Annadanyo
Us-usarenyo Kadi Dagitoy a Broshur?
The Bible—What Is Its Message?
Nairanta a tumulong kadagiti bassit ti ammona maipapan iti Biblia, nangnangruna kadagiti saan a Kristiano ti relihionna
No kasano nga itukon: “Kayatmi a maammuan no ania ti makunayo iti nailanad iti daytoy a Kasuratan (wenno iti daytoy a nasantuan a libro). [Basaenyo ti Salmo 37:11, a nadakamat iti seksion 11.] Iti panagkunayo, anianto ngata ti kasasaad ti daga inton matungpal daytoy a padto? [Palubosanyo a sumungbat.] Daytoy ket maysa kadagiti namnama ken liwliwa a maammuan dagiti amin a tattao manipud iti Biblia, aniaman ti kultura ken relihionda.” Basaenyo ti parapo iti makinngato a paset ti panid 3 sa itukonyo ti broshur.
Mabalinyo a padasen daytoy: No us-usarenyo ti libro nga Isursuro ti Biblia a mangyadal iti maysa a tao a saan a Kristiano ti relihionna, pagsaritaanyo iti sumagmamano a minuto ti maysa a seksion daytoy a broshur iti rugi wenno ngudo ti tunggal panagadalyo tapno adda pamalatpatanna maipapan iti Biblia.
A Book for All People
Nairanta a tumulong kadagiti edukado a tattao a bassit ti ammona maipapan iti Biblia
No kasano nga itukon: Basaenyo ti 2 Timoteo 3:16, 17 sa kunaenyo: “Mamatikayo kadi a ti Biblia ket impaltiing ti Dios? Wenno iti panagkunayo ket maysa laeng daytoy a nasayaat a libro? [Palubosanyo a sumungbat.] Adda opinion ti kaaduan a tattao maipapan iti daytoy a saludsod, ngem natakuatanmi a manmano laeng ti talaga a nangsukimat iti Biblia. [Basaenyo ti kapadasan iti babaen ti paulo iti panid 3.] Daytoy a makapainteres a broshur ket mangted kadagiti nasayaat a rason no apay a masapul nga adalen dagiti tattao ti linaon ti Biblia, aniaman ti kasasaad ken relihionda.”
Mabalinyo a padasen daytoy: No awaten ti bumalay daytoy a broshur, kunaenyo: “Ti maysa a rason no apay nga adu a tattao ti mangipagarup a saan a napateg a basaen ti Biblia ket gapu ta saan nga umiso ti isursuro ti relihion maipapan iti Biblia ken kadagiti pannursuro a nailanad iti dayta. Kayatko ti mangted iti pagarigan inton agsubliak.” Inton agsublikayo, usigenyo ti sumagmamano nga impormasion iti panid 4-5.
You Can Be God’s Friend!
Nairanta a tumulong kadagiti nababa ti adalna wenno nakapuy nga agbasa
No kasano nga itukon: “Iti panagkunayo, posible ngata nga agbalintayo a gayyem ti Dios? [Palubosanyo a sumungbat sa basaenyo ti Santiago 2:23.] Nairanta daytoy a broshur a tumulong kadatayo nga agbalin a gayyem ti Dios, kas ken Abraham.”
Mabalinyo a padasen daytoy: Iti man damo a pannakisaritayo wenno iti panagsarungkaryo, ipakitayo no kasano ti agadal iti Biblia babaen ti panangusigyo iti amin wenno iti sumagmamano a paset ti leksion 1.
A Satisfying Life—How to Attain It
Nairanta a tumulong kadagiti saan a relihioso
No kasano nga itukon: “Simmarungkarkami gapu ta adu a tattao ti mayat a maaddaan iti makapnek a biag. Addaantayo amin iti problema a mamagliday kadatayo. No saantayo a naragsak, mabalin nga agpabalakadtayo iti pagtaltalkantayo a kabagian wenno gayyem wenno agbasatayo iti libro wenno iti Internet. Ania ti natakuatanyo a nasayaat a pagpabalakadan? [Palubosanyo a sumungbat.] Adda dagiti naragsakan a nakasarak iti praktikal a balakad iti Biblia. Daytoy ti maysa a kapadasan. [Ipakitayo iti bumalay ti kapitulo 2 ken basaenyo ti maysa kadagiti nakotar a teksto.] Ilawlawag daytoy a broshur no kasanotayo a maaddaan iti makapnek a biag.”
Mabalinyo a padasen daytoy: No awaten ti bumalay ti broshur, kunaenyo: “Adu ti agkuna a nadamdamagda kano nga adu ti saan nga umiso a linaon ti Biblia. Inton agsubliak, kayatkonto nga ipakita kadakayo ti maysa a pagarigan nga umiso ti Biblia no maipapan iti siensia a mabalin a paginteresanyo.” Inton agsublikayo, usigenyo ti parapo 4 iti panid 12.
The Origin of Life—Five Questions Worth Asking
Nairanta a tumulong kadagiti agtutubo a masursuruan iti ebolusion idiay eskuelaan ken makatulong iti pannakirinnasontayo kadagiti ebolusionista, agnostiko, ken ateista (Saan a maipaima daytoy a broshur iti panagbalaybalaytayo.)
