Usarenyo a Naimbag Dagiti Handbill
1 Makatulong dagiti handbill ti kongregasion a mangipakaammo kadagiti tattao iti komunidad maipapan iti ayan ti Kingdom Hall ken ti umiso nga oras dagiti gimong. Nasayaat no ibatianyo ti kada tao a makasaritayo. Gapuna, rumbeng nga adu ti handbill nga abasto ti kada kongregasion. No baliwan dagiti kongregasion ti oras ti gimongda, agpedidoda koma kadagiti baro a handbill tapno kanayon nga adda abastoda a nakailanadan ti agdama nga oras dagiti gimongda. Mausar iti daytoy ti Handbill Request form. No addan kadakayo dagiti handbill, kasano ti kasayaatan a panangusar kadagitoy?
2 Nadiskobre ti adu nga agibumbunannag a ti panangipaima iti handbill ket epektibo a wagas tapno mayam-ammoda ti bagida ken mairugida ti saritaan. No ipakitayo ti eskediul dagiti gimong wenno ti mensahe iti bangirna mabalin a mangiruangan iti saritaan maipapan iti trabahotayo ken ti panggep daytoy. Mabalin a pakiramanen dagiti nagannak dagiti annakda iti ministerio no pagitukonenda ida iti handbill. Dagiti agibumbunannag a mangaskasaba babaen iti surat mangiragpinda koma iti handbill iti suratda ken awisenda dayta a tao a tumabuno kadagiti gimong. Mabalin nga ibati dagiti handbill kadagiti pagtaengan nga awan ti madanon a tao, ngem maikabil koma a siaannad iti sirok ti ridaw tapno saan a makitkita.
3 Nakatulong dagiti handbill a nangiturong kadagiti nasingpet panagpuspusona a tattao iti kinapudno. Adda kapadasan maipapan iti maysa a babai a, gapu iti handbill, natungpal ti nabayagen a tinartarigagayanna a panangtarus iti Biblia. Kalpasan ti panagkarkararagna iti Dios iti maysa a rabii, kinabigatanna adda agassawa a Saksi a nagtimbre iti ruanganna. Idi simmirip, kinunana a saan a mabalin a luktan ti ruangan. Nangisuksok dagiti Saksi iti handbill iti sirok ti ridaw. Kastoy ti mabasa: “Ammuem ti Bibliam.” Nakitana dayta ket linuktanna ti ridaw. Nairugi a dagus ti panagadal, ket nabautisaran idi agangay. Sapay koma ta regular nga usarentay a naimbag dagiti handbill bayat a naan-anay nga itungpaltayo ti ministeriotayo, a ditay pulos tagtagibassiten ti bileg ti espiritu ti Dios.—Kitaenyo met ti Pebrero 1994 a Ministeriotayo iti Pagarian, panid 1.