Kualipikado ken Nakabalan a Mangisuro Kadagiti Sabsabali
1 Idi nadutokan ni Moises kas pannakabagi ni Jehova, nariknana nga isu ket saan a kualipikado a mangipakaammo iti sao ti Dios ken Faraon. (Exo. 4:10; 6:12) Impalgak ni Jeremias a kurang ti panagtalekna iti bagina nga agserbi kas mammadto ni Jehova, nga imbagana iti Dios a dina ammo ti agsao. (Jer. 1:6) Nupay kurang ti talekda idi damo, agpada a nagbalin dagitoy a mammadto a natured a saksi a maipaay ken Jehova. Ti Dios ti namagbalin kadakuada a naan-anay a kualipikado.
2 Kadagitoy nga aldaw, pagyamanan ken Jehova, addaantayo iti kasapulan a mangitungpal iti ministeriotayo a buyogen ti panagtalek. (2 Cor. 3:4, 5; 2 Tim. 3:17) Kas iti maysa a kualipikado a mekaniko nga addaan iti kompleto a rimienta, siuumiso a nakabalantayo a mangitungpal a sisisigo iti naituding a ministeriotayo. Iti Enero itukontayo ti bassit nga edision ti libro nga Agbiag nga Agnanayon. Nupay saan a baro daytoy a libro, maysa daytoy a nasayaat a katulongan iti panangisuro a makatulong kadagiti tattao a mangammo iti kinapudno. Mabalinyo nga usaren dagiti sumaganad a naisingasing a presentasion.
3 Mabalin nga usaren ti suheto maipapan iti edukasion a mangtukay iti interes iti Sao ti Dios. Mabalinyo nga irugi ti saritaan babaen ti panangikuna iti kastoy:
◼ “Maipagpaganetget ita ti panagkasapulan iti de kalidad nga edukasion. Iti opinionmo, ania a kita ti edukasion ti masapul a gun-oden ti maysa a tao tapno masagrapna a naan-anay ti ragsak ken balligi iti biag? [Palubosanyo a sumungbat.] Agnanayon a gunggona ti masagrap dagidiay gumun-od iti pannakaammo ti Dios. [Basaenyo ti Proverbio 9:10, 11.] Naibasar daytoy bassit a libro iti Biblia. Ipakitana ti kakaisuna a gubuayan ti pannakaammo a mangiturong iti biag nga agnanayon.” Basaenyo ti umuna a sasao iti parapo 19 iti panid 15 ti libro nga Agbiag nga Agnanayon. Itukonyo ti libro ken iyurnosyo ti panagsubliyo.
4 No sarungkaranyo ti bumalay a nakasaoyo maipapan iti pateg ti edukasion iti Biblia, mabalinyo a kunaen:
◼ “Iti napalabas nga isasarungkarko, nagsaritaanta ti Biblia kas gubuayan ti edukasion a mangipasigurado iti agnanayon a masakbayantayo. Siempre, kasapulan ti pinget iti panangadal iti kasapulantayo nga ammuen manipud Kasuratan. [Basaenyo ti Proverbio 2:1-5.] Adu a tattao ti marigatan a mangtarus iti dadduma a paset ti Biblia. Kayatko nga idemostra kenka iti apagbiit ti maysa a pamay-an nga us-usarenmi a tumulong kadagiti tattao a mangammo iti ad-adu pay maipapan iti pamunganayan a sursuro ti Biblia.” Apagbiit nga idemostrayo ti panagadal iti Biblia, nga usarenyo dagiti panglukat a parapo ti libro. No tarigagayan ti bumalay ti maaddaan iti regular a panagadal, ibagayo nga agsublikayto iti sumaruno a lawas tapno maituloy. Kalpasanna iti maitutop a tiempo, mabalinyo nga iyallatiw ti panagadal iti libro a Pannakaammo a Mangiturong iti Biag nga Agnanayon.
