Kasapulan—20,000 nga Auxiliary Pioneer
Makapag-Auxiliary Pioneer-kay Kadi iti Marso? Abril? Mayo?
1 Napauluan ti maysa nga artikulo a naipablaak iti Abril 1881 a ruar ti Watch Tower iti “Kasapulan ti 1,000 a Manangaskasaba.” Inawisna dagiti amin a dedikado a lallaki ken babbai, “a nangitalkan ti Apo iti pannakaammo iti kinapudnona,” a mangusar iti aniaman a tiempo a kabaelanda a makiraman iti panangisaknap iti kinapudno ti Biblia. Dagidiay makaipamaysa a mangipaay iti kagudua ti panawenda wenno nasursurok pay iti trabaho ti Apo naparegtada nga agboluntario kas colporteur nga ebanghelisador—ti awag idi kadagiti payunir.
2 Nupay nagbaliwen ti tiempo nanipud maika-19 a siglo, maysa a banag ti agtalinaed—kayat dagiti dedikado nga adipen ti Dios nga itultuloy nga usaren ti ad-adu a panawen aginggat’ mabalin iti panangisaknap iti naimbag a damag. Makatulong kadagiti agibumbunannag iti kongregasion ti panagserbi kas auxiliary pioneer a mangparang-ay iti kinaepektiboda bayat nga ad-adu a panawen ti usarenda iti ministerio iti Pagarian.—Col. 4:17; 2 Tim. 4:5.
3 Sipud pannakairusatna, rinibu a kakabsat ti mangtagtagiragsak iti panag-auxiliary pioneer. Rimmayray ti panaggagar iti daytoy nga uray la 21,567 ti nag-auxiliary pioneer iti Pilipinas idi Abril 1987! Manipud idin, saantayon a nakaireport iti 20,000 nga auxiliary pioneer iti maysa a bulan. Saan kadi a nagsayaat nga uliten daytoy a nasayaat a gapuanan babaen ti panangabut iti nasurok a 20,000 nga auxiliary pioneer iti Marso, Abril, ken Mayo, 1997?
4 Paregtaendakayo a pagbalinenyo a kalat ti panag-auxiliary pioneer iti maysa a bulan wenno nasursurok pay bayat ti Marso, Abril, ken Mayo. Apay a mairaman ti Marso? Agsipud ta ita a tawen maipatang ti Panglaglagip iti ipapatay ni Kristo iti Domingo, Marso 23. Awanen ti nasaysayaat pay a pangusarantayo kadagiti lawas kasakbayan ti Memorial ngem iti sireregta a pannakiraman iti trabaho a panangikasaba iti Pagarian nga inyussuat ni Jesu-Kristo nga Apo ken Manangisalakan kadatayo. Iti kadakkel ti panangsaksi a maipaay iti Marso, adu dagiti interesado a tao a mabalintay nga awisen a kaduatayo a manglaglagip iti ipapatay ni Kristo. Espesialto met ti Marso agsipud ta, iti kaunaan a gundaway, itampoktayto ti baro a libro a Ti Sekreto ti Kinaragsak iti Pamilia. Mainayon pay, adda lima a Sabado ken lima a Domingo iti bulan ti Marso, a mangipaay iti adu a gundaway a makiraman iti serbisio iti tay-ak iti ngudo ti lawas. Siempre, iti bulan ti Abril ken Mayo, itultuloytayo ti naregget a panagtrabaho iti ministerio tapno masubliantayo dagiti interesado ken makairugi kadagiti baro a panagadal iti Biblia iti pagtaengan, nga usarentayo ti broshur nga Ania ti Kalikaguman ti Dios Kadatayo? Wanasentay met a naimbag ti teritoriatayo, nangnangruna kadagiti ngudo ti lawas, nga itukontayo dagiti agdama a naintiempuan a ruar ti Pagwanawanan ken Agriingkayo!
5 Siasino Dagiti Kualipikado nga Ag-Auxiliary Pioneer?: Ilawlawag ti Organisado a Mangitungpal ti Ministeriotayo, panid 114: “Aniaman ti personal a kasasaadyo, no nabautisarankayon, nasayaat ti moral a takderyo, mayurnosyo a ragpaten ti makiddaw nga 60 nga oras iti maysa a bulan iti tay-ak ti ministerio ken namnamaenyo a mabalinyo ti agserbi iti maysa a bulan wenno ad-adu pay kas auxiliary pioneer, maragsakan dagiti panglakayen ti kongregasion a mangikonsiderar iti aplikasionyo iti daytoy a pribilehio ti serbisio.” Mayurnosyo kadi dagiti aramidyo tapno matagiragsakyo daytoy a pribilehio iti Marso? Abril? Mayo?
