Maaramidantay Kadi Manen?—Mayawis Manen ti Panag-Auxiliary Pioneer
1 Maaramidantay kadi manen ti ania? Ag-auxiliary pioneer-tay kadi iti tiempo ti Memorial? Ti suplemento ti Pebrero 1997 a Ministeriotayo iti Pagarian inawisna ti atensiontayo iti napatak ti pannakaisuratna a paulo: “Kasapulan—20,000 nga Auxiliary Pioneer.” Ninamnamami idi nga ipapusoyo dayta nga awis. Idi napagtitiponen ti report ti serbisio iti Abril 1997, naragsakankami a nakaammo a 22,410 ti nag-auxiliary pioneer! No inayontayo iti dayta ti 14,869 a regular pioneer ken ti 456 nga special pioneer a nagreport iti dayta a bulan, makitatayo a 30 porsiento kadagiti amin nga agibumbunannag ti nagpayunir. Maaramidantay kadi manen iti daytoy a tiempo ti Memorial?
2 Sibabara a komendaranmi amin a nangikagumaan a nangparang-ay iti panagserbida iti tay-ak itay napan a tawen. Nabatad a natignaykay amin gapu iti nabuslon nga ayatyo ken Jehova a Dios ken iti kaarrubayo. (Luc. 10:27; 2 Ped. 1:5-8) Nakapag-auxiliary pioneer dagiti agibumbunannag a nagduduma ti kasasaadda. Iti maysa a kongregasion, naggigiddan a nagpayunir ti 51 nga agibumbunannag iti dayta a bulan, a pakairamanan ti kaaduan a panglakayen, maysa nga ina nga addaan iti tagibi a babai a 15 a bulanna pay laeng, maysa a sister a naglusulos iti pagtrabahuanna ken nangbirok iti paset-tiempo a trabaho tapno makapagpayunir, ken maysa a baketen a kabsat a dina pay pulos napadasan ti nagpayunir. Insurat ti manangaywan iti sirkito: “Maar-aramid ti naindaklan unay a panagregget iti trabaho a panangasaba. . . . Malaksid iti nagsayaat nga epekto daytoy iti teritoria, napalalo pay ti kinarayray dagiti kongregasion. Pagragsakan dagiti kakabsat ti ad-adda pay a panagiinnammoda ken ti pannakakitada kadagiti nagsayaat a resulta iti ministerio.”
3 Saan met a naipuera dagiti agtutubo itay napan a tawen. Sinegseggaan ti di bautisado nga agibumbunannag nga agtawen iti 13 ti panangisimbolona iti dedikasionna ken Jehova. Kalpasan a nabautisaran idi Pebrero, nagsurat maipapan iti tarigagayna nga ag-auxiliary pioneer iti Marso: “Tangay awanen ti makalapped kaniak, dagus nga intedko ti aplikasionko. . . . Saanmi koma a natagiragsak dagidiay a naruay ken nakaskasdaaw a kapadasan no saan a gapu iti naayat nga awisyo a panagpayunir. Agyamanak ken Jehova iti daytoy a pribilehio a pannakairamanko kadagidiay . . . a nangipangag.” Ti kalatna ket aramidennanto manen dayta.
4 Nalabit maysakayo kadagiti 22,410 a nag-auxiliary pioneer idi Abril, wenno kadagiti 13,690 idi Marso, wenno kadagiti 14,332 idi Mayo. Aramidenyo kadi manen iti daytoy a tawen? No dikay nakapagpayunir itay napan a tawen, maaramidanyo kadi iti daytoy a tawen? Malab-awantay ngata ti 22,410 iti daytoy nga Abril? Dayta ti kadaklan a bilang dagiti auxiliary pioneer iti aniaman a bulan iti sanga nga opisina ti Pilipinas.
5 Ipamaysa iti Abril ken Mayo: Iti daytoy a tawen, maangay ti Memorial inton Sabado, Abril 11, a mamagbalin iti Abril a nagsayaat a bulan para iti narangrang-ay a trabaho iti ministerio. (2 Cor. 5:14, 15) Kadagiti umuna a 11 nga aldaw iti bulan, ipamaysatay ti agawis iti adu nga interesado a tumabuno iti Memorial. No planoyo ti ag-auxiliary pioneer, pangngaasiyo ta itedyo ti aplikasionyo sakbay ti petsa a kayatyo a panangrugi.—1 Cor. 14:40.
