Panangtulong Kadagiti Pamilia a Maaddaan iti Manayon a Masakbayan
1 “Nasayaat ti agum,” kinuna ti maysa a kapitalista iti agturpos a klase iti kolehio, sana innayon: “Nasayaat latta ti riknam uray no agagumka.” Gagangay daytoy no kasano nga itantandudo ti lubong ti panagimbubukodan a kas wagas ti panangsigurado iti masakbayan. Maigidiat unay, insuro ni Jesus a ti maysa a Kristiano masapul a “paglikudanna ti bagina . . . ta ania ti magunggonanto ti maysa a tao no magun-odna ti intero a lubong ngem mapukawna ti kararuana?” (Mat. 16:24-26) Tapno maaddaan iti manayon a masakbayan, masapul nga ipamaysa ti maysa a tao ti intero a biagna iti panangaramid iti pagayatan ti Dios—ti kapatgan a kalat para kadagiti pamilia ita. (Sal. 143:10; 1 Tim. 4:8) Dayta a mensahe ti linaon ti maudi a kapitulo ti libro a Ti Sekreto ti Kinaragsak iti Pamilia. Tumulong daytoy baro a publikasion kadagiti pamilia a mangkita iti pudpudno a napateg iti biag. Iti Marso, ania ti mabalintay nga ibaga tapno maallukoy dagidiay makasaotayo nga agbasa iti libro a Kinaragsak iti Pamilia? Adtoy ti sumagmamano a singasing:
2 Iti ruangan man wenno iti lansangan, mabalinyo a padasen nga usaren ti tract a “Tagiragsakenyo ti Biag ti Pamilia” a pangirugi iti saritaan. Mabalinyo nga isaludsod:
◼ “Iti kaadu ti pakaringgoran kadagitoy a tiempo, ti panagkunayo posible ngata ti maaddaan iti pudpudno a naragsak a biag ti pamilia? [Palubosanyo a sumungbat.] Ipanamnama kadatayo daytoy a tract a posible dayta. Kayatyo kadi a basaen?” No awatenna, mabalinyo nga ituloy a kunaen: “Tangay interesadokayo iti daytoy a banag, mabalin a kayatyo met a basaen daytoy a libro a mangted iti detalyado a pammagbaga no kasano a masarakan ti kinaragsak iti pamilia.” Ipakitayo dagiti linaon ti libro a Kinaragsak iti Pamilia. Dakamatenyo ti sumagmamano a paulo ti kapitulo. Ukagenyo iti panid 10, sayo basaen ti maudi a sasao ti parapo 17 agingga iti ngudo ti parapo 18. Itukonyo ti libro. Iyurnosyo ti panagsubliyo tapno pagsaritaanyonto pay dayta.
3 Mabalinyo a surnadan daydi damo a saritaan maipapan iti naragsak a biag ti pamilia babaen ti panangikuna iti kastoy:
◼ “Adda kayatko nga ipakita kadakayo iti libro nga innalayo nga iti panagkunak ket magustuanyo. Ilawlawag ti maudi a kapitulo ti napaypayso a sekreto ti kinaragsak iti pamilia. [Basaenyo ti parapo 2 iti panid 183.] Imutektekanyo a ti tulbek isu ti sangsangkamaysa a panangaramid iti pagayatan ti Dios. Irekomendami a sangsangkamaysa koma nga adalen dagiti pamilia ti Biblia tapno maammuanda no ania ti pagayatan ti Dios ken no kasano nga ipatungpal dayta iti sangakabbalayan. Mangituktukonkami iti libre a panagadal iti Biblia a maturpos iti las-ud ti sumagmamano laeng a bulan. No palubosandak, idemostrak kadakayo no kasano a maikondukta.” Iti panagsubliyo, itugotyo ti broshur nga Ania ti Kalikaguman ti Dios Kadatayo? wenno ti libro a Pannakaammo, depende no ania ti ad-adda a maitutop.
