Agusar Kadagiti Broshur a Mangguyugoy Agpadpada iti Panunot ken Puso
1 Rumbeng a maipresentar ti kinapudno ti Biblia a mangguyugoy agpadpada iti panunot ken puso. Idi inlawlawag ni Jesus ti kinapudno kadagiti agdengdengngeg kenkuana, nangpili kadagiti topiko a namaginteres ken nangtignay kadakuada. (Luc. 24:17, 27, 32, 45) Ti balligi ti ministeriotayo agpannuray unay iti panangikagumaantayo a mangilasin kadagiti naespirituan a kasapulan dagiti agdengdengngeg kadatayo.
2 Dagiti broshur ket epektibo nga alikamen a pangdanon iti panunot ken puso dagidiay makasaritatayo iti ministerio. Panunotenyo a nasakbay no siasino ti mabalin a mangipangag iti mensahe iti kada broshur a maitampok iti Agosto:
—Libro Para iti Amin a Tao. Dagidiay awanan pammati iti Biblia wenno di mangapresiar a naan-anay iti pateg dayta iti biagda ket magunggonaan iti argumento daytoy a broshur.
—Pudno Aya a Maseknan ti Dios Kadatayo? Dagiti tattao a nakurapay wenno naglak-am iti trahedia apresiarenda daytoy makaliwliwa a mensahe maipapan iti masanguanan nga awan panagsagaba.
—Ania ti Panggep ti Biag—Kasanoyo a Masarakan Dayta? Dagiti agtutubo a maseknan unay iti masanguananda ket magunggonaan kadagiti naibatay-Biblia a sungbat a masarakan iti daytoy a broshur.
—Ti Gobierno a Mangiyegto iti Paraiso. Asinoman nga adda nakainaiganna iti gobierno nalabit ipangagna daytoy a mensahe maipapan iti panangrisut ti Pagarian ti Dios kadagiti narikut a problema ti sangatauan.
—No Adda Matay nga Ay-ayatenyo. Apresiaren dagiti adu nga agimanmanehar iti puneraria no addaanda kadagiti kopia daytoy a broshur a sidadaan nga agpaay kadagiti pamilia a natayan. Dagiti agibumbunannag a mangasaba kadagiti sementerio usarenda daytoy a broshur a pangliwliwa kadagiti masmasnaayan. Inasitgan ti dua a sister ti maysa a pamilia nga addaan iti pito a miembro nga aglulualo iti ayan ti tanem. Kas resulta ti panangiburayda iti makaliwliwa a mensahe manipud iti broshur, iti simmaganad nga aldaw nairugi a nayadalan iti Biblia ti ina!
—Rumbeng Aya a Patienyo ti Trinidad? Ti relihioso unay a tao mabalin nga awatenna ti kinapudno a masarakan iti daytoy dokumentado a pannakaibutaktak ti kangrunaan a doktrina ti Kakristianuan.
3 Kabesaduenyo ti tunggal broshur, ket ammuenyo ti kasayaatan a panangusar iti dayta idiay teritoriayo. Kadagiti naisingasing a presentasion, kitaenyo ti makinlikud a panid ti Hulio 1998 a ruar Ti Ministeriotayo iti Pagarian. Sapay koma ta bendisionan ni Jehova ti panagreggetyo a mangdanon nga agpadpada iti panunot ken puso dagiti tattao.—Mar. 6:34.