Silulukat ti Dakkel a Ruangan iti Trabaho
1 Kas naregta a manangaskasaba iti naimbag a damag, inggaed ni Pablo ti nagbirok kadagiti teritoria nga ad-adda nga agkasapulan, a maysa kadagita ti siudad ti Efeso. Naballigi ti panangasabana sadiay isu a kastoy ti insuratna kadagiti padana a Kristiano: “Naluktan kaniak ti maysa a dakkel a ruangan a mangiturong iti panagaramid.” (1 Cor. 16:9) Intultuloy ni Pablo ti nagserbi iti dayta a teritoria ket adu ti natulonganna a taga Efeso a nagbalin a manamati.—Ara. 19:1-20, 26.
2 Itatta, naluktan kadatayo ti dakkel a ruangan iti trabaho. Maawistayo a tumulong kadagiti kongregasion a dida mawanas a naan-anay amin a teritoriada iti tunggal tawen. Iti kasta ti panagreggettayo masulnitanna ti panagkasapulan kadagita a lugar.—Idiligyo ti 2 Corinto 8:13-15.
3 Makapagserbikayo Kadi Kadagiti Lugar nga Ad-adda nga Agkasapulan? Inut-utobyo kadin a buyogen ti kararag ti posibilidad a panagserbi iti sabali a lugar? Nalabit saanen a kasapulan nga umakarkayo no adda kongregasion nga agkasapulan iti tulong iti mismo nga iliyo. Apay a diyo ibaga dayta iti manangaywan iti sirkito ket ammuenyo ti isingasingna? Wenno nalabit iti mismo a teritoria ti kongregasionyo, di la ket ta adu ti agnanaed a tuleng wenno sabali ti pagsasaoda nga awan mangaskasaba kadakuada. Tapno mataming daytoy a pakasapulan, mabalinyo kadi nga ikagumaan nga adalen ti pagsasaoda? Mainayon pay, nalabit addan sabali ti pagsasaona a grupo wenno kongregasion nga asideg kadakayo nga ‘agpakpakaasi iti Apo iti ad-adu pay a managobra ti Pagarian.’ (Mat. 9:37, 38) No kasta, mabalinyo kadi ti agboluntario?
4 Kadagiti kallabes a dekada, rinibu a pamilia dagiti Kristiano ti immakar iti sabsabali a pagilian tapno ad-adu ti maaramidanda iti trabaho a panagani. Kinuna ti maysa a pagassawaan a nangaramid iti kasta: “Kayatmi ti agserbi ken Jehova iti lugar nga ad-adda a makatulongkami.” No adda kastoy a tarigagayyo ket patienyo a kabaelanyo ti umakar iti sabali a lugar, iyumanyo pay nga umuna dagiti planoyo kadagiti panglakayen ti kongregasionyo.
5 No kayatyo ti agimtuod iti Sosiedad maipapan iti lugar nga agkasapulan, ipaayanyo ti Komite ti Serbisio ti Kongregasion iti maysa a surat a pakagupgopan ti espesipiko a tarigagayyo. Iragpinda dagiti komentoda sada ipatulod iti Sosiedad. Iti aniaman a kasasaad, bayat a silulukat pay ti dakkel a ruangan iti trabaho, sapay koma ta agtalinaedtayo amin nga okupado iti panagserbi ken Jehova.—1 Cor. 15:58.