5 Adu a tattao ti mariribukan iti panagsagaba dagiti minilion nga ubbing ditoy lubong. Nalabit a matulonganyo ti bumalay a mangtarus no kasano ti panangmatmat ti Dios iti daytoy a parikut, babaen ti panangikuna iti kastoy:
◼ “Awan duadua a nakabasakan kadagiti damag maipapan kadagiti ubbing iti intero a lubong nga agbisbisin, masaksakit, ken nabaybay-an. Apay a di kabaelan dagiti maseknan nga organisasion a pasayaaten ti kasasaad? [Palubosanyo a sumungbat.] Imutektekam ti kari ti Dios agpadpada kadagiti agtutubo ken nataengan, kas nailanad iti Biblia. [Basaenyo ti Apocalipsis 21:4.] Mangipaay daytoy a libro iti kanayonan a detalye maipapan iti maysa a lubong nga aramiden ti Dios a sadiay agsardengton ti panagsagaba.” Ipakitayo ti maysa nga ilustrasion a mangiladawan iti Paraiso, nalabit iti panid 12 ken 13 wenno 156-7, ket pagsaritaanyo dayta. Itukonyo ti libro, ket iyurnosyo ti sumaruno nga isasarungkaryo.
6 No nagsaritaanyo idi damo ti maipapan iti panagsagaba dagiti ubbing, iti sumaruno nga isasarungkaryo mabalinyo nga ituloy ti saritaan babaen ti panangikuna iti kastoy:
◼ “Idi addaak ditoy iti napalabas, nayebkasmo ti pannakaseknan iti sasaaden dagiti ubbing nga agsagsagaba gapu iti nasinasina a pagtaengan, bisin, sakit, ken kinaranggas. Makaliwliwa a basaen iti Biblia ti maipapan iti maysa a lubong nga awanton agpadpada dagiti ubbing ken nataengan nga agsagaba gapu iti sakit, ut-ot, wenno ipapatay. Iladawan ti maysa a padto iti libro ni Isaias ti nasaysayaat a biag a dumteng ditoy daga.” Basaen ken ilawlawagyo ti Isaias 65:20-25. Itukonyo ti panagadal iti Biblia.
7 Tangay gagangay kadagiti relihioso a tattao ti panagkararag, mabalinyo a rugian ti saritaan iti daytoy a topiko babaen ti panangikuna iti kastoy:
◼ “Napaspasaranen ti kaaduan kadatayo dagiti problema iti biag a nangtignay kadatayo nga agkararag iti Dios tapno dumawat iti pannaranay. Ket kaskasdi, adu ti makarikna a saan a masungsungbatan dagiti kararagda. Agparang pay ketdi a saan a maipangpangag dagiti relihioso a papangulo a mangikarkararag iti talna. Makunatayo dayta agsipud ta agtultuloy ti panagrigat ti sangatauan gapu iti gubat ken kinaranggas. Pudno kadi nga ipangag ti Dios dagiti kararag? No ipangagna, apay nga adu a kararag ti kasla saan a masungsungbatan? [Palubosanyo a sumungbat.] Ilawlawag ti Salmo 145:18 no ania ti kasapulan tapno masungbatan dagiti kararagtayo. [Basaenyo ti kasuratan.] No kasta, masapul a napasnek dagiti kararag iti Dios ken maitunos iti kinapudno a masarakan iti Saona, ti Biblia.” Ukagenyo ti libro nga Agbiag nga Agnanayon iti kapitulo 27, ket ipakitayo no ania ti kunana maipapan iti pateg ti kararag. Itukonyo ti libro ken iyurnosyo ti panagsubliyo tapno pagsaritaanyonto pay dayta.
8 No surnadanyo ti napalabas a saritaan maipapan iti kararag, mabalinyo nga ipadas daytoy a pamay-an:
◼ “Tinagiragsakko daydi panagsaritata maipapan iti kararag. Awan duadua a makaiwardas kenka ti kapanunotan ni Jesus maipapan iti no ania ti ikararag.” Basaenyo ti Mateo 6:9, 10, nga ipakitayo dagiti kangrunaan a pakaseknan a dinakamat ni Jesus iti modelo a kararagna. Idemostrayo ti panagadal iti kapitulo 27 iti libro.
9 No maipapan iti panangiranud iti pannakaammo ti Dios kadagiti sabsabali, maisaludsodtayo, “Siasino ti makaanayen a kualipikado kadagitoy a bambanag?” Sumungbat ti Kasuratan: ‘Datayo.’—2 Cor. 2:16, 17.