Iwaragawagyo ti Naimbag a Damag ti Pagarian Babaen Kadagiti Broshur
1 Anian a rag-o a maammuan ti kinapudno ken ti agbalin a maysa kadagidiay sireregta a mangiwarwaragawag iti naimbag a damag! Kasapulan unay dagiti tattao iti ruar ti organisasion ti Dios a mangngeg ti naimbag a damag ti Pagarian. Simple ti pannakailawlawag ti kinapudno ti Pagarian kadagiti broshur a Tagiragsakenyo ti Biag nga Agnanayon Ditoy Daga!, “Adtoy! Pagbalinek Dagiti Isuamin a Bambanag a Baro,” ken Ti Gobierno a Mangiyegto iti Paraiso. Silalawag nga iladawanda ti biag ditoy daga iti sidong ti Pagarian ti Dios, ken iturongda ti agbasbasa kadagiti padto ti Biblia iti Sao ti Dios. Siempre, pangrugian laeng ti trabahotayo ti panangipaima iti broshur iti interesado a tao. (1 Cor. 9:23) Masapul a subliantayo a dagus dagiti amin a napaimaantayo, nga addaan panggep a mangitukon iti panagadal iti libro a Pannakaammo a Mangiturong iti Biag nga Agnanayon. Kasanotayo a maaramid daytoy ita nga Agosto?
2 Mabalinyo nga itukon ti broshur a “Tagiragsakenyo ti Biag nga Agnanayon Ditoy Daga!” babaen ti ababa unay a presentasion. Bayat nga ipakitayo ti akkubna, mabalinyo a kunaen:
◼ “Adda kayatko nga ipakita kadakayo a naglaon iti napintas a mensahe.” Luktanyo ti broshur a Biag Ditoy Daga, ken basaenyo ti umuna a parapo iti introduksion. Sayo ituloy: “Sungbatanna met daytoy a saludsod [iturong iti paulo iti ngatuen ti ladawan numero 8]: ‘Apay a matay ti tao?’ Matakuatanyo a makapainteres nga amirisen dagiti ladawan ken basaen dagiti kasuratan iti daytoy a broshur. Matagikuayo daytoy a kopia babaen ti bassit a kontribusion.”
3 Ania ti ibagayo no sublianyo ti tao a napaimaanyo iti broshur a “Biag Ditoy Daga”? Mabalinyo a padasen daytoy a pamay-an:
◼ Ipakitayo ti ladawan numero 49 iti broshur a Biag Ditoy Daga sayo isaludsod, “Saan kadi a nagpintas daytoy a ladawan? [Palubosanyo a sumungbat.] Adda daytoy iti broshur a naibatik kadakayo iti napalabas nga ibibisitak. Kayatko nga isaludsod kadakayo ti saludsod iti sumaganad a panid.” Iturongyo iti ladawan numero 50 ken basaenyo ti saludsod: “‘Kayatyo kadi ti agbiag nga agnanayon iti dayta a napintas a paraiso?’ [Palubosanyo a sumungbat.] No dayta ti tarigagayyo, imutektekanyo no ania ti kunana a masapul nga aramidenyo: ‘No kasta adalenyo ti ad-adu pay iti ibagbaga ti Dios.’ [Basaenyo ti Juan 17:3.] Maragsakanak a makiadal iti Biblia kadakayo nga awan bayadna. Kayatyo kadi dayta?” Makitulagkayo no kaanokayo nga agsubli.
4 No itukonyo ti broshur nga “Adtoy! Pagbalinek Dagiti Isuamin a Bambanag a Baro,” mabalinyo a rugian babaen ti panangipakita iti intero a ladawan iti akkub ken panangisaludsod iti:
◼ “Iti panagkunayo, ania ti kasapulan tapno agbalin a kastoy ti intero a daga?” Palubosanyo a sumungbat. Sayo kunaen: “Ipagarup ti kaaduan a tattao nga imposible nga agbalin a kastoy ti lubong. Ngem kabaelan ti Dios nga aramiden dayta. [Iranudyo dagiti punto iti parapo 43; sayo basaen ti Isaias 9:6, 7.] Inkari ti Dios nga iyegna ti maysa a baro a lubong a sadiay tagiragsaken dagiti tattao manipud iti amin a nasion ti nakaskasdaaw a paraiso. Ipakita daytoy a broshur no kasano a masagrapyo ken ti pamiliayo ti nagsayaat a masakbayan.” Itukonyo dayta sayo iyurnos ti panagsubliyo.