6 Yantangay adda lima a ngudo ti lawas iti Mayo, nalaklaka ti panag-auxiliary pioneer dagiti agibumbunannag nga agtartrabaho iti amin-tiempo iti dayta a bulan. Babaen ti panangyeskediul iti sagsangapulo nga oras a panagserbi iti tay-ak iti tunggal maysa kadagita a lima a ngudo ti lawas, sangapulo laengen nga oras ti iyeskediulyo iti dayta a bulan tapno maabutyo ti makalikaguman nga 60 nga oras.
7 Bayat ti Abril ken Mayo, agitukontayo kadagiti suskripsion ken indibidual a kopia Ti Pagwanawanan ken Agriingkayo! Daytoy koma ti ad-adda a mangparegta pay kadatayo a mangikagumaan ken agpayunir. Apay a maikunatay ti kasta? Nalaka nga ipresenta dagiti magasin ken makaparagsak nga usaren iti ministerio. Nakasaysayaat nga usaren iti amin a kita ti serbisio—iti binalaybalay ken kadagiti tiendaan, kasta met no kasabaantayo dagiti tattao iti lansangan, kadagiti paradaan, ken kadagiti parke. Kangrunaanna, Ti Pagwanawanan ken Agriingkayo! itandudoda dagiti kinapudno ti Pagarian. Iturongda ti atension iti kaitungpalan ti padto ti Biblia, a pampaneknekanda nga agturturayen ti Pagarian ti Dios. Maapektaranda met ti kabibiag dagiti agbasbasa babaen ti panangusigda kadagiti pudpudno a kasapulan ti tattao. No sipapanunottayo no kasano a naapektaran ti biagtayo babaen kadagitoy a nagpapateg a warnakan, matignaytayo a makipaset iti kasaknapan a pannakaiwaras dagitoy iti Abril ken Mayo.
8 Kas panagsagana iti daytoy naparayray a trabaho a panagmagasin, magunggonaankayo no repasuenyo dagitoy nga artikulo: “Ti Pagwanawanan ken Agriingkayo!—Naintiempuan a Pagiwarnak ti Kinapudno” (Enero 1, 1994, Pagwanawanan), “Usaren Dagiti Magasintayo iti Kasayaatan” (Enero 1996 a Ti Ministeriotayo iti Pagarian), ken “Isaganayo ti Bukodyo a Presentasion iti Magasin” (Oktubre 1996 a Ti Ministeriotayo iti Pagarian).
9 Mangidaulo Dagiti Panglakayen: Tapno matulongan ti adu nga agibumbunannag a nagpayunir itay napan a tawen, dagiti panglakayen iti maysa a kongregasion pinagbalinda ti maysa a Sabado iti dayta a bulan kas naisangsangayan nga aldaw ti serbisio para iti intero a kongregasion. Nayurnos ti mamin-adu a panagtataripnong iti dayta nga aldaw, a nangipaay iti gundaway iti intero a kongregasion tapno mabalinda ti makiraman iti nadumaduma a kita ti panangasaba. Karaman kadagitoy ti panangasaba kadagiti lugar ti negosio, panangasaba iti lansangan, panagbalaybalay, panagsarungkar, panagsurat, ken panangasaba iti telepono. Naisangsangayan ti resultana, a 117 nga agibumbunannag ti nakiraman iti tay-ak ti serbisio iti dayta nga aldaw. Agdagup iti 521 ti oras a nabusbosda iti ministerio ken 617 ti naipaimada a magasin, broshur, ken libro! Nagtultuloy ti ragsak iti dayta a Sabado agingga iti Domingo, tangay daydiay pay laeng ti kangatuan a bilang dagiti timmabuno iti Miting Publiko ken Panagadal iti Pagwanawanan.
