Imutektekanyo nga Inaldaw ti Sao ni Jehova!
1 Inaldaw nga adda dagiti baro a pakasuotan ti pammatiyo. Nalabit dinakay sardengan nga allukoyen a maki-date ti maysa a tao a diyo kapammatian. Kayat ti mannursuroyo a ragpatenyo ti sekular a karera, wenno kayat ti amoyo nga ag-overtime-kayo iti trabaho. Nalabit kumapkapuy ti salun-atyo. Nupay mabalin a sumangbay kadakayo iti aniaman a kanito dagiti kasta a pakasuotan, saankayo nga agmaymaysa. Madadaan ni Jehova a mangted iti sirib a kasapulanyo tapno masarangetyo dagita. Ti panangusig iti teksto ti Biblia ken kadagiti komento iti Panangsukimat Kadagiti Kasuratan ket maysa a pamay-an tapno regular a mataraonankayo iti Sao ni Jehova. Ap-aprobetsarenyo met laeng aya daytoy a probision?
2 Madadaan ti Tulong: Iti Isaias 30:20 (NW), nadeskribir ni Jehova kas ti “Naindaklan nga Instruktor” a mabalin a pagpatulongan ti ilina. Itedna ti kasapulanyo tapno masarangetyo dagiti pakasuotan ti pammatiyo. Kasano? Ilawlawag ti sumaruno a bersikulo: “Dagiti lapayagmo makangngegdanto iti maysa a sao iti likudam, a kunana, Isu daytoy ti dalan, magnakayo kenkuana.” ‘Agsasao’ ita ni Jehova babaen ti Kasuratan ken dagiti publikasion ti ‘matalek nga adipen.’ (Mat. 24:45) Dagiti laengen napalabas nga artikulo ti Pagwanawanan ket naglaon iti nabaknang a sirib, mainaig iti gistay amin a benneg ti Nakristianuan a panagbiag. Ti panangrepaso kadagidiay naadaw iti Panangsukimat Kadagiti Kasuratan punnuennakayo iti pannakaammo a nagpateg iti panangsango iti aniaman a pakasuotan.—Isa. 48:17.
3 Iwayaanyo: Nupay adu ti trabahona iti agsapa, inwayaan ti maysa nga ina a basaen ken usigen ti teksto ken ti komento a kaduana ti barona bayat nga agal-almusar daytoy. Dagitoy a sasao ken ti kararag ti maudi a mangngeg ti anakna kada bigat sakbay a mapan iti eskuelaan. Dagita ti nangpabileg kenkuana a mangsaranget kadagiti seksual a pananggundaway, di makikompromiso iti nasionalismo, ken situtured a mangasaba kadagiti estudiante ken mannursuro. Nupay maymaysana a Saksi idiay eskuelaan, nariknana a saan nga agmaymaysa.
4 Agpaidalan ken agpaiwanwankayo ken Jehova ken iti Saona. No aramidenyo dayta, agbalinto a napaypayso kadakayo, a kas iti mapagtalkan a gayyem. Inaldaw nga umadanikayo kenkuana! Kas kadagiti minilion a sabsabali pay iti intero a lubong nga inaldaw nga agbasbasa iti Sao ti Dios, sapay koma ta ‘makitanto dagiti matayo ti Naindaklan nga Instruktoryo.’