Salsaludsod Dagiti Agbasbasa
Apay a kuna ti Isaias 30:21 nga aggapu ti sao ni Jehova “iti likudam,” idinto ta adda ni Jehova iti sanguanan kas kuna ti immun-una a bersikulo, “Dagiti matam agbalindanto a matmata a makakita iti Naindaklan a Manangisurom”?
Kastoy ti mabasa iti Isaias 30:20, 21: “Ti Naindaklan a Manangisurom saanton nga aglemmeng, ket dagiti matam agbalindanto a matmata a makakita iti Naindaklan a Manangisurom. Ket dagiti bukodmo a lapayag makangngegto iti sao iti likudam a kunkunana: ‘Daytoy ti dalan. Magnakayo iti dayta,’ no kas pagarigan agpakannawankayto wenno no kas pagarigan agpakannigidkayto.”
No literal ti pannakaawat ti agbasbasa iti dayta a teksto, makitana iti sanguananna ni Jehova, ti Naindaklan a Manangisuro, ngem mangngegna ti timekna iti likudan. Ngem piguratibo dagita a sasao ken ti kaipapananna.
Iladawan ti bersikulo 20 kadatayo ti maipapan iti maysa nga adipen nga agserserbi iti apona, a madadaan nga agtungpal kadagiti bilin ti apona. Kas iti panangsipsiput a naimbag ti adipen iti ima ti apona tapno maawatanna no ania ti kayat nga ipaaramid ti apona, sipapasnek a naiturong ti imatang dagiti adipen ni Jehova kadagiti naibatay-Biblia nga instruksion nga agtultuloy nga ipapaay ni Jehova babaen ti organisasionna ditoy daga. (Salmo 123:1, 2) Wen, tungpalenda ti bilinna, nga alertoda iti aniaman nga ipasimudaag ni Jehova babaen “ti matalek ken naannad nga adipen.”—Mateo 24:45-47.
Ti ngay sao a mangngeg dagiti adipenna iti likudan? Nainkalintegan a kunaen a ti timek iti likudan isu ti timek ti Dios iti napalabas, a naisawang babaen ti naisurat a Saona ken ipapaawat ti ‘matalek a mayordomona.’ (Lucas 12:42) Dagiti adipen ti Dios ita mangngegda ti timekna babaen ti napasnek a panagadal iti Biblia ken panagbiag a mayannurot kadagiti prinsipio ti Biblia iti tulong dagiti publikasion nga insagana “ti matalek ken naannad nga adipen,” “ti matalek a mayordomo.” Babaen ti panagpannuray ken panangsiput iti naintiempuan nga instruksion nga ipapaay ti Naindaklan a Manangisuro ken babaen ti panagadal iti Sao ti Dios, a naisurat adun a siglo ti napalabas, dagiti adipenna piguratibo a makitada ti Dios iti sanguananda ken mangngegda ti timekna iti likudan.—Roma 15:4.