Saludsod
◼ Apay a rumbeng nga ipaayantay iti naisangsangayan nga atension ti panagkawkawes ken panaglanglangatayo no agpasiartay kadagiti pasilidad ti Sosiedad idiay Brooklyn, Patterson, ken Wallkill, New York, ken kadagiti sanga nga opisina iti intero a lubong?
Manamnama kadagiti Kristiano a salimetmetanda ti umiso a panaglanglanga. Iti amin a tiempo, ti panagkawkawes ken panaglanglangatayo iyanninawna koma ti kinadesente ken dignidad a maikanatad kadagiti adipen ni Jehova a Dios. Nangnangruna a pudno daytoy no agpasiartayo kadagiti pasilidad ti Sosiedad idiay New York ken kadagiti sanga iti intero a lubong.
Kabayatan ti 1998, maangay dagiti kombension distrito ken internasional a kombension. Dagiti rinibu a kakabsattayo manipud iti adu a pagilian pasiarendanto ti hedkuarter ti Sosiedad idiay New York ken kasta met dagiti sanga iti dadduma pay a pagilian. Saan laeng a no agpasiartayo kadagitoy a pasilidad, no di pay ket iti aniaman a tiempo, masapul nga ‘irekomendatay ti bagbagitayo kas ministro ti Dios iti tunggal pamay-an,’ a pakairamanan ti umiso a panagkawkawes ken panaglanglangatayo.—2 Cor. 6:3, 4.
Iti panangisalaysayna iti kinapateg ti umiso a panagkawkawes ken panaglanglanga, agkomento ti Organisado a Mangitungpal ti Ministeriotayo maipapan iti kinapateg ti pisikal a kinadalus, natakneng a panagkawkawes, ken nasayaat a panaglanglanga no mangaskasabatayo iti tay-ak ti ministerio ken no tumabtabunotayo kadagiti Nakristianuan a gimong. Kalpasanna, iti panid 131, parapo 2, kunana: “Kasta met laeng ti agaplikar no bumisbisitatayo iti pagtaengan a Bethel idiay Brooklyn wenno iti aniaman kadagiti sanga nga opisina ti Sosiedad. Laglagipenyo, ti nagan a Bethel kayatna a sawen ket ‘Balay ti Dios,’ gapuna ti kawestayo, ti buok ken kababalintayo ti umasping koma iti manamnama kadatayo no tumabtabunotayo kadagiti gimgimong a maipaay iti panagdaydayaw idiay Kingdom Hall.” Daytoy a nangato a pagalagadan ket suroten met koma dagiti agibumbunannag ti Pagarian iti dayta a lugar agraman dagidiay aggapu kadagiti ad-adayo a lugar a sumarungkar ken makilangen kadagiti kameng ti pamilia ti Bethel ken agpasiar kadagiti pasilidad ti sanga.
Ti panagkawkawestayo rumbeng nga adda positibo nga epektona kadagiti sabsabali maipapan iti panangmatmatda iti pudno a panagdayaw ken Jehova. Nupay kasta, napaliiw a no agpaspasiarda kadagiti pasilidad ti Sosiedad, nalabes ti kinakasual ti panagkawkawes ti dadduma a kakabsat. Saan a maitutop ti kasta a kawes no agpasiartayo iti sadinoman a pagtaengan a Bethel. Iti daytoy a banag, a kas met iti amin a benneg ti Nakristianuan a panagbiagtayo, tarigagayantay a taginayonen dagiti isu met laeng a nangato nga estandarte a mangiduma iti ili ti Dios no idilig iti lubong babaen ti panangaramidtay iti isuamin a banag a pakaidayawan ti Dios. (Roma 12:2; 1 Cor. 10:31) Nasayaat met no kasaritatayo dagiti iyad-adalantay iti Biblia ken dagiti sabsabali pay a damoda ti agpasiar idiay Bethel ket ipalagip kadakuada ti kinapateg ti panangipaay iti atension iti umiso a panagkawkawes ken panaglanglanga.
Gapuna a no agpasiarkayo kadagiti pasilidad ti Sosiedad, iyimtuodyo: ‘Natakneng kadi ti panagkawkawes ken panaglanglangak?’ (Idiligyo ti Mikias 6:8.) ‘Nasayaat kadi ti panangyanninawna iti Dios a pagdaydayawak? Saan ngata a masuron wenno masair dagiti sabsabali iti itsurak? Mangipakpakitaak kadi iti maitutop nga ehemplo kadagiti sabsabali a damoda ti agpasiar?’ Iti panagkawkawes ken panaglanglangatayo, sapay koma ta kanayon nga ‘arkosantay ti sursuro ti Manangisalakantayo, ti Dios, iti isuamin a bambanag.’—Tito 2:10.