Panangpilit Dagiti Kapatadan ken ti Pribilehioyo a Mangasaba
1 Ti panangpilit dagiti kapatadan ket nabileg nga impluensia—agpaay a pagimbagan wenno pagdaksan. Nasayaat ti impluensia dagiti padatayo nga adipen ni Jehova a mangparegta kadatayo iti nasayaat a Nakristianuan nga ar-aramid. (Heb. 10:24) Nupay kasta, mabalin a pilitendatayo dagiti di Saksi a miembro ti pamilia, katrabahuan, kaeskuelaan, kaarruba, wenno dadduma pay nga am-ammotayo nga agaramid iti banag a maikaniwas kadagiti Nakristianuan a prinsipio. Nalabit agsaoda buyogen ti “panangtagibassit iti naimbag a kababalin[tayo] mainaig ken Kristo.” (1 Ped. 3:16) Kasanotay a mataginayon ti determinasiontayo nga agtultuloy a mangasaba nupay pilitendatayo dagiti sabsabali nga agaramid iti di umiso?
2 Dagiti Miembro ti Pamilia: No dadduma, mabalin a busoren ti di Saksi nga asawa a lalaki ken ama ti panangasaba ti asawa ken annakna iti publiko. Kasta idi ti situasion ti maysa a sangakabbalayan idiay Mexico. Nagbalin a Saksi ti asawa ti maysa a lalaki ken ti pito nga annakda. Idi damo, bimmusor ti asawa a lalaki agsipud ta dina kayat a mamalaybalay ti pamiliana a mangasaba ken mangitukon iti literatura ti Biblia. Iti panangmatmatna, nanumo unay dayta a trabaho. Nupay kasta, natibker ti pangngeddeng ti asawa ken annakna nga agserbi ken ni Jehova ken regular a mangasaba. Idi agangay, naamirisna ti pateg ti panangawat iti urnos ti Dios iti panangasaba, ket indedikarna met ti bagina ken Jehova. Sana la inawat ti kinapudno kalpasan ti 15 a tawen, ngem naaramidna aya koma ti kasta no saan nga intultuloy ti pamiliana ti mangasaba?—Luc. 1:74; 1 Cor. 7:16.
3 Dagiti Katrabahuan: Ti panagreggetyo a mangasaba kadagiti katrabahuan ket mabalin a busoren dagiti dadduma. Inestoria ti maysa a kabsat a babai nga idi napagsasaritaan ti maipapan iti panungpalan ti lubong idiay opisinada, isut’ inuyawda gapu ta insingasingna a basaenda ti Mateo kapitulo 24. Ngem kalpasan ti sumagmamano nga aldaw, maysa kadagiti katrabahuanna ti nangibaga kenkuana a binasana ti kapitulo ket naayatan iti dayta. Napaimaan iti publikasion, ken immannugotda ken lakayna nga agadal iti Biblia. Nagpaut ti immuna a panagadal agingga iti alas dos ti parbangon. Kalpasan ti maikatlo a panagadal, rinugiandan ti nakigimong. Di nagbayag kalpasanna, inidiandan ti panagsigarilio ken inrugidan ti mangasaba. Napasamak aya koma daytoy no saan a nagregget ti kabsattayo a babai a mangiranud iti namnamana kadagiti sabsabali?
4 Dagiti Kaeskuelaan: Kadawyan a mapasaran dagiti agtutubo a Saksi ti panangpilit dagiti kapatadanda idiay eskuelaan ken agbutengda di la ket ta umsien ida dagiti padada nga agtutubo gapu iti panangasabada. Kinuna ti maysa a Kristiano a tin-edyer a taga Estados Unidos: “Mabutengak a mangasaba kadagiti padak nga agtutubo gapu ta amkek a rabrabakendak.” Isu a liniklikanna a kasabaan dagiti kapatadanna idiay eskuelaan ken iti teritoria. Kasanokay a maaddaan iti bileg a mangsaranget iti panangpilit dagiti kapatadan? Agtalekkayo ken Jehova, a tarigagayanyo ti iyaanamongna. (Prov. 29:25) Iparangarangyo ti abilidadyo a mangusar iti Sao ti Dios iti panangasabayo. (2 Tim. 2:15) Ti kadakdakamat nga agtutubo ket nagkararag ken Jehova, a nagpatulong tapno mapatanorna ti tarigagay a mangasaba kadagiti kaeskuelaanna. Rinugianna ti mangasaba a di pormal idiay eskuelaan. Nasayaat ti resultana, ket idi agangay kinasabaanna amin nga am-ammona. Kinunana: “Kasapulan ken kayat dagidiay nga agtutubo ti maaddaan iti namnama iti masakbayan, ket us-usarennakami ni Jehova a tumulong kadakuada.”
5 Dagiti Kaarruba: Mabalin nga addada kaarruba wenno dadduma nga am-ammotayo a marurod gapu iti kinasaksi ken patpatientayo. No maamakka iti adda a pampanunotenda, saludsodam ta bagim: ‘Ammoda kadi ti kinapudno a mangiturong iti biag nga agnanayon? Ania ti maaramidak tapno madanon ti pusoda?’ Napaliiw ti maysa a manangaywan ti sirkito nga adda naimbag a resulta ti ababa ken regular a panangasaba kadagiti kaarruba. Idawatmo ken Jehova nga ikkannaka iti bileg ken sirib a kasapulam tapno maitultuloymo ti agbirok kadagiti nasingpet-panagpuspusoda a tattao.—Fil. 4:13.
6 Mabalin a maay-ayo dagiti bumusbusor no tumuloktayo iti kayatda a mapasamak, ngem agpaay kadi dayta a pagimbaganda—wenno pagimbagantayo? Ni Jesus ket binusor idi dagiti kalugaranna. Inibturanna pay ketdi ti pananginsulto dagiti kakabsatna iti ina. Ngem ammona a sana la matulongan ida no agtalinaed a napudno iti nangibaonan ti Dios kenkuana. Gapuna, ‘nagibtur [ni Jesus] iti kasta a mangbusor a panagsao dagiti managbasol maibusor kadagiti bukodda a pagimbagan.’ (Heb. 12:2, 3) Masapul a kasta met ti aramidentayo. Determinadokay koma a mangaprobetsar iti pribilehioyo a mangikasaba iti mensahe ti Pagarian. No aramidenyo ti kasta, ‘maisalakanyonto agpadpada ti bagiyo ken dagidiay agimdeng kadakayo.’—1 Tim. 4:16.