6 Tapno naballigi unay ti pannakaibanag daytoy nga awag para iti 20,000 nga auxiliary pioneer, kasapulan ti positibo a kababalin iti biang ti bagi dagiti panglakayen a mabuyogan iti naimpusuan a panangsuporta dagiti amin a dadduma pay nga agibumbunannag. (Heb. 13:7) Maparegta dagiti amin nga ulo ti pamilia a mangikeddeng no mano iti sangakabbalayanda ti makapag-auxiliary pioneer iti maysa wenno nasursurok pay kadagiti masungad a bulan.—Sal. 148:12, 13; idiligyo ti Aramid 21:8, 9.
7 Diyo koma ibaga a dagus a dikay makapag-auxiliary pioneer gapu iti amin-tiempo a panggedanyo, eskediul iti eskuelaan, rebbengen iti pamilia, wenno dadduma pay a Nainkasuratan nga obligasion. Mabalin a saan a kaskarina kadagiti dadduma ti makiraman; nupay kasta, babaen ti nasayaat nga urnos ken pammendision ni Jehova, maaramidanda dayta. (Sal. 37:5; Prov. 16:3) Ti koma tarigagayyo nga agserbi kas payunir ti mangkontrol iti kasasaadyo; diyo ipalubos a ti kasasaadyo ti mangkontrol iti tarigagayyo nga agpayunir. (Prov. 13:19a) Gapuna, buyogen ti nasged nga ayat ken Jehova ken kadagiti pada a tattao, adu ti makayurnos iti linawas nga aramidda tapno ad-adu ti magapuananda iti ministerio iti maysa a bulan wenno nasursurok pay. (Luc. 10:27, 28) Adu a bendision ti agur-uray kadagidiay naregget nga agserbi iti Pagarian.—1 Tim. 4:10.
8 Ti Magapuanan ti Panag-Auxiliary Pioneer: Dakkel a pakaidayawan ni Jehova ti amin-kararua a panagregget dagiti rinibu nga adipen ti Dios nga ag-auxiliary pioneer. Bayat nga aramiden dagitoy a manangiwaragawag iti Pagarian ti kabaelanda a mangisaknap iti naimbag a damag iti ad-adu pay a tattao, ad-adda a personal a sumingedda ken Jehova agsipud ta masursuroda ti agpannuray nga ad-adda kenkuana maipaay iti espiritu ken pammendisionna.
9 Naganaygay ti kongregasion no adda dagiti aktibo nga auxiliary, regular, ken special pioneer iti tengngatayo. Makaalis ti kinabarada bayat ti panangisarsaritada kadagiti kapadasanda iti tay-ak. Daytoy ti manggutugot kadagiti dadduma a mangusig iti kasasaadda tapno ad-adu ti maaramidanda iti ministerio. Adda maysa a kabsat a babai a nabautisaran idi agtawen iti 70 a dagus a nag-auxiliary pioneer a di simmarsardeng. Idi napagsaludsodan sumagmamano a tawen kalpasanna no apay nga iti dayta nga edadna, nakasasaet pay laeng iti ministerio kas auxiliary pioneer kada bulan, kinunana a ti panagriknana ket kas man la nasayang ti umuna a 70 a tawen ti panagbiagna, ket dina kayat a sayangen ti aniaman a natda pay a tawen ti panagbiagna!
10 Ad-adda nga agbalin a nasigo iti ministerio dagidiay ag-auxiliary pioneer. Inamin ti maysa nga agtutubo a saksi: ‘Idi ubingak pay laeng, kumuykuyogak idi kadagiti dadakkelko a mapan mangasaba. Talaga a makaay-ayo ti agserbi iti tay-ak. Nupay kasta, idi agangay nabigbigko nga idiay eskuelaan, naidumaak kadagiti kaaduan. Mabainakon a makisarita kadagiti padak nga estudiante maipapan iti kinapudno. Iti panangasaba kadagiti balbalay, maamakakon di la ket ta makatumpongak iti am-ammok idiay eskuelaan. Ti kunak, ti parikutko ket panagbuteng iti tao. [Prov. 29:25] Idi nagturposak, inkeddengko a padasek ti agpayunir. Kas resultana, naiduman ti panaggagarko a mangasaba. Saankon nga imbilang a pagpalpaliwaan, wenno makapadagsen. Iti pannakakitak kadagiti iyad-adalak iti Biblia a rumang-ay iti kinapudno, nariknak ti nauneg a pannakapnek iti pammaneknek a tultulongannak ni Jehova a Dios.’ Inlayon daytoy nga agtutubo ti agserbi kas regular pioneer.
