Dagiti Manangaywan a Mangidaulo—Ti Sekretario
1 Ti sekretario ti kongregasion napateg ti pasetna iti panangsigurado nga “isuamin a bambanag maaramid koma a sitatakneng ken addaan urnos.” (1 Cor. 14:40) Kas miembro ti Komite ti Serbisio ti Kongregasion, tamingenna dagiti surat ti kongregasion ken dagiti importante a rekord. Nupay dagiti annongna ket saanda a naminar kadagiti isuamin a kas kadagiti dadduma a panglakayen, kasapulan ken maapresiar unay dagiti serbisiona.
2 No adda surat a maawat manipud Sosiedad wenno dadduma pay, ti sekretario ti mangasikaso iti dayta ket siguraduenna a masubalitan dayta no kasapulan. Siguraduenna a dagidiay surat a naawat masapul a mabasa amin dagiti panglakayen sa maisalansan bilang reperensia. Usisaenna dagiti porma a pagorderan ti magasin ken literatura sana ipatulod iti Sosiedad. Direktamente nga imatonanna dagidiay mangig-iggem iti kuenta ken suskripsion agraman amin a bambanag a nainaig kadagiti kombension.
3 Tangay ipatulod ti sekretario idiay Sosiedad ti binulan a report ti serbisio iti tay-ak ti kongregasion no maikanem iti bulan, nesesita a datay amin ireporttayo a madagdagus dagiti aktibidad iti tay-ak no agngudo ti tunggal bulan. Sananto ilista dagiti report ti serbisio kadagiti Congregation’s Publisher Record kard. Uray asino nga agibumbunannag mabalinna a kiddawen a kitaen ti personal a rekord ti aktibidadna.
4 No adda agibumbunannag a tumipon wenno pumanaw iti kongregasion, kiddawen ti sekretario manipud kadagiti panglakayen iti dayta a kongregasion wenno ipatulodna kadakuada ti surat a mangyam-ammo agraman ti Congregation’s Publisher Record kardna.—Ti Ministeriotayo, p. 104-5.
5 Repasuen ti sekretario ti aktibidad dagiti payunir, nga ipakaammona kadagiti panglakayen, ken nangruna iti manangaywan ti serbisio, dagiti aniaman a problema a mapaspasaran dagiti payunir. Pakaammuanna dagiti konduktor ti Panagadal ti Libro ti Kongregasion no siasino nga agibumbunannag ti iregular iti serbisio iti tay-ak. Agpada a ti sekretario ken ti manangaywan ti serbisio agdanggayda a mangtaming kadagiti inaktibo.—Ti Ministeriotayo iti Pagarian, Disiembre 1987, p. 1.
6 Ita ta nasaysayaat ti pannakatarustayo kadagiti annong ti sekretario, sapay koma ta aramidentayo ti kabaelantayo a tumulong nga ad-adda a mangpalag-an iti panangtungpalna iti kinamayordomona.—1 Cor. 4:2.