4 No makasaoyo dagiti kaklaseyo idiay eskuelaan wenno dagiti agtutubo iti teritoria, mabalin nga aginteresda no isaludsodyo daytoy:
◼ “Kasano kapateg kadagiti nagannak ken annak ti kanayon a panagsasarita? [Palubosanyo a sumungbat.] Imutektekam no ania ti kuna daytoy a libro iti biag ti pamilia maipapan iti ‘Napudno ken Nawaya a Komunikasion.’ [Basaenyo ti intero a parapo 4 ken ti umuna a sasao ti parapo 5 iti panid 65 iti libro a Kinaragsak iti Pamilia.] Mangipaay dagiti sumaganad a parapo kadagiti praktikal a singasing no kasano a mapasayaat ti komunikasion iti pamilia. No kayatmo a basaen daytoy a libro, mabalinmo ti maaddaan iti kopia iti bassit a kontribusion.” Ibagayo nga agsublikayto tapno ammuenyo no ania ti makunana iti nabasana.
5 Mabalinyo a surnadan daydi damo a pannakisaritayo iti maysa nga agtutubo maipapan iti komunikasion iti nagbabaetan dagiti nagannak ken annak babaen ti panangikuna iti kastoy:
◼ “Apresiarek ti panaginteresmo iti kinapateg ti nasayaat a komunikasion iti pamiliayo. Ania ti pagarupem a kapatgan a banag a rumbeng a pagsasaritaan dagiti nagannak ken annak?” Palubosanyo a sumungbat. Kalpasanna ukagenyo ti panid 68 iti libro a Kinaragsak iti Pamilia, sayo basaen ti sungbat iti umuna a kagudua ti parapo 11. “Ti linawas a panagadal iti Biblia ket maysa a nagsayaat a wagas ti pananggun-od iti pannakaammo maipapan iti Dios.” Ipakitayo ti broshur nga Ania ti Kalikaguman ti Dios Kadatayo? Ilawlawagyo a mangipaay dagiti 16 a leksion a linaonna iti simple a pakasimpuonan ti mensahe ti Biblia. Basaenyo ti introduksion iti panid 2, sayo itukon a rugianyo nga adalen ti umuna a leksion.
6 No maysa nga ama wenno ina ti madanonyo iti balay, wenno iti parke, mabalin a matukayyo ti interesna babaen ti panangikuna iti kastoy:
◼ “Masiguradok nga umanamongkayo a talaga a maysa a karit ita ti panangpadakkel kadagiti annak. Ania ti pagarupyo a mangsalaknib iti pamiliayo manipud kadagiti dakes nga impluensia? [Palubosanyo a sumungbat.] Adtoy ti nagsayaat a balakad a magustuak.” Dakamatenyo ti ilustrasion iti parapo 1 sayo basaen ti parapo 2 iti panid 90 iti libro a Kinaragsak iti Pamilia. Ilawlawagyo no kasano a mangipaay daytoy iti natimbeng a pammagbaga a talaga nga epektibo a mangsalaknib kadagiti pamilia manipud kadagiti makadadael nga impluensia. Itukonyo ti libro sayo iyurnos ti panagsubliyo tapno pagsaritaanyo dagiti aniaman a saludsod a mabalin a tumaud.
7 Iti maikadua nga isasarungkaryo iti maysa nga ama wenno ina a nangala iti libro a “Kinaragsak iti Pamilia,” mabalinyo nga ituloy ti saritaan iti kastoy a wagas:
◼ “Iti daydi damo a panagsaritata, makitak a talaga a maseknankayo kadagiti annakyo ken kayatyo a salakniban ida manipud kadagiti dakes nga impluensia. Mabalin a saanyo pay a nabasa, ngem adda nagpateg a punto iti libro nga imbatik kadakayo a basaenyo koma. [Basaenyo ti parapo 19 iti panid 59.] Ti pannakirelasion iti Dios kaipapananna ti panangammo kenkuana babaen kadagiti binulong ti Biblia. Kayatyo kadi nga idemostrak no kasano ti panagadalmi iti Biblia a sangapamiliaan?”
8 Dagiti mammagbaga ti lubong saanda a maipakita kadagiti pamilia ti dalan nga agturong iti kinaragsak no di ket sigurado a paayenda laeng ida. Sisasaknap nga intay iwaras ti Kinaragsak iti Pamilia tapno ti Sao ti Dios matulonganna dagiti tattao iti uray sadinoman a maaddaan iti naragsak ken manayon a masakbayan.—1 Tim. 6:19.