Saludsod
◼ Kasano ti panangmatmat iti panagserbi kas auxiliary payunir?
Masapul a matmatan ti panag-auxiliary payunir kas maysa a pribilehio ken maysa a serioso a responsabilidad. Pinullo a ribo nga agibumbunannag iti kada bulan ti nadutokan kas auxiliary payunir, ket dadduma kadakuada ti agpatpatuloy. Komendarantayo dagitoy a naregta nga agibumbunannag a ti kasasaadda ket palubosanna ida a mangusar iti kasapulan a 60 oras iti tay-ak ti serbisio iti kada bulan kas panagserbida nga auxiliary payunir. Dagiti panglakayen ken dadduma masapul a paregtaenda dagiti agibumbunannag a nagaplikar kas auxiliary payunir a tratuenda ti pannakadutokda a serioso ken liklikanda iti aniaman nga annayas ti pananglaglag-an.
Kas dagiti regular payunir, dagidiay agboluntario nga auxiliary payunir iti maysa wenno nasursurok a bulan ti masapul a mangkuenta nga umuna iti magasto. (Luc. 14:28) Ramanenna daytoy ti panangpattapatta a nasakbay iti tiempo no manamnama a mausarna ti kasapulan a kawadwad iti tiempo idiay tay-ak ti ministerio a saanna a maliwayan dagiti Kristiano a pagrebbengenna. Ti desision iti maysa a tao nga agpalista kas auxiliary payunir ti masapul a maaramid kalpasan iti sikakararag a panangusigna ti personal a sasaadenna. Saan koma a maiguyyo laeng babaen ti emosion wenno rikna gapu ta dagiti dadduma ket nagaplikarda. Masapul a nainkalintegan a desision, a mapakuyogan iti naisurat nga iskediol a mangitungpal kadagiti kasapulan. Nasken a basaen a siaannad ti aplikasion ken kedngan dayta manipud iti puso ken sipupudno a kunaenna ti wen no ania iti ragpaten.
Siempre, ti kanayonan a regget ket ramanenna. Dagiti dadduma a bulan bayat ti tawen isudat’ mamagbalin kadakuada nga “okupado unay” iti panangikasaba ti naimbag a damag. (Ara. 18:5) Iramanna daytoy ti tiempo iti Memorial ti Marso, Abril, ken Mayo ken dagiti bulan a bumisita iti manangaywan ti sirkito iti kongregasion. Adu nga agibumbunannag ti siraragsak a mangdisiplina ti bagida a sumurot iti nabannog nga iskediol tapno maipaayda ti ekstra a pannakiraman iti panangasaba a trabaho bayat dagitoy a periodo ti espesial nga aktibidad, nga ipateg dagiti nabaknang a bendision a masansan nga isut’ maibungana. (2 Cor. 9:6) Adu nga agibumbunannag ti mangikagumaan nga agpayunir bayat iti bulbulan ti bakasion ken aniaman a bulan iti tawen nga addaan ti lima a ngudo iti lawas. Ngem no agaplikarda, patgenda koma ti panangalagad iti prinsipio a ‘Bay-an a ti Wenyo ket kaipapananna iti Wen’ babaen ti panangaramid iti kasayaatanda nga agreport ti 60 wenno nasurok nga oras iti kada bulan ti panagserbida nga auxiliary payunir.—Mat. 5:37.
Dagiti agibumbunannag a saanda kabaelan iti agpayunir ti makatulong babaen iti panangilugarda ti bagbagida a makipagtrabaho kadagiti auxiliary payunir, nga iyurnosda iti makikuyog kadakuada. Makatulong ti kaaddada iti serbisio a napapaut a kadua dagiti payunir agingga ti mabalin. Nalabit a patgen dagiti payunir iti suportar dagiti dadduma nga agibumbunannag bayat ti agsapa unay, iti mumalem, wenno ti rumabii. Maragsakan dagiti auxiliary payunir no maawisda nga agsarungkar ken mangirugi iti panagadal ti Biblia iti pagtaengan. Dagidiay a makasuportar kadagiti auxiliary payunir ti manamnama nga agapit iti dakdakkel a ragsak nga aggubbuay ti pannangted.—Ara. 20:35.
Ti kinagaget iti biang dagiti adu nga auxiliary payunir ti napasnekan iti pannakaipategda. Dagidiay a makabael a makitimpuyog kadakuada ti mangnamnama iti nabaknang a bendision. (Prov. 10:4) Kaano ti sumaganad a pannakiramanyo iti napaadu nga aktibidad kas auxiliary payunir?