10 Iti kada Gimong ti Serbisio iti Abril ken Mayo, maipalagip koma iti kongregasion no kaano ken sadino ti pakaangayan dagiti taripnong maipaay iti panagserbi iti tay-ak iti umay a lawas, nangnangruna no adda dagiti kanayonan nga urnos malaksid kadagidiay gagangay a nakaeskediul. Maparegta dagiti regular pioneer kasta met dagiti agibumbunannag a saan nga auxiliary pioneer a suportaranda dagitoy nga urnos no ipalubos ti kasasaadda.
11 Masapul a kasarita ti manangaywan iti serbisio ti kabsat a mangyes-eskediul kadagiti teritoria tapno mayurnos ti pannakatrabaho dagiti saan unay a mawanwanas. Mabalin a maipaayan iti kanayonan nga atension dagidiay saan a madandanon kadagiti pagtaenganda ken ti panangasaba kadagiti lansangan ken kadagiti tiendaan. Mabalin nga ipaganetget ti panangasaba iti rabii. Rumbeng nga agpedido iti umdas a magasin para iti Abril ken Mayo kas panagsagana iti napalawa a trabaho.
12 Adu ti Agibumbunannag a Kualipikado: Kuna ti umuna a sasao iti aplikasion ti auxiliary pioneer: “Gapu iti ayatko ken Jehova ken iti tarigagayko a tumulong kadagiti sabsabali a mangammo kenkuana ken kadagiti naayat a panggepna, kayatko nga ad-adu pay ti maaramidak iti tay-ak ti serbisio babaen ti panag-auxiliary pioneer-ko.” Ti panagayat ken Jehova ken ti tarigagaytayo a tumulong kadagiti sabsabali iti naespirituan ket isu ti kababagas ti dedikasiontayo. (1 Tim. 4:8, 10) Tapno kualipikado nga ag-auxiliary pioneer, masapul a bautisado ti maysa a tao, addaan iti nasayaat a kababalin, ken kabaelanna nga ipaay ti 60 nga oras iti ministerio iti dayta a bulan. Bayat nga usigentay amin ti kasasaadtayo, makapagpayunir kadin iti Abril wenno Mayo iti daytoy a tawen dagiti dadduma kadatayo a saan pay a nakapadas a nagpayunir?
13 Nalabit mabigbig dagiti adu iti kongregasion a makapagpayunirda met no makitada nga agpayunir dagiti sabsabali nga addaan iti umasping a kasasaad. Nakapag-auxiliary pioneer a sibaballigi dagiti ages-eskuela nga annak, lallakay ken babbaket, amin-tiempo a trabahador, a pakairamanan dagiti panglakayen ken ministerial nga ad-adipen, ken dadduma pay. Ti asawa a babai nga addaan iti dua nga annak ken agtartrabaho iti amin-tiempo naabutna ti 60 nga oras, nakaipaima iti 108 a magasin, ken nakairugi iti 3 a panangyadal iti Biblia iti makabulan a panag-auxiliary pioneer-na. Kasano a naaramidanna dayta? Nangaskasaba iti kabangibang a teritoria kabayatan ti pangngaldaw idiay pagtrabahuanna, nangasaba babaen iti panagsurat, ken nangaskasaba kadagiti paradaan ken lansangan. Ginundawayanna met nga inusar ti bakasionna iti kada lawas babaen ti pannakitimpuyogna iti kongregasion iti tay-ak ti serbisio. Nupay impagarupna idi damo a di makapag-auxiliary pioneer, babaen ti pammaregta dagiti sabsabali ken praktikal nga eskediul, nadaeranna dagiti tubeng.
14 Impanamnama ni Jesus kadagiti adalanna: “Ti sangolko naasi ken ti awitko nalag-an.” (Mat. 11:30) Dayta ti paulo ti makaparegta nga artikulo iti Agosto 15, 1995, a Pagwanawanan. Dinakamatna ti maysa a sister nga addaan iti narikut, amin-tiempo a sekular a trabaho. Pinanunotna kadi a dina mabalin ti ag-auxiliary pioneer? Saan. Kinapudnona, nakapag-auxiliary pioneer iti binulan. Apay? Gapu ta nariknana a ti panagpayunir isut’ pudno a tumultulong kenkuana a mangtaginayon iti kinatimbengna. Ti panangtulong kadagiti tattao a mangammo iti kinapudno ti Biblia ken ti pannakakita iti panagbalbaliwda tapno anamongan ida ti Dios isut’ kadaklan a gubuayan ti rag-o iti okupado a panagbiagna.—Prov. 10:22.
