Ania ti Ibagayo iti Maysa a Hindu?
1 Kas pagaammoyo, adu ti Hindu nga agnanaed iti nadumaduma a dagdaga, a pakairamanan daytoy a pagilian. Kayatna a sawen nga addanto tiempo a mabalin a makasarakkayo iti Hindu kabayatan ti panangasabayo. No mapasamak dayta, kasanoyo a kasarita?
2 Laglagipenyo Dagitoy a Punto: Dagiti misionero a sibaballigi a nangasaba kadagiti Hindu kunada a saan a kasapulan ti nauneg a panangadal iti Hinduismo tapno epektibo a makasabaanyo ida. Masansan a nasayaat ti ibunga ti simple ken nataktika a panangisango iti kinapudno. Kiddawenyo a kasaritayo nga umuna ti ulo ti sangakabbalayan. No nasayaat ti reaksionna, nalaklakanton a makasabaan dagiti dadduma a kameng ti pamilia. Iti damo, diyo koma iparparipirip nga adda ipaayyo a mensahe a nasaysayaat ngem iti patpatien ti bumalay wenno kayatyo a pakisaritaan ti kakaisuna a pudno a Dios wenno ti kadadaanan a sagrado a kasuratan. Yantangay adu a Hindu ti mangibilbilang iti Biblia a libro iti Lumaud, maparmekyo ti di umiso a kapanunotanda babaen ti panangilawlawagyo a saan nga itandudo ti Biblia ti kolonialismo wenno natantan-ok ti maysa a puli ngem ti sabali.
3 Usarenyo Dagiti Umiso nga Alikamen: Adda dua a broshur nga espesipiko a nairanta kadagiti Hindu. Dagitoy: Why Should We Worship God in Love and Truth? ken Our Problems—Who Will Help Us Solve Them? Ingles dagita. Napaneknekan met nga epektibo dagiti broshur nga “Adtoy! Pagbalinek Dagiti Isuamin a Bambanag a Baro” ken Pudno Aya a Maseknan ti Dios Kadatayo? no kasabaantayo dagiti Hindu. Mabalin a naballigi a pangyadal iti Biblia ti broshur a Kalikaguman ken ti libro a Pannakaammo.
4 Mangipasdekkay iti Pareho a Paginteresanyo: Saan a narigat ti mangbirok iti pareho a paginteresanyo ken dagiti Hindu. Mamatida nga agbibiagtayo iti panawen a nakaro unayen ti panagraira ti kinadakes ket ikkatento ti Dios dagiti problema ditoy lubong babaen ti naindaklan a didigra a sarunuen ti panawen ti kinapudno. Makitayo a nakalaklaka nga inaig dagitoy a patpatien kadagiti pannursuro ti Biblia maipapan kadagiti maudi nga al-aldaw, ti dakkel a rigat, ken ti um-umayen a baro a lubong. Yantangay matmatan ti kaaduan a Hindu ti biag kas serye dagiti parikut nga awan solusionna, interesadoda kadagiti tema maipapan iti biag ti pamilia, krimen ken kinatalged, ken no ania ti mapasamak kalpasan ti ipapatay. Adtoy ti dua a pagtuladan a presentasion a mabalinyo a padasen.
5 Mabalin a magustuan daytoy ti maysa a padre de pamilia:
◼ “Sarsarungkarak dagiti tattao a maseknan iti kasasaad ti biag ti pamilia iti adu a pagilian itatta. Aniat’ pagarupenyo a makatulong iti panagkaykaysa ti pamilia? [Palubosanyo a sumungbat.] Ammo ti dadduma a tattao no aniat’ kunaen dagiti kasuratan a Hindu maipapan iti pamilia, ngem dida pulos naaddaan iti gundaway a mangidilig iti daytoy iti kuna ti Biblia maipapan iti dayta a tema. Kayatko nga iburay kadakayo daytoy kapanunotan nga adda iti Colosas 3:12-14.” Kalpasan a mabasayo ti teksto, ipakitayo iti bumalay ti kapitulo 15 ti libro a Pannakaammo ket kunaenyo: “Maragsakanak a mangiwaya iti ababa a panawen tapno mabasata daytoy a kapitulo.”
6 Mabalin a dumngeg ti maysa nga agtutubo iti daytoy:
◼ “Sigurado a mamatika iti Dios. Iti panagkunam, ania ngata ti panggep ti Dios nga agpaay kadatayo?” Palubosanyo a sumungbat. Kalpasanna, basaenyo ti Genesis 1:28, sa kunaenyo: “Iti adu a lugar, adu unayen ti populasion ti daga ken madiddidigra iti parparikut. Iti panagkunam, kayat ngata ti Namarsua ti tumulong a mangrisut kadagiti problematayo?” Kalpasan a mangngegyo ti sungbat, usarenyo ti maitutop a publikasion.
7 Tagiragsakenyo Dagiti Positibo a Resulta: Inasitgan ti 22 anyos a Hindu a lalaki ti maysa a sister a mangaskasaba iti tiendaan ket nagkiddaw a mayadalan iti Biblia. Inlawlawagna kenkuana a walo a tawenen ti napalabas sipud idi nangngegna ti panagsarita ti sister ken ti nanang ti lalaki maipapan iti Biblia. Nupay nagustuanna dagiti praktikal a sungbat ti Biblia kadagiti parikut ti sangatauan, saan nga interesado ni nanangna ket impagarupna nga ubing pay unay idi a mangammo iti kinapudno a bukbukodna. Ita ta nataenganen, kayatna nga ammuen ti ad-adu pay. Saanen a nagtaktak dayta nga agkabannuag a lalaki. Iti las-ud laeng ti 23 nga aldaw, nalpas ti panangadalna iti libro a Pannakaammo, ket uppat a bulan laeng kalpasan ti panagsarakda iti sister iti tiendaan, kiniddawnan a mabautisaran!
8 Inrugi ti maysa a brother nga iyadalan ti Hindu a lalaki a naam-ammona iti tren. Agparparikut idi ti lalaki mainaig iti panagasawana. Parikutna met ti pannakaigamerna iti arak. Immanamong ti lalaki a sumarungkar kenkuana ti Saksi ket iburayna ti balakad ti Biblia maipapan iti biag ti pamilia. Nagustuanna dagiti moral a pannursuro ti Biblia, ket immanamong nga agpayadal iti Biblia. Inrugida ti makigimong a sangapamiliaan. Kalpasanna, imburayda ti kinapudno kadagiti gagayyem ken kakabagian. Addan innem kadagitoy ti nangawat iti kinapudno!
9 Pagayatan ti Dios a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Tim. 2:4) Karaman iti dayta dagiti lallaki ken babbai nga agkuna a saan a Kristiano ti relihionda, a kas iti Hinduismo. No addada Hindu iti teritoriayo, apay a dikay pasiaren ida a dagus ket usarenyo ti sumagmamano kadagiti naisingasing iti daytoy nga artikulo?