Agan-andurkay Kadi?

¹ “Awanen ti adda kaniak a dakdakkel pay a pakaigapuan ti kinamanagyaman ngem kadagitoy a bambanag, . . . a dagiti annakko agtultuloyda a magmagna iti kinapudno.” (3 Juan 4) Nagrag-oan unay ni Juan ti kinaandur dagiti naespirituan nga annakna. Anian a ragsak ti nailangitan nga Amatayo a makakita iti minilion kadagiti manamnama nga agbalinto nga annakna nga “agtultuloyda a magmagna iti kinapudno”!​—Prov. 23:15, 16; 27:11.

² Nupay kas grupo ket agtultuloy a naregta ti ili ti Dios iti Nakristianuan nga aramid, in-inut a kimmapuy ti dadduma. Nupay nabileg dagitoy idi damo a maammuanda ti kinapudno, iti panaglabas dagiti tawen, naruamdan iti sangkabassit laeng wenno paspasaray a pannakiraman iti trabaho a panagaramid iti adalan.

³ Mabalin a gimminad ti dadduma gapu kadagiti pisikal a limitasion ken epekto ti panaglakay. Ngem makomendaranda gapu iti kinaandurda. Ar-aramidenda ti kabaelanda. Ngem rumbeng nga utoben ti tunggal nangidedikar ti biagna iti Dios: ‘Impalubosko aya a maipamaysa unay ti panunotko kadagiti personal nga aramid, a gapu iti dayta bassiten ti pasetna iti biagko dagiti interes ti Pagarian? Medio ‘apaganem-emak’ kadin, wenno umag-agawaak kadi pay laeng a “sipipinget”?’ (Apoc. 3:15, 16; Luc. 13:24) Sapay koma ta utobentayo a buyogen ti kararag ti kasasaadtayo ket ikagumaantay ti rumang-ay no kasapulan, a laglagipentayo nga inkari ni Jehova nga ipaayna ti “dayag ken dayaw ken talna agpaay iti tunggal maysa nga agaramid ti naimbag.”​—Roma 2:10.

⁴ No Kasano ti Agandur: Ania ti nakatulong ken Jesus nga agibtur? Inlawlawag ni Pablo: “Gapu iti rag-o a naikabil iti sanguananna inibturanna ti kayo a pagtutuokan, nga inumsina ti bain, ket nagtugaw iti makannawan ti trono ti Dios.” (Heb. 12:1-3) Ti rag-o nga agur-uray idi ken Jesus linab-awanna dagiti temporario a suot a naipasango kenkuana. Makapagandurtay met no pampanunotentayo ti rag-o nga agur-uray kadatayo. (Apoc. 21:4, 7; 22:12) No agpannuraytayo ken Jehova nga ikkannatayo iti pigsa babaen ti personal a panagadal, regular a pannakigimong, ken napinget a panagkararag, makapagtultuloytayo iti trabaho nga impaaramidna kadatayo.

⁵ Pagragsakan ni Jehova ti panagandur dagiti nasungdo nga adipenna. Gapuna, nayonantayo ti rag-ona babaen ti agtultuloy a ‘pannagna iti kinapudno.’