Maragpattay Ngata ti Kalattayo iti Daytoy a Bulan?
1 Idi Pebrero ken Abril, 1994, nagreport ti sanga iti Pilipinas iti nasurok a 100,000 a panangyadal iti Biblia. Iti Hulio 1998 a Ministeriotayo iti Pagarian, nairekomenda a pagbalinentay a kalattayo iti Agosto nga abutentay manen daytoy a bilang. Aniat’ maaramidantayo kas indibidual tapno maragpattay daytoy a kalat?
2 Awaten ti Karit: Iti adu a kongregasion, nasurok a kagudua kadagiti agibumbunannag ti awanan iti regular nga iyad-adalan iti Biblia. No maysakay kadagitoy, paregtaendakayo a pagbalinenyo a naisangsangayan a kalat iti daytoy a bulan ti mangirugi iti panangyadal iti Biblia. No makairugikayo iti panangyadal iti umuna a lawas ti Agosto, sa maituloy iti mamindua pay kalpasan dayta, mabalin nga ireport iti ngudo ti Agosto kas baro nga iyad-adalan iti Biblia.—Kitaenyo ti “Saludsod” iti panid 7.
3 No makiramankayo iti ministerio, panangasaba man iti lansangan, di pormal a panangasaba, wenno regular a panagbalaybalay, itukonyo ti panangyadal iti Biblia iti pagtaengan. Maaramidyo daytoy iti mismo nga introduksionyo. Makatulong met daytoy kadagiti tattao tapno matarusanda a saantayo “a managlako iti sao ti Dios,” wenno interesado laeng nga agipaima kadagiti magasin, no di ket sapsapulentayo dagidiay mayat a mangammo kadagiti kalikaguman ti Dios. (2 Cor. 2:17) Ti broshur a Kalikaguman ket nagsayaat nga usaren a pangitukon iti 16 a lawas a panagadal iti Biblia.—Kitaenyo Ti Ministeriotayo iti Pagarian a Hulio 1998, panid 8.
4 Masansan a mabalin nga irugi nga iyadalan dagidiay am-ammoyo, kas kadagiti miembro ti pamilia, kakabagian, katrabahuan, kaeskuelaan, tattao kadagiti tiangge wenno tiendaan a masansan a makalangenyo. Apay a diyo ilista dagiti posibilidad sa kitaenyo no adda maysa kadagitoy a mayat nga agpayadal iti Biblia?
5 Dagiti Panagadal ti Pamilia iti Biblia: Naipadamag nga adu dagiti ulo ti pamilia a di mangidadaulo iti regular a panagadal ti pamilia, wenno, no mangidadauloda, masansan a dida maireport dayta nupay nalabit adda nailaok a miembro ti pamilia a di nabautisaran. No maysakayo nga ulo ti pamilia a di mangar-aramid iti daytoy nga aspeto ti panangyadal iti Biblia, daytoyen ti nasayaat a tiempo a panangilintegyo iti dayta a banag babaen ti panangirugi ken panangireport iti panagadal ti pamiliayo.
6 Mainayon pay, paregtaenmi dagidiay mangidadaulon kadagiti panagadal, kas kadagiti payunir, nga ikagumaanda ti mangirugi iti baro nga iyadalan iti Agosto. No aramiden daytoy ti tunggal payunir, nalakatayo laeng nga abuten ti nasurok a 100,000 a panangyadal iti daytoy a bulan. Gapuna, ikagumaantay amin a ragpaten ti kalattayo iti daytoy a bulan sa itultuloytay a tulongan dagidiay iyad-adalantayo a rumang-ay agingga nga agdedikarda.