11 Mawanas a naimbag ti teritoria no adu ti agserbi kas auxiliary pioneer iti kongregasion. Mabalin a kiddawen ti kabsat a para-ituding kadagiti teritoria ti tulong dagiti auxiliary pioneer iti panangwanas kadagiti lugar a manmano a matrabaho. No agbalon ken agmalmalem iti serbisio dagiti auxiliary pioneer, matrabahoda uray dagiti nasulinek a paset ti teritoria.
12 Kasapulan nga Agsagana a Nasaksakbay Dagiti Panglakayen: Iti las-ud ti sumaruno a tallo a bulan, adda koma maaramid nga eskediul para iti nadumaduma a kita ti panangasaba iti nadumaduma a tiempo ti lawas, agraman iti mumalmalem ken sardam, tapno ad-adu ti mabalin a makiraman. Iramanyo ti panangasaba kadagiti lansangan ken kadagiti lugar ti negosio, malaksid pay iti regular a panagbalaybalay. Iti panangaramid iti dayta, matulongan dagiti panglakayen dagidiay agpaypayunir a makiraman iti serbisio a kadua ti kongregasion iti tiempo a praktikal ken kombeniente unay iti eskediulda. Mapakaammuan koma a naimbag ti kongregasion maipapan iti amin nga urnos iti serbisio iti tay-ak. Nasayaat koma ti pannakaorganisar dagiti taripnong sakbay ti panangasaba. Kanayonanna, adda koma umdas a teritoria ken mapedido a dagus ti nawadwad a suplay ti magasin ken dadduma pay a literatura.
13 Mangaramidkayo iti Personal nga Eskediulyo iti Panagserbi: Kinuna ti maysa a kabsat a lalaki, nga idi damo bumdeng nga ag-auxiliary pioneer: “Nalaklaka nga amang gayam ngem iti impagarupko. Kasapulan laeng ti nasayaat nga eskediul.” Praktikal kadi kadakayo ti makitayo a pagtuladan nga eskediul ti auxiliary pioneer nga adda iti likud daytoy a suplemento? Ti panangyeskediul iti 15 nga oras laeng iti kada lawas ti makiddaw a panawen a busbosen dagiti auxiliary pioneer iti ministerio.
14 Tapno makapagserbida kas auxiliary pioneer, dagiti agtagibalay nga assawa ken dagidiay agtartrabaho iti malem ken rabii masansan a mabalinda nga iyeskediul ti agsapa para iti panagserbi iti tay-ak. Kaaduanna, dagiti ages-eskuela ken dagidiay mangmangged manipud tengnga ti rabii agingga iti parbangon mabalinda ti mangasaba no mumalmalem. Natakuatan dagiti mangmangged iti amin a tiempo a mabalinda ti agbakasion iti trabahoda iti maysa nga aldaw kada lawas wenno usaren ti intero a ngudo ti lawas iti ministerio, malaksid pay iti panangasaba iti rabii. Dagiti bulan nga addaan lima a Sabado ken Domingo ti pilien dagiti adu, a kaaduanna iti laeng ngudo ti lawas a makapagserbi iti tay-ak. Pudno dayta iti Marso, kasta met iti Agosto ken Nobiembre 1997. Iti panangusaryo iti blangko nga eskediul iti panid 6 a naipaay kas pagsurotan, nainkararagan nga usigenyo a naimbag no ania a personal nga eskediul ti panagserbi ti praktikal iti kasasaadyo.
15 Ti maysa a bentaha ti probision a panag-auxiliary pioneer ket maibagaybagay daytoy. Mabalinyo a pilien dagiti bulan a panagpayuniryo, ken makapagserbikayo a masansan no kayatyo. No kayatyo ti agtultuloy nga ag-auxiliary pioneer ngem diyo kabaelan, napanunotyo kadin ti agpalista iti kada maikadua a bulan iti las-ud ti makatawen? Iti sabali a bangir, kabaelan dagiti dadduma ti agtultuloy nga agserbi kas auxiliary pioneer iti napapaut a tiempo.
