ken ayatna iti ministerio, nasalbar ti intero a pamilia.
6 Kadagitoy nga aldaw, kasapulan a naalibtaktayo kadagiti gundaway a mangasaba ken mangbirok kadagidiay “siuumiso a maikari iti agnanayon a biag.” (Ara. 13:48) Depende iti lokal a kasasaad, iyurnos dagiti panglakayen ti kongregasion ti inggrupo a panangasaba iti agsapa, malem, wenno rabii. Mangipaay dagiti artikulo Ti Ministeriotayo iti Pagarian, asamblea sirkito, ken kombension distrito kadagiti naintiempuan a singasing ken pammaregta a makiraman iti nagduduma a wagas ti panangikasaba iti Pagarian. Mainayon iti daytoy, sanayen dagiti manangaywan iti sirkito ken distrito dagiti agibumbunannag iti panangasaba iti lansangan, ipakitada no kasano ti mangasaba iti lugar ti negosio, ken mangisingasingda iti dadduma pay a wagas ti panangpaneknek iti sadinoman a pakasarakan kadagiti tattao. Igunamgunam amin dagitoy: Awan sarday a panangiwaragawag iti naimbag a damag!
7 Situtured a kinuna dagiti apostol ni Jesus: “Dikam mabalin ti agsardeng nga agsao maipapan kadagiti bambanag a nakita ken nangngegmi.” Kasanoda a nakapagibtur iti laksid ti amin a tubeng? Nagpatulongda ken Jehova, ket “isuda amin napnoda iti nasantuan nga espiritu ket situtured a sasawenda idi ti sao ti Dios.” (Ara. 4:20, 29, 31) No pudno a tarigagayantayo nga iwaragawag ti naimbag a damag nga awan sardayna ken igaedtayo nga aramiden dayta iti inaldaw, tulongannatayo ni Jehova.