Agtultuloy a Surotenyo ni Jesus
1 Kinuna ni Jesus: “No ti asinoman kayatna ti sumurot kaniak, paglikudanna koma ti bagina ket ibaklayna ti kayona a pagtutuokan ket agtultuloy a surotennak.” (Mat. 16:24) Sigurado a kayattayo nga ipangag a sipopositibo ti sasao ni Jesus. Usigentayo no ania ti nainaig iti tunggal sasao a nadakamat iti awisna.
2 “Paglikudanna Koma ti Bagina”: Idi indedikartayo ti biagtayo ken Jehova, pinaglikudantayo ti bagitayo. Ti kangrunaan a kaipapanan ti Griego a sao a naipatarus a “paglikudanna” ket “panangibaga iti saan.” Dayta kaipapananna ti situtulok a panangisuko kadagiti ambision, tarigagayan, pagnam-ayan, ken bukod a pagragsakan, a determinado a mangparagsak ken Jehova iti agnanayon.—Rom. 14:8; 15:3.
3 “Ibaklayna ti Kayona a Pagtutuokan”: Ti Nakristianuan a panagbiag kaipapananna ti panangibaklay iti kayo a pagtutuokan, nga isu ti panagserbi ken Jehova buyogen ti panagsakripisio. Ti maysa a pamay-an a panangipakita iti espiritu ti panagsakripisio ket ti panangaramid ti maysa iti amin a kabaelanna iti ministerio. Agingga iti daytoy a tawen, tagtagiragsaken ti adu nga agibumbunannag ti trabaho a panag-auxiliary pioneer. Nalabit maysaka kadagitoy ken mapasingkedam a napatpateg dagiti bendision a magun-odmo ngem kadagiti sakripisiom. Dagidiay di makapag-auxiliary pioneer masansan nga iyurnosda ti mangbusbos iti ad-adu a tiempo iti trabaho a panangasaba kas agibumbunannag iti kongregasion. Gapu iti dayta, mangyes-eskediul ti dadduma a kongregasion iti kanayonan a taripnong maipaay iti panagserbi iti tay-ak iti tiempo a kombeniente kadagiti agibumbunannag. Naaddaan met ti dadduma iti nagsasayaat a resulta idi inyat-atiddogda pay bassit ti agserbi iti tay-ak ken mangasaba iti ‘maysa pay a balay’ wenno agtrabaho iti ‘sumagmamano pay a minuto.’
4 Ti maysa pay a wagas a panangipakita iti espiritu ti panagsakripisio ket ti panangipasdek kadagiti personal a kalat. Babaen ti naannad a panagplano ken panangibagay iti eskediulda, nakapag-regular pioneer dagiti dadduma. Nayurnos ti dadduma dagiti aktibidadda tapno umakarda iti lugar a dakdakkel ti pakasapulan kadagiti agibumbunannag iti Pagarian.
5 “Agtultuloy a Surotennak”: Nupay adu ti nakasuotan dagiti adalan ni Jesus, napabilegda iti regta ken kinaandurna iti ministerio. (Juan 4:34) Nariknada a napabaro ti espirituda iti kaaddana. Dayta ti makagapu no apay a makita ti napaypayso a rag-o kadagidiay simmurot kenkuana. (Mat. 11:29) Agpipinnaregtatayo met koma tapno makapagibtur iti kapapatgan a trabaho a panangikasaba iti Pagarian ken panagaramid-adalan.
6 Sapay koma ta agtignaytayo amin a sipopositibo iti awis ni Jesus a sumurottayo kenkuana nga agtultuloy babaen ti panangpatanor iti espiritu ti panagsakripisio. Bayat nga aramidentayo dayta, maaddaantayo iti dakkel a rag-o itan ken ad-adu pay a bendision iti masanguanan.