No kasano nga usaren iti pannakisarita iti ebolusionista wenno ateista: “Dandani amin a libro maipapan iti siensia ita ket mangisursuro iti ebolusion. Mamatikayo kadi a ti ebolusion ket maysa laeng a teoria, wenno napaneknekanen nga umiso dayta? [Palubosanyo a sumungbat.] Tapno makaaramidkayo iti desision maibatay iti umiso nga impormasion, sigurado nga umanamongkayo a masapul nga usigentayo nga agpadpada ti maipapan iti ebolusion ken panamarsua. Ipakita daytoy a broshur ti sumagmamano nga ebidensia a nangtignay iti adu a mamati a ti biag ket naparsua.”
Mabalinyo a padasen daytoy: No mapankayo iti eskuelaan, iparabawyo ti broshur iti lamisaanyo ket kitaenyo no adda aginteres a kaklaseyo.
Why Should We Worship God in Love and Truth?
Nairanta a para kadagiti Hindu
No kasano nga itukon: “Karaman iti nalatak a kararag dagiti Indian a sapay koma ta masarakanda ti kinapudno ken lawag. Iti panagkunayo, napateg ngata a dayawentayo ti Dios iti ayat ken kinapudno? [Palubosanyo a sumungbat.] Imutektekanyo ti kinuna ni Jesus maipapan iti daytoy.” Basaenyo ti Juan 4:24. Kalpasanna, basaenyo ti parapo 4 iti panid 3 sa itukonyo ti broshur.
Mabalinyo a padasen daytoy: No awaten ti bumalay ti broshur, kunaenyo: “Kuna ti dadduma a mamasirib a Hindu a ti kinapudno ket adda iti pusotayo. Adda met dagiti agkuna a ti kinapudno ket masarakan iti sagrado a kasuratan. Inton agsubliak, kayatkonto nga ilawlawag ti saludsod iti ngudo ti parapo 3 iti panid 4: ‘Pakasarakantayo iti kinapudno maipapan iti Dios?’”
The Pathway to Peace and Happiness
Nairanta a para kadagiti Budista
No kasano nga itukon iti natataengan a Budista: “Nalabit kas kaniak, maseknankayo met iti panagsaknap dagiti naalas a kapanunotan a mangap-apektar kadagiti ubbing ita. Iti panagkunayo, apay ngata nga umad-adu dagiti agtutubo nga agar-aramid iti imoralidad? [Palubosanyo a sumungbat.] Ammoyo kadi a naipadto daytoy iti libro a nangrugi a naisurat nabayagen a panawen sakbay pay ti pannakabuangay dagiti relihion dagiti Kristiano, Hindu, ken Muslim? [Basaenyo ti 2 Timoteo 3:1-3.] Imutektekanyo ta agraraira dagitoy a kasasaad iti laksid ti agtultuloy a panagsursuro dagiti tattao. [Basaenyo ti bersikulo 7.] Ti impormasion iti daytoy a publikasion ket nakatulong kaniak a mangtarus kadagiti kinapudno a saan a pulos nga ammo ti kaaduan a tattao. Kayatyo kadi a basaen daytoy?”
Mabalinyo a padasen daytoy: Inton sumarungkarkayo, kalpasan a maparayrayyo ti interes ti bumalay iti Biblia, ipakitayo dagiti saludsod iti makinlikud nga akkub sa itudoyo ti kupon para iti libro nga Isursuro ti Biblia. No kayatna a makita dayta a libro, ibagayo nga adda kopia nga intugotyo. Ipakitayo kenkuana dagiti linaon ti libro sa mangusigkayo iti maysa wenno dua a parapo iti kapitulo a paginteresanna.
Our Problems—Who Will Help Us Solve Them?
Nairanta a para kadagiti Hindu
No kasano nga itukon: “Ti adu a tattao a nakasarsaritami ket mariribukan gapu kadagiti kinadakes a makitkitada iti lubong. Iti panagkunayo, dumtengto ngata ti panawen nga ikkaten ti Dios ti amin a problema ditoy lubong? [Palubosanyo a sumungbat.] Mangted iti namnama daytoy a padto. [Basaenyo ti Salmo 37:11.] Ti binasak ket nailanad iti Biblia, ti libro a masansan a saan a matarusan dagiti tattao ken maus-usar iti di umiso a pamay-an. Mabalin a masdaawkayo a makaammo a ti Biblia ket saan a libro dagiti Amerikano wenno Europeo; saanna nga itandudo ti kolonialismo wenno panangipannakkel iti puli. Ngem mangted iti namnama a mabiiten nga ikkaten ti Dios dagiti problematayo. Naglaon pay daytoy kadagiti prinsipio a tumulong kadatayo a mangtaming kadagiti problematayo uray pay itan. Mabasayo iti daytoy a broshur ti ad-adu pay nga impormasion.”
Mabalinyo a padasen daytoy: Inton sumarungkarkayo, kalpasan a maparayrayyo ti interes ti bumalay iti Biblia, ipakitayo kenkuana dagiti ladawan iti panid 4-5 ti libro nga Isursuro ti Biblia. Basaenyo ti uray maysa laeng kadagiti nakotar a teksto sa itukonyo ti libro.