16 Pagtalaytayan nga Agturong iti Amin-Tiempo a Panagpayunir: Adu dagidiay addaan iti espiritu ti kinapayunir a mayat nga ag-regular pioneer, ngem pampanunotenda no ipalubos ti panawen, kasasaad, wenno salun-atda. Di pagduaduaan a pinagbalin nga umuna ti kaaduan kadagidiay regular pioneer itan ti panagserbi kas auxiliary pioneer a kas pagtalaytayan nga agturong iti amin-tiempo a trabaho. No nayonan ti maysa nga auxiliary pioneer ti eskediulna iti maysa laeng nga oras kada aldaw, wenno maysa nga aldaw kada lawas, posible a kabaelanna a suroten ti eskediul ti regular pioneer. Tapno maammuan no posible dayta kadakayo, apay a diyo padasen ti mangbusbos iti 90 nga oras iti ministerio iti maysa a bulan wenno nasursurok pay iti panag-auxiliary pioneer? Kagiddan dayta, maaddaankayo kadagiti sasarungkaran ken iyad-adalan iti Biblia, iti kasta matagiragsakyo ti balanse a ministerio iti kinapayunir.
17 Tinagiragsak ti maysa a kabsat a babai ti nag-auxiliary pioneer iti innem a tawen nga awan sardeng. Iti las-ud dayta a tiempo kalatna ti agserbi kas regular pioneer. Tapno maragpatna dayta, pinadasna ti uppat a nagduduma a trabaho bareng no makaparnuay iti kasasaad a makatulong kenkuana a mangragpat iti 90 nga oras a makiddaw kadagiti regular pioneer. Kada bulan, mangaramid iti maysa wenno dua nga eskediul tapno makarkulona no posible dayta. Ngem iti panangusigna kadagitoy, napattapattana a dina kabaelan ti amin-tiempo a ministerio. Ngem nagtultuloy latta a nagpaidalan ken Jehova. Ket maysa nga aldaw bayat nga agsagsagana para iti Gimong ti Serbisio, nabasana ti maysa nga artikulo iti Setiembre 1991 a Ti Ministeriotayo iti Pagarian a kunana: “Imbes a ti laeng makiddaw nga oras ti panunotenyo, apay a dikay ipamaysa ti atension iti ad-adu a gundaway a makiraman iti trabaho a panagurnong? (Juan 4:35, 36)” Kunana: “Naminlima wenno namin-innem ngata a binasak daytoy a binatog, ket masiguradok unay a daytoy ti sungbat ni Jehova. Iti dayta met laeng a kanito inkeddengko ti sumrek iti serbisio a kina-regular pioneer.” Nupay saan a kasayaatan ti eskediul ti part-time a trabahona, inyawatna ti aplikasionna kas regular pioneer. Maysa a lawas kalpasanna, nagbaliw ti eskediulna, ket apag-isu kenkuana ti naipaay nga oras ti trabahona. Kinunana: “Dikay kadi umanamong a maysa daytoy a bendision a naggapu ken Jehova?,” sana innayon: “No idawatyo ti panangidalan ni Jehova ket ipaayna dayta kadakayo, diyo itarayan—awatenyo.” No sipapasnek a tarigagayanyo ti ag-regular pioneer, nalabit inton agtapus ti tallo a bulan a panag-auxiliary pioneer iti Marso, Abril, ken Mayo, makombinsirkayo a mabalin nga agballigikayo met iti amin-tiempo a ministerio.
18 Masiguradotayo a bendisionan ni Jehova ti regta ken suportaranna ti panagregget ti ilina bayat nga iwarnakda ti naimbag a damag ti pannakaisalakan iti daytoy espesial a tiempo ti panagtrabaho iti kalgaw. (Isa. 52:7; Roma 10:15) Sungbatanyo kadi ti awag para iti 20,000 nga auxiliary pioneer babaen ti pannakiramanyo iti Marso? Abril? Mayo?
[Kahon iti panid 3]
No Kasano a Makapagballigi Kas Auxiliary Pioneer
■ Agtalekkayo nga agballigikayo
■ Ikararagyo ken Jehova a bendisionanna ti panagreggetyo
■ Mangawiskayo iti sabali pay nga agibumbunannag a kaduayo nga agpayunir
■ Mangaramidkayo iti praktikal nga eskediul ti panagserbi
■ Agpedidokayo iti umdas a suplay ti magasin
■ Suportaranyo dagiti urnos ti kongregasion iti panagserbi
■ Mangsapulkayo kadagiti gundaway a mangasaba a di pormal