Panagtultuloy iti Ministeriotayo nga Awanan Ressat
1 Ti langa daytoy lubong isut’ napardas iti panagbaliwna bayat nga agturturongen iti tiempo ti panungpalan. (1 Cor. 7:31) Kas kaitungpalan dagiti padto ti Biblia, maar-aramiden dagiti makapakintayeg a paspasamak ditoy lubong. Bayat nga utoben dagiti mapaspasamak nga agpadpada iti lubong nga aglawlawtayo ken iti teokratiko nga organisasion, pudno a patgentayo no kasano iti kinaganat ti panangikasaba “iti naimbag a damag” ti Pagarian.—Mar. 13:10.
2 Ni Jesu-Kristo a mismo, ti nangted iti bilin kadagiti disipulona. (Mat. 28:19, 20) Serioso ti panangawat dagiti disipulo ni Jesus iti saona, nga uray naipasango kadakuada iti nakaro nga ibubusor, “nagtultuloyda nga awanan ressat a nangisuro ken nangiwaragawag iti naimbag a damag maipapan ken Kristo, ni Jesus.” (Ara. 5:42) Anian a nagsayaat nga ehemplo kadatayo!
3 Bayat a basaentayo iti 1990 a Yearbook, makitatayo a binendisionan ni Jehova ti ministeriotayo babaen iti nawadwad a panagadu dagiti disipulo. Kadagiti dadduma a pagilian dagiti naireport a panagrang-ay ket pudno a nagpaiduma unay. (Isa. 60:22) Ngem kasano met ngay iti lokal a teritoriatayo? Ken kasano met iti tunggal maysa a ministeriotayo? Itultuloytayo met laeng iti bukodtayo a regta a maipaay iti ministerio nga awan sardayna?
TI PASETTAYO A TUNGGAL MAYSA
4 Sibabatad, saan nga amin a teritoria ket agpapada ti kinabungada. (Maidilig iti Mateo 13:23.) Adu dagiti bumusor iti dadduma a deppaar, ket iti sabsabali a lugar naaleng-aleng ken awan panangipangag dagiti tattao iti mensahe ti Pagarian. Iti sabsabali pay a lugar, adu dagiti trabahador iti tay-ak ngem bassit ti teritoria a madappatan. Ngem iti aniaman a tipo iti teritoria ti asakentayo, ti regtatayo ket saan koma nga agkibaltang. Insurat ni apostol Pablo, “Ditay koma sardengan iti panagaramid ti naimbag, ta inton tiempona agapittayto no ditay maupay.” (Gal. 6:9) Ania ti tumulong kadatayo nga agtultuloy iti ministeriotayo nga awan ressatna?
5 Makapagtalinaedtayo nga aktibo ken maaramid a naballigi ti ministeriotayo no agtalektayo ken Jehova ken agsadagtayo iti bilegna a tumulong kadatayo. Kanayon nga adda iti panunottayo a ni Jehova ti mamagbalin iti tay-ak a nabunga. (1 Cor. 3:6) Kas sungbat iti kararagtayo a maipaay iti tulong, ipaay ni Jehova ti balakad, praktikal nga instruksion, ken nawadwad nga abasto iti literatura ti Biblia a maipaay nga usarentayo a bumadang iti dadduma a mangammo kenkuana. Gundawayanyo met laeng dagitoy a paraborna?
SALIMETMETANYO TI UMISO A KAPANUNOTAN
6 No addaantayo iti negatibo a kapanunotan, mabalin a serioso dayta a lapped iti nabunga a ministerio. Dayta a kapanunotan ti isarming iti tono dagiti timektayo, ti langatayo, ken kurang a panagsagana a maipaay iti tay-ak ti serbisio. Inaklontayo ti komision a mangasaba ken mangisuro, ket saan pay a naibaga kadatayo a nalpasen iti trabaho. Ti tarigagaytayo nga agtulnog ken agpakumbaba iti nadiosan a panangiturong isu koma ti mangtignay kadatayo nga agtultuloy iti ministeriotayo nga awan sardayna.
7 Itultuloytayo ngarud itan ti makiraman iti rag-o ti ministerio ken kumita iti masakbayan a maipaay iti agnanayon a bendision kadagiti tattao ti Dios no idemostratayo iti pammati ken ayattayo a makidanggay iti awan ressatna a ministerio.