15 Aniaman a personal a sakripisio ken panagbalbaliw a nasken a maaramid tapno makapagpayunir ket masupapakan iti nawadwad babaen kadagiti masagrap a bendision. Nagsurat ti maysa a sister maipapan iti kapadasanna a nag-auxiliary pioneer: “Tinulongannak nga agbalin a di agimbubukodan ken ad-adda a maipamaysak ti tumulong kadagiti sabsabali. . . . Irekomendak dayta kadagidiay makabael.”
16 Kasapulan ti Nasayaat nga Eskediul: Iti maudi a panid daytoy a suplemento, sinakarmi dagiti pagtuladan nga eskediul a nagparang iti Pebrero 1997 a Ti Ministeriotayo iti Pagarian. Nalabit maysa kadagitoy ti maibagay iti kasasaadyo. Bayat a repasuenyo dagitoy, usigenyo ti normal a rutina ti binulan nga aramidyo. Ania dagiti proyekto iti aglawlaw ti pagtaengan a mabalin nga aramiden sakbay ti panagpayuniryo wenno mabalin nga itantan pay laeng? Mabalin kadi a kissayan ti tiempoyo iti panaglinglingay, panagay-ayam, wenno dadduma pay a kita ti panagaliwaksay? Imbes a matmatanyo ti pakadagupanna nga 60 nga oras a kasapulan, iplanoyo ti eskediulyo iti inaldaw wenno linawas. Kasapulan laeng ti 2 nga oras iti maysa nga aldaw wenno 15 nga oras iti makalawas tapno makapag-auxiliary pioneer. Kitaenyo dagiti pagtuladan nga eskediul, mangalakayo iti lapis ken usigenyo no aniat’ mayurnosyo a personal nga eskediul iti serbisio a kasayaatan kadakayo ken iti pamiliayo.
17 Ti nagsayaat a panangipangag ken nawadwad a suporta ti kongregasion iti ministerio itay napan a tawen pinaganaygayna ti maysa a regular pioneer a nagsurat: “Pagyamanan unay iti naayat a pammaregtayo maipapan iti panangikagumaan a mangsuporta iti panag-auxiliary pioneer. . . . Dagiti insingasingyo nga eskediul natulonganna dagiti adu a di pay nakapadas a nagpayunir tapno mabigbigda a kabaelanda dayta. . . . Maragsakanak unay ta naikamengak iti organisasion ni Jehova ken sursurotek ti naragsak ken naayat a panangidalan ti matalek ken masirib nga adipen.”
18 Ipanamnama kadatayo ti Proverbio 21:5: “Dagiti pampanunot ti nagaget agduyosda laeng iti panagrang-ay.” Paregtaennatayo ti Proverbio 16:3: “Ikumitmo dagiti ar-aramidmo ken ni Jehova, ket dagiti pangpanggepmo mapasingkedandanto.” Wen, babaen ti panangiramantay ken Jehova iti desisiontayo buyogen ti panagkararag ken natibker a panagpannuraytay kenkuana a pagballigiennatayo, agbalintay a positibo kadagiti planotayo nga ag-auxiliary pioneer. Nalabit inton makitatayo a naballigi ti eskediultayo kalpasan ti maysa wenno dua a bulan a panag-auxiliary pioneer, mabalintayton a markaan ti kahon iti aplikasion ti auxiliary pioneer a kunana: “Ugedanyo ditoy no tarigagayanyo ti agtultuloy nga ag-auxiliary pioneer agingga iti sumaganad a pakaammo.” Sigurado a mabalintay a seggaan ti ag-auxiliary pioneer manen inton Agosto, tangay addanto lima a ngudo ti lawas. Bayat nga iringpastayo ti tawen serbisio inton Agosto, ikagumaantayto amin ti makiraman a naan-anay iti ministerio.
