Maysaka Kadi a Regular a Manangiwaragawag iti Pagarian?
1 Naragsakantayo amin idi ingngudo ti sanga nga opisina ti Pilipinas ti napalabas a tawen serbisio iti 132,496 a kangatuan a bilang dagiti agibumbunannag idi Agosto 1999. Nupay kasta, 128,106 ti promedio a bilang dagiti agibumbunannag iti dayta a tawen. Agparang nga addada agibumbunannag a marigatan nga agbalin a regular a manangiwaragawag iti Pagarian. Kinapudnona, ipakita dagiti analysis report a naggapu kadagiti kongregasion a nasurok a 19,000 kadagiti aktibo nga agibumbunannag ti di nagreport a nakiramanda iti ministerio iti binulan. Patienmi a makatulong ti sumaganad a pammaregta tapno maatur dayta a kasasaad.
2 Apresiaren ti Pribilehio: Addaantay koma iti nauneg a panangapresiar iti pribilehiotayo a mangiranud iti naimbag a damag ti Pagarian kadagiti sabsabali. Daytoy a trabaho paragsakenna ti puso ni Jehova ken tulonganna dagiti nasingpet ti panagpuspusoda a tattao a mangammo iti dalan ti biag. (Prov. 27:11; 1 Tim. 4:16) Ti regular a panangasaba paaduenna ti kapadasantayo iti ministerio ket mangibunga dayta iti rag-o ken mariknatay nga adda nagapuanantayo.
3 Ireport ti Nagapuanan: Dagiti dadduma a makiramraman iti tay-ak ti serbisio malipatanda nga ireport iti umiso a tiempo dagiti nagapuananda. Ditay koma pulos ipagarup a kasla di napateg nga ireport ti naaramidantayo. (Idiligyo ti Marcos 12:41-44.) Talaga a rumbeng nga ireporttay ti naaramidantayo! No adda naipasdek nga urnos iti pagtaengan, kas ti panagusar iti kalendario, a pangisuratan iti oras a nabusbos iti ministerio isunto ti kanayon a mangipalagip iti umiso ken nasakbay a panagreport iti ngudo ti kada bulan.
4 Ipaay ti Kasapulan a Tulong: Nalabit nasken a parang-ayen dagiti lokal nga urnos a panangsaranay kadagidiay agkasapulan ti tulong iti regular a pannakiraman iti ministerio. Iyurnos koma ti sekretario ti kongregasion ken dagiti konduktor ti panagadal iti libro ti itutulong dagidiay aduan kapadasan nga agibumbunannag. No adda annakyo wenno iyad-adalanyo iti Biblia a di bautisado nga agibumbunannag, sanayenyo ida a mangireport iti maaramidanda a binulan.
5 Lagipenyo ti pakasaritaan a napauluan iti “Agyamyamanak iti Naunday a Biag iti Panagserbi ken Jehova” iti Oktubre 1, 1997, a Pagwanawanan. Nagbalin a regular nga agibumbunannag iti naimbag a damag ni Kabsat Ottilie Mydland idiay Norway sakbay ti pannakabautisarna idi 1921. Pitopulo ket innem a tawen kalpasanna, iti edad a 99, kinunana: “Maragsakanak ta posible pay laeng ti panagbalinko a regular nga agibumbunannag.” Anian a nakaskasdaaw a kababalin a tuladen dagiti amin nga adipen ni Jehova!