Panangiparang ti Naimbag a Damag—Babaen Dagiti Tract ken Handbill
1 “Linabasak a sipapardas iti maysa a babai a nangipaima kaniak iti maysa a tract ti Biblia,” insurat ti maysa a lalaki iti Sosiedad. “Mabasa a, ‘Biag iti Maysa a Natalna a Baro a Lubong.’ Naladingitak sakbay a binasak daytoy, ngem kalpasanna napasarantaak ken naaddaanak ti talna.” Nagsurat daytoy a tao a maipaay iti kanayonan pay nga impormasion ken nagpedido iti Agbiag nga Agnanayon a libro.
2 Adu itan dagiti agdaydayaw ken Jehova ti nagutugot iti espiritual a panagnanamda babaen iti tract ken ti mensahe nga adda iti likudan iti handbill. Us-usarenyo kadi dagiti tract ken handbill iti ministerioyo? Adu dagiti mangar-aramid a kasta. Idiay laeng Brooklyn, nasurok a 122 a milion a Natalna a Baro a Lubong a tract ti naimaldit, agraman agarup a 250 a milion a kopia dagiti tallo a sabsabali a tract.
3 Ditay koma basbassiten iti bileg ti Sao iti Dios a nailawlawag kadagitoy nga abbaba a mensahe. (Heb. 4:12; maidilig iti Zacarias 4:10; Santiago 3:4, 5.) Maysa a Saksi idiay Arizona ti nagsurat: “Dagiti tattao ita ket saanda a kayat ti mataktak iti nawadwad unay a babasaen, ngem dagiti tract ket kalalainganna laeng iti kaatiddog dagiti napateg a mensaheda a mangpataliaw kadagiti tattao imbes a bumaw-ingda.”
4 Masansan nga agkitakit dagiti tattao a mangala ti literatura kadatayo. Ngem adu ti mangawat no tract laeng. Maysa a manangaywan iti sirkito ti addaan iti maysa a bassit a plastic a pagkargaan a mangipakita kadagiti tract, nga ipakitana kadagiti bumalay tapno pilienda iti kayatda.
ITI UMUNA NGA IDADANON
5 Nasarakan dagiti dadduma nga agibumbunannag a ti pannangted iti tract wenno handbill isut’ maysa a dalan ti pannakairugi iti saritaan. Babaen ti panangitukon iti maysa, ti maysa a bumalay nga agkedked nga manglukat iti ridaw ti mabalin a maguyugoy a mangaramid iti dayta. Ti panangipakita iti iskediol ti gimong idiay handbill isut’ manglukat met iti dana nga agturong iti diskusion maipapan iti trabaho ken panggeptayo.
6 No nalawag a ti bumalay ket kupado ken masikoran, nalabit a ti kasapulan ket maysa laeng a tract. Maysa a babai iti naliwliwa unay babaen iti tract maipapan iti namnama dagiti natay nga isut’ nagsuratanna iti Sosiedad a nagkiddaw iti kanayonan pay nga impormasion.
KADAGITI PANAGSARUNGKAR
7 Ti panagsarungkar kadagidiay nangipakita iti uray bassit laeng nga interes iti napalabas, mabalin a kunaen iti maysa: “Idi damo a nagsasabettayo, naragsakanak iti panangitiempoyo a nakisao maipapan iti Biblia. Adda kaniak ita iti kanayonan nga impormasion a patiek a makapainteres kadakayo. Isut’ masarakan iti daytoy a tract, Biag iti Maysa a Natalna a Baro a Lubong. No malagipyo pay, iti napalabas napagsaritaantayo maipapan ti naikari iti Biblia a pudno ken manayon a talna nga agpaay iti sangatauan. Nupay kasta, idinto ta adu ti mangpampanunot laeng iti langit no mabasada dagitoy a karkari, siputanyo iti Salmo 37:29 a mangiparangarang kadagitoy a bendision a maaramid ditoy rabaw ti daga. [Mabasa ti kasuratan, maipakita iti bumalay no sadino ti ayanna idiay tract.] Saan kadi a makaay-ayo dayta? [Malawlawagan pay dagiti adu a parapo.] Adu pay dagiti makaparegta a kasuratan iti daytoy a tract ken masarakanyo a makaparagsakda. Iti sumaruno nga iyaayko, nalabit a basaentayo manen dagiti dadduma pay kadagitoy a kas iti inaramidtayo ita.”
8 Kinapudnona, dagiti tract ken handbill ket regalo dagitoy manipud ken Jehova. Sapay koma ta usarentayo ida a siiepektibo iti dayawna ken iti agnanayon a bendision kadatayo.—Prov.22:29.