19 Impadto ni Jesus: “Ti mangalagad iti pammati kaniak, dayta met a maysa aramidennanto dagiti trabaho nga aramidek; ket aramidennanto dagiti trabaho a dakdakkel ngem dagitoy.” (Juan 14:12) Addaantayo iti naragsak a pribilehio nga agserbi kas katrabahuan ti Dios kabayatan ti naindaklan a pannakatungpal daytoy a padto. Itan ti tiempo a panangikasaba iti naimbag a damag buyogen ti napalalo a kinaganetget, a gatangentay ti nainggundawayan a tiempo tapno maaramidtayo daytoy a trabaho. (1 Cor. 3:9; Col. 4:5) Ti masansan a panagserbitayo kas auxiliary pioneer ket nagsayaat a wagas tapno maaramidtay ti pasettayo kas manangiwaragawag iti Pagarian. Segseggaantayo no kasanonto ti kinatibong ti kanta ti panagdaydayaw iti daytoy a tiempo ti Memorial manipud kadagiti auxiliary pioneer. (Sal. 27:6) No pampanunotentay dagiti nagapuanantayo idi napalabas a kalgaw, maisaludsodtayo, ‘Maaramidantay kadi manen?’ Mangnamnamatayo a maaramidantay dayta!
[Kahon iti panid 3]
Makapag-Auxiliary Pioneer-kayo Kadi?
“Aniaman dagiti personal a sirkumstansiayo, no maysakayo a nabautisaranen, ken nasayaat ti moral a takderyo, maiyurnosyo a maragpat dagiti pagannurotan a mangbusbos ti 60 nga oras iti maysa a bulan iti tay-ak ti ministerio ken patienyo a mabalinyo ti agserbi iti maysa wenno ad-adu pay a bulan kas auxiliary payunir, maragsakan dagiti panglakayen ti kongregasion a mangusig ti aplikasionyo iti daytoy a pribilehio ti serbisio.”—Organisado a Mangitungpal ti Ministeriotayo, panid 114.
[Kahon iti panid 6]
Eskediul ti Auxiliary Pioneer
Pagtuladan no Kasano nga Iyeskediul ti 15 nga Oras a Serbisio iti Tay-ak Kada Lawas
Agsapa—Lunes agingga iti Sabado
Mabalin nga isandi ti Domingo iti aniaman nga aldaw
Aldaw Tiempo Oras
Lunes Agsapa 2 1⁄2
Martes Agsapa 2 1⁄2
Mierkoles Agsapa 2 1⁄2
Huebes Agsapa 2 1⁄2
Biernes Agsapa 2 1⁄2
Sabado Agsapa 2 1⁄2
Dagup nga Oras: 15
Agmalmalem a Dua nga Aldaw
Mabalin a pilien ti aniaman a dua nga aldaw ti lawas
Aldaw Tiempo Oras
Mierkoles Agmalmalem 7 1⁄2
Sabado Agmalmalem 7 1⁄2
Dagup nga Oras: 15
Dua a Rabii ken Ngudo ti Lawas
Mabalin a pilien ti aniaman a dua a rabii iti lawlawasna
Aldaw Tiempo Oras
Lunes Rabii 1 1⁄2
Mierkoles Rabii 1 1⁄2
Sabado Agmalmalem 8
Domingo Kaguduat’ Aldaw 4
Dagup nga Oras: 15
Dagiti Malem iti Lawlawasna ken Sabado
Mabalin nga isandi ti Domingo iti aniaman nga aldaw
Aldaw Tiempo Oras
Lunes Malem 2
Martes Malem 2
Mierkoles Malem 2
Huebes Malem 2
Biernes Malem 2
Sabado Agmalmalem 5
Dagup nga Oras: 15
Ti Eskediulko a Mangasaba
Ikeddeng no mano nga oras iti tunggal tiempo
Araw Tiempo Oras
Lunes
Martes
Mierkoles
Huebes
Biernes
Sabado
Domingo
Dagup nga Oras: 15