Will There Ever Be a World Without War?
Nairanta a para kadagiti Judio
No kasano nga itukon: “Iti intero a historia, agsagsagaba dagiti tattao gapu iti gubat. Iti panagkunayo, apay nga adda latta dagiti gubat uray no ibagbaga dagiti tattao a kayatda ti kappia? [Palubosanyo a sumungbat.] Mangted iti namnama daytoy a padto ni Isaias. [Basaenyo ti Isaias 2:4.] Nupay kasta, mangpataud daytoy iti sumagmamano a saludsod: Kaano ken kasano a matungpal ti padto ni Isaias? Apay nga agtalektayo a ti Kasuratan ket mapagpannurayan a gubuayan ti namnama? Sungbatan daytoy a broshur dagita a saludsod.”
Mabalinyo a padasen daytoy: No awaten ti bumalay ti broshur, ipakitayo kenkuana ti panid 16-17 sa kunaenyo: “Adu ti mangpampanunot kadagiti nakaam-ames a pasamak a kas iti Holocaust sa isalsaludsodda, ‘No adda Dios, apay nga ipalpalubosna ti panagsagaba?’ Pagsaritaantanto daytoy inton agsubliak.”
The Guidance of God—Our Way to Paradise
Nairanta a para kadagiti Muslim nga agnanaed kadagiti lugar a mabalinda ti agadal iti Biblia
No kasano nga itukon: “Ammok a dagiti Muslim ket mamati iti maymaysa a pudno a Dios ken kadagiti amin a propeta, saan kadi? [Palubosanyo a sumungbat.] Kayatko nga iranud kadakayo ti maipapan iti nagkauna a padto maipapan iti panamagbalin a paraiso ti daga. Mabalin kadi nga ibasak kadakayo ti insurat ti propeta? [Basaenyo ti Isaias 11:6-9.] Adu ti mangpampanunot no kasanonto nga iyeg ti Dios ti kasta a panagbalbaliw ditoy daga. Ipakita daytoy a broshur no ania ti kuna dagiti propeta maipapan iti daytoy.”
Mabalinyo a padasen daytoy: No awaten ti bumalay ti broshur, kunaenyo: “Daytoy a libro ti Dios ilawlawagna nga idi punganay ket nagnaed dagiti tattao iti paraiso. Inton sumaruno a panagsaritata, kayatkonto a sungbatan daytoy a saludsod, ‘Kasano nga inlaksid dagiti tattao ti panangiwanwan ti Dios ket naparuarda iti paraiso?’’ Inton agsublikayo, pagsaritaanyo ti rugrugi ti yunit a mangrugi iti panid 6.
Real Faith—Your Key to a Happy Life
Nairanta a para kadagiti Muslim nga agnanaed kadagiti lugar a mabalinda ti agadal iti Biblia
No kasano nga itukon: Ipakitayo ti ladawan iti panid 16-17 sa kunaenyo: “Daytoy a kasasaad ket naiduma unay iti kasasaad ti lubong ita. Iti panagkunayo, posible ngata nga agbalinto a kastoy ti lubong? [Palubosanyo a sumungbat.] Imutektekanyo no ania ti ikarkari daytoy a libro ti Dios. [Basaenyo ti maysa kadagiti nakotar a teksto iti Bibliayo.] Makatulong kadatayo daytoy a broshur a mangpatanor iti napaypayso a pammati a matungpalto dagita a kari.”
Mabalinyo a padasen daytoy: Kalpasan ti damo a pannakisaritayo, kiddawenyo iti bumalay a mangpili iti maysa kadagiti saludsod iti makinlikud nga akkub. Kalpasanna, ibagayo nga agsublikayto tapno pagsaritaanyo ti sungbat ti broshur.
Lasting Peace and Happiness—How to Find Them
Nairanta a para kadagiti Tsino
No kasano nga itukon: “Nakaad-adu dagiti problema iti biag ita a mangdadael iti kinaragsaktayo. Ania ti makatulong kadakayo nga agbalin a naragsak iti laksid dagiti problema? [Palubosanyo a sumungbat.] Adu a tattao ti nagbalin a naragsak babaen ti panangsurotda iti balakad ti Biblia. [Basaenyo ti Salmo 119:1, 2.] Adda dagiti agkuna a ti Biblia ket libro dagiti Amerikano wenno Europeo. Ngem imutektekanyo daytoy. [Usigenyo ti parapo 16 iti panid 17.] Ilawlawag daytoy a broshur no kasanotayo a maaddaan iti manayon a talna ken kinaragsak.”
Mabalinyo a padasen daytoy: No awaten ti bumalay ti broshur, basaenyo a dua ti umuna a tallo a sentensia iti parapo 18 iti panid 17 sa kunaenyo: “Inton agsubliak, kayatkonto nga ipakita kadakayo no ania dagiti segseggaantayo sigun iti Biblia.” Inton agsublikayo, usigenyo ti maysa kadagiti punto iti parapo 6 iti panid 30.