Makiraman iti Trabaho a Saanton a Maulit
1 Iti nadumaduma a panawen iti pakasaritaan ti tao, kasapulan nga ukomen ni Jehova dagiti kabusorna. Nupay kasta, gapu iti asina, inikkanna dagiti nalinteg-panagpuspusona iti gundaway a maisalakan. (Sal. 103:13) Agpannuray ti pagtungpalanda iti tignayda.
2 Kas pagarigan, sakbay ti Layus, idi 2370 K.K.P., maysa ni Noe a “manangaskasaba iti kinalinteg.” Nadadael dagidi di nangikankano iti nadibinuan a pakdaar. (2 Ped. 2:5; Heb. 11:7) Sakbay ti pannakadadael ti Jerusalem idi 70 K.P., nalawag nga imbaga ni Jesus no ania ti rebbeng nga aramiden ti maysa tapno makalasat inton dumteng ti pannakarbek ti siudad. Nakas-ang ti nagbanagan dagidi di nangipangag iti pakdaarna.—Luc. 21:20-24.
3 Trabaho a Panangpakdaar iti Kaaldawantayo: Nabayagen nga impakaammo ni Jehova nga ibulosnanto ti pungtotna iti agdama a dakes a sistema ket dagidiay laeng naemma ti makalasat. (Sof. 2:2, 3; 3:8) Maib-ibusen ti panawen a pannakaikasaba daytoy a pakdaar! Sumungsungaden ti “dakkel a rigat,” ket maur-urnongen dagiti naemma. Kinapudnona, “dagiti taltalon . . . purawdan a maipaay iti pannakaani.” No kasta, awanen ti napatpateg ken nagangganat a trabaho ngem iti daytoy.—Mat. 24:14, 21, 22; Juan 4:35.
4 Iti kaaldawantayo, masapul a makiramantayo a mamakdaar kadagiti sabsabali, ‘uray dumngegda wenno madida.’ Maysa daytoy nga annongen nga inted ti Dios a masapul a ditay iyaleng-aleng. (Ezeq. 2:4, 5; 3:17, 18) Ti naan-anay a pannakiramantayo iti daytoy a trabaho ipakitana ti nauneg a panagayattayo iti Dios, napaypayso a pannakaseknan kadagiti kaarrubatayo, ken ti di maisin a pammatitayo ken Jesu-Kristo a Manangisalakan kadatayo.
5 Itan ti Tiempo nga Agtignay: Kalpasan dagiti napalabas a panangukom ni Jehova, rimsua latta ti kinadakes agsipud ta aktibo pay laeng ni Satanas ken dagiti demoniona. Nupay kasta, naiduma ita. Mapukawto ti impluensia ni Satanas. Uray kaano saanton a kasapulan ti sangalubongan a panangipakdaar maipapan iti sumungsungad a “dakkel a rigat.” (Apoc. 7:14; Roma 16:20) Addaantay iti naisangsangayan a pribilehio a makiraman iti trabaho a saanton a maulit. Itan ti tiempo a gundawayantay a naan-anay daytoy.
6 Maipapan iti panangaskasabana, kinuna ni apostol Pablo: “Nadalusak iti dara dagiti amin a tattao.” (Ara. 20:26) Dina narikna a nakabasol iti dara maigapu iti aniaman a nagkuranganna a mangipaay iti pakdaar. Apay a saan? Agsipud ta naikunana maipapan iti ministeriona: “Gapu itoy a panggep pudno unay nga agtartrabahoak a sipipinget, nga umag-agawaak.” (Col. 1:29) Tagiragsakentay met koma ti kasta a pannakapnek iti naan-anay a pannakiraman iti trabaho a saanton a maulit!—2 Tim. 2:15.