Iburay Kadagiti Sabsabali Ti Sekreto ti Kinaragsak iti Pamilia
1 Ti pamilia isu ti pundasion ti natauan a kagimongan, ket ti pamilia ti mangbukel kadagiti barangay, siudad, probinsia, ken intero a nasion. Nakakarkaro ita ti pannakaparigat ti pamilia. Pagpegpeggaden dagiti nabileg a puersa ti mismo a kaadda ti biag ti pamilia. Anian a yamantayo ta ni Jehova, ti Diseniador ti urnos ti pamilia, impaayannatayo kadagiti instruksion tapno magun-odtayo ti kinaragsak iti pamilia! Dagidiay mangsurot kadagiti pagalagadanna makitada a bumassit dagiti parikut ken mangibunga iti naballigi a pamilia. Iti Setiembre pribilehiotayo nga iburay kadagiti sabsabali ti libro a Ti Sekreto ti Kinaragsak iti Pamilia. Dakayo ti mangiruangan iti pannakisaritayo kadagiti tattao maipapan iti biag ti pamilia. Mannakigayyemkayo koma, positibo, ken mannakaawat. Ania ti mabalinyo a kunaen?
2 Mabalinyo a rugian babaen ti panangibangonyo iti saludsod a kas iti:
◼ “Mapaliiwyo kadi nga adu ti pamilia a marigrigatan a mangibtur kadagiti pakarikutan iti biag? [Palubosanyo a sumungbat.] Ipakita dagiti report nga adu ti tattao a marigrigatan iti pagtaengan. Panagkunayo aniat’ makatulong kadagiti pamilia tapno ad-adda a tumibker ken agragsakda? [Palubosanyo a sumungbat.] Yantangay ti Dios ti nangipasdek iti urnos ti pamilia, saan kadi a nainkalintegan a sukimaten dagiti intedna a pagalagadan? [Basaenyo ti 2 Timoteo 3:16, 17.] Naibalabala ti kasta a makagunggona nga instruksion iti daytoy a libro, Ti Sekreto ti Kinaragsak iti Pamilia.” Kalpasanna pagsaludsodanyo ti indibidual no ania ti pagarupenna a kaaduan a parikut iti pamilia, ipakitayo ti kapitulo a mangisalaysay iti dayta a parikut, sa itukonyo ti libro.
3 Iti panagsarungkar, pagbalinenyo a kalat ti mangirugi iti panagadal iti Biblia babaen ti panangibagayo:
◼ “Pinampanunotko ti naikunayo maipapan iti biag ti pamilia, ket intugotankayo iti maysa a banag a pagarupek a tagiragsakenyo. [Ipakitayo ti broshur a Kalikaguman, iturongyo iti panid 16, ken basaenyo dagiti innem a saludsod iti ngato.] Nabatad, tunggal maysa iti pamilia masapul nga aramidenna ti rebbengenna tapno adda kinaragsak iti pamilia. No adda tiempoyo uray apagbiit laeng, mabalinko nga idemostra no kasano a makagunggona unay kadakayo daytoy nga impormasion.” Kalpasanna irugiyo nga adalen ti leksion 8.
4 Ti maysa pay a wagas a panangirugi iti pannakisarita isut’ panangdakamatyo iti parikut, nalabit babaen ti panangibagayo:
◼ “Nupay kalikagumantay amin a tagiragsaken ti kinakontento ken pannakapnek, agparang a di matagiragsak daytoy ti adu a pamilia. Panagkunayo aniat’ makatulong kadakuada a mangbirok iti napaypayso a ragsak? [Palubosanyo a sumungbat.] Nabayagen nga impalgak ti Biblia dagiti parikut a makitatayo ita kadagiti pamilia. [Basaenyo ti 2 Timoteo 3:1-3.] Nupay kasta, ibaga met ti Biblia no aniat’ aramiden dagiti pamilia tapno marisutda dagitoy a parikut ken tapno magun-odda ti manayon a ragsak. Nailanad dagiti prinsipiona iti daytoy a libro, Ti Sekreto ti Kinaragsak iti Pamilia.” Kalpasanna ipakitayo ti pangrepaso a kahon iti ngudo ti maitutop a kapitulo, basaenyo dayta, sa itukonyo ti libro.
5 Inton agsublikayo, usarenyo ti broshur a “Kalikaguman” a mangirugi iti panagadal. Mabalinyo a kunaen:
◼ “Maragsakanak ta kayatyo a sukimaten dagiti prinsipio ti Biblia nga agaplikar iti biag ti pamilia. Ipakita ti kapadasan a ti panangsurot iti praktikal a balakad a masarakan iti Biblia kasayaatan ti ibungana. Adtoy ti simple a panangilawlawag no apay a kasta.” Basaenyo ti umuna a parapo ti leksion 1 iti broshur a Kalikaguman, a pakairamanan ti Salmo 1:1-3 wenno Isaias 48:17, 18. No ipalubos ti gundaway, usigenyo ti nabati pay a paset ti leksion. Ibagayo nga agsublikayto tapno adalenyo ti sumaganad a leksion.
6 Maipapan Kadagiti Kontribusion: No agipaimakayo kadagiti literatura, agalikakakayo kadi no dadduma a mangdakamat iti kiddawentayo a kontribusion para iti literatura? Nasayaat no laglagipentayo a napateg dagiti literaturatayo, ken nangina ti pannakayimprentada. Gapuna kayattay a siguraduen a mailawlawagtayo ti boluntario a trabahotayo ken ti makagapu iti panagkiddawtay iti kontribusion. Daytoy ti makatulong kadakuada a mangutob a saantayo nga aglaklako iti literatura ken mangted kadakuada iti gundaway a mangipaay iti bassit a kontribusion iti sangalubongan a trabahotayo.
7 Kas pagarigan, kalpasan a maitukonyo ti libro a “Kinaragsak iti Pamilia,” mabalinyo nga ibaga daytoy:
◼ “Maar-aramid dagiti literaturami babaen kadagiti boluntario a trabahador ken masupsuportaran babaen kadagiti boluntario a kontribusion. Dayta ti makagapu no apay nga agkiddawkami iti bassit a kontribusion a tumulong iti pannakalitup dagiti nagasto iti panagimprenta ken dagiti materiales kasta met iti pannakaipatulod daytoy a literatura iti intero a lubong. Ti kontribusionyo makatulongto iti sangalubongan a trabahomi ken tumulongto pay kadagiti sabsabali tapno umawatda iti kastoy a nagsayaat nga impormasion.” Babaen iti kastoy a presentasion, makapagtalektayo nga apresiarenda ti literatura ket dida kunaen nga aglaklakotay laeng iti libro.
8 Ikagumaantayo koma nga iburay kadagiti sabsabali ti sekreto a mangiturong iti kinaragsak iti pamilia—a surotentayo dagiti instruksion a nailanad iti Sao ti Dios.—Sal. 19:7-10.