5 Iti panagsarungkaryo, mabalinyo nga usaren ti broshur nga “Adtoy!” a mangilawlawag no apay a kasapulan ti agadal iti ad-adu pay maipapan iti Biblia. Mabalinyo nga ipakita manen ti akkub sayo kunaen:
◼ “Idi damo nga impakitak kadakayo daytoy a ladawan, napaganamongantayo a mabalintay ti agbiag iti kasta a nakaskasdaaw a lubong. Tapno posible daytoy, adda banag a masapul nga aramidentayo amin.” Luktanyo ti broshur nga “Adtoy!” iti parapo 52; basaenyo ti parapo ken ti kasuratan iti Juan 17:3. Ipakitayo ti ilustrasion iti parapo 53 maipapan iti umiso nga edukasion iti Biblia, sayo ilawlawag nga ituktukon dagiti Saksi ni Jehova ti kasta a panagadal nga awan bayadna. Ibagayo a kayatyo nga idemostra ti pamay-antayo nga agadal, nga usaren ti libro a Pannakaammo.
6 No itukonyo ti broshur a “Ti Gobierno a Mangiyegto iti Paraiso,” mabalinyo nga ibaga daytoy:
◼ “Adu a tattao ti nangngegko nga agkuna a kayatda ti agbiag iti sidong ti gobierno a pudno a makarisut kadagiti parikut a sangsanguentayo ita. [Dakamatenyo dagiti lokal a parikut a kas iti kaawan panggedan, kumarkaro a krimen, wenno panangabuso iti droga.] Dagitoy a bambanag ti mamagdanag unay kadatayo maipapan iti masakbayantayo a mismo ken dagiti ay-ayatentayo. Iti panagkunayo, addanto ngata gobierno a makarisut kadagitoy a parikut? [Palubosanyo a sumungbat.] Nalabit nga ikarkararagyo ti Kararag ti Apo. No kasta, ammoyo kadi nga iti kinapudnona, ikarkararagyo ti maysa a nalinteg a gobierno?” Iturongyo iti panid 3 iti broshur a Gobierno, ken basaenyo ti umuna a dua a parapo. Itukonyo ti broshur.
7 No naipaimayo ti broshur a “Ti Gobierno a Mangiyegto iti Paraiso,” mabalinyo a rugian ti saritaan iti panagsarungkaryo babaen ti panangikuna iti kastoy:
◼ “Iti napalabas, nagsaritaantayo ti panagkasapulan iti nalinteg a gobierno a makarisut kadagiti parikut ti tao. Ipakita daydiay broshur a naibatik kadakayo a ti Pagarian ti Dios ti kakaisuna a namnamatayo. Pampanunoten dagiti tao no ania ti maaramid dayta a gobierno a mangpasayaat iti kasasaadtayo iti biag. Ipakita ti Biblia a napaneknekanen ni Kristo nga agballiginto a mangaramid kadagiti di kabaelan nga aramiden dagiti natauan a pangulo.” Luktanyo ti broshur a Gobierno iti panid 29, ken basaenyo ti maudi nga uppat a parapo. Sayo kunaen: “Saan kadi a nagsayaat dayta a masakbayan? Kayatyo kadi a makita dayta?” Palubosanyo a sumungbat. Basaenyo ti Juan 17:3. Paregtaenyo nga agsursuro iti ad-adu pay babaen ti panagadal iti Biblia iti pagtaengan.
8 No sabali a broshur ti usarenyo, mabalinyo ti mangisagana kadagiti bukodyo a presentasion, nga usarenyo dagiti naisingasing iti ngato kas pagtuladan. Agsaganakayo a naimbag ken idawatyo ti pammendision ni Jehova bayat nga iwaragawagyo ti naimbag a